కేసీఆర్‌ కిట్‌.. సూపర్‌ హిట్‌

గర్భిణులు, బాలింతల సంక్షేమమే లక్ష్యంగా తెలంగాణ ప్రభుత్వం తీసుకొచ్చిన పథకం.. కేసీఆర్‌ కిట్‌. 2017 జూన్‌ 2 నుంచి తెలంగాణ ప్రభుత్వం ఈ పథకాన్ని అమలు చేస్తున్నది. ప్రభుత్వ దవాఖానల్లో ప్రసవం చేయించుకునే మహిళలకు తగిన ఆర్థిక సహాయం అందించడంతోపాటు, తల్లీబిడ్డలకు అవసరమైన వస్తువులను ఉచితంగా అందిస్తున్నారు.

• గర్భిణులు, బాలింతల సంక్షేమమే లక్ష్యం
• రాష్ట్రంలో సురక్షిత ప్రసవాలకు బాటలు
• పెరిగిన రిజిస్ట్రేషన్లు.. తగ్గిన అబార్షన్లు

హైదరాబాద్‌, జూన్‌ 5 (నమస్తే తెలంగాణ): గర్భిణులు, బాలింతల సంక్షేమమే లక్ష్యంగా తెలంగాణ ప్రభుత్వం తీసుకొచ్చిన పథకం.. కేసీఆర్‌ కిట్‌. 2017 జూన్‌ 2 నుంచి తెలంగాణ ప్రభుత్వం ఈ పథకాన్ని అమలు చేస్తున్నది. ప్రభుత్వ దవాఖానల్లో ప్రసవం చేయించుకునే మహిళలకు తగిన ఆర్థిక సహాయం అందించడంతోపాటు, తల్లీబిడ్డలకు అవసరమైన వస్తువులను ఉచితంగా అందిస్తున్నారు. తల్లులకు మూడు విడతలుగా మొత్తం రూ.12 వేల రూపాయలను ప్రభుత్వం అందిస్తున్నది. వారు ఆడపిల్లలకు జన్మనిస్తే ప్రోత్సాహకంగా మరో 1000 రూపాయలు కలిపి 13 వేల రూపాయలను ప్రభుత్వం ఇస్తున్నది. ఇప్పటివరకు
13,90,636 మందికి కిట్లతోపాటు, ఆర్థిక సహాయాన్ని ప్రభుత్వం అందించింది. ఈ పథకం కోసం ప్రభుత్వంరూ.1261 కోట్లను ఖర్చు చేసింది.

• అంచనాలకు మించి రిజిస్ట్రేషన్లు…: కేసీఆర్‌ కిట్‌ పొందాలంటే కచ్చితంగా గర్భిణులు రిజిస్ట్రేషన్‌ చేసుకోవాల్సి ఉంటుంది. దీంతో రాష్ట్రంలో అంచనాలకు మించి గర్భిణుల నమోదు జరిగింది. హెచ్‌ఎంఐఎస్‌ నివేదిక ప్రకారం 2020-21లో రాష్ట్రంలో ఏఎన్సీ రిజిస్ట్రేషన్లు 103.82% గా నమోదుకాగా, 2021-22లో మరింత పెరిగి 108.39 శాతంగా నమోదైంది. తద్వారా పెద్ద రాష్ర్టాల జాబితాలో అగ్రస్థానంలో నిలిచింది. గుజరాత్‌లో 89 శాతం, మధ్యప్రదేశ్‌లో 82 శాతం మాత్రమే మాత్రమే ఏఎన్సీ రిజిస్ట్రేషన్లు జరిగాయి. తెలంగాణ ఏర్పడే నాటికి ఏఎన్సీ రిజిస్ట్రేషన్లు 70 శాతం మాత్రమే ఉండేవి.
• ఏఎన్సీ చెకప్స్‌లోనూ ఆదర్శం: కేసీఆర్‌ కిట్‌లో.. గర్భిణిగా నమోదై, కనీసం రెండుసార్లు ఏఎన్సీ చెకప్‌ చేయించుకున్న తర్వాతే మొదటి విడుత నగదు సాయం రూ.3వేలు అందించాలని నిబంధన ఉన్నది. దీంతో గర్భిణులకు ఏఎన్సీ చెకప్స్‌ నిర్వహించడంలోనూ తెలంగాణ ముందువరుసలో ఉన్నది. దీంతో రిజిస్టర్‌ అయిన గర్భిణులంతా ఏఎన్సీ చెకప్స్‌ చేయించుకుంటున్నారు. వారిని సురక్షితంగా దవాఖానకు తీసుకెళ్లి, పరీక్షలు చేయించి, తీసుకొచ్చేందుకు ప్రభుత్వం అమ్మ ఒడి వాహనాలను అందుబాటులోకి తెచ్చిన సంగతి తెలిసిందే. ఇక.. గర్భిణుల్లో 81 శాతం మందికి నాలుగు ఏఎన్సీ చెకప్స్‌ నిర్వహిస్తున్నట్టు హెచ్‌ఎంఐఎస్‌-2022 నివేదిక స్పష్టం చేసింది. అంతేకాదు.. గర్భిణులకు టీటీ, టీటీ బూస్టర్‌ వేయడంలోనూ తెలంగాణ 91 శాతంతో రాష్ర్టాల్లో టాప్‌గా నిలిచింది.
• 100 శాతం సురక్షిత ప్రసవాలు: పేదలు, నిరక్షరాస్యత వల్ల అవగాహనలేని కొందరు ఇంటివద్దే ప్రసవిస్తున్నట్టు అధికారులు గుర్తించారు. దీనిని నివారించేందుకు ప్రభుత్వ దవాఖానలో ప్రసవిస్తేనే కేసీఆర్‌ కిట్‌ రెండో విడత నగదు సాయం రూ.4వేలు (ఆడబిడ్డ పుడితే రూ.5వేలు) అందించాలని నిబంధన విధించారు. దీంతోపాటు రూ.2వేలు విలువైన తల్లి, బిడ్డకు అవసరమైన వస్తువులతో కూడిన కిట్‌ అందిస్తున్నారు. దీంతో రాష్ట్రంలో వందశాతం దవాఖానల్లోనే ప్రసవాలు జరుగుతున్నాయి. తద్వారా దేశంలోని ఏకైక రాష్ట్రంగా తెలంగాణ అవతరించింది. 2015లో 61 శాతంగా ఉండేవి. దవాఖాన ప్రసవాల్లో ప్రస్తుతం జాతీయ సగటు 95.5 శాతంగా నమోదైంది. అంతేకాదు.. దేశంలో 100 శాతం సురక్షిత ప్రసవాలు జరుగుతున్న రాష్ట్రంగానూ తెలంగాణ ఆదర్శంగా నిలిచింది. మరోవైపు ప్రభుత్వ దవాఖానల్లో ప్రసవాలు పెరిగాయి. 2022లో ప్రభుత్వ దవాఖానల్లో ప్రసవాలు 61 శాతం నమోదయ్యాయి. ఇది ప్రైవేట్‌ కన్నా 20 శాతం అధికం. తెలంగాణ ఏర్పాటుకు ముందు ప్రభుత్వ ఆసుపత్రుల్లో డెలివరీలు 32శాతంగా ఉంటే, ఇప్పుడు డబుల్‌ అయ్యింది.
• అతితక్కువ అబార్షన్లు: కేసీఆర్‌ కిట్‌లో భాగంగా గర్భిణుల నమోదు అనంతరం వైద్య సిబ్బంది ఏఎన్సీ చెకప్‌ల ద్వారా వారి ఆరోగ్యంపై నిరంతరం పర్యవేక్షిస్తున్నారు. అవసరమైన మందులు అందజేస్తున్నారు. వారు ఆరోగ్యంగా ఉండటానికి ఏయే ఆహారం తీసుకోవాలి, ఎలాంటి వ్యాయామాలు చేయాలి? వంటి సలహాలు, సూచనలు ఇస్తున్నారు. టిఫా స్కానింగ్‌ వంటి అత్యాధునిక పరికరాలను సైతం అందుబాటులోకి తెచ్చారు. మరోవైపు అమ్మ ఒడి వాహనాల్లో దవాఖానకు సురక్షితంగా తీసుకెళ్తున్నారు. వీటన్నింటి ఫలితంగా 2021-22లో దేశంలోనే అతి తక్కువ గర్భస్రావాలు (అబార్షన్లు) నమోదవుతున్న రాష్ర్టాల్లో తెలంగాణ రెండో స్థానంలో నిలిచింది. రాష్ట్రంలో కేవలం 0.9 శాతం అబార్షన్లు నమోదయ్యాయి. నెలలు నిండకముందే ప్రసవాలు కూడా తెలంగాణలో అతితక్కువగా (1.12 శాతం) నమోదయ్యాయి.
• తగ్గిన మాతాశిశు మరణాలు : మాతృమరణాల (ఎంఎంఆర్‌) తగ్గింపులో తెలంగాణ దేశానికే ఆదర్శంగా నిలిచింది. మరణాల తగ్గుదల రేటులో మాత్రం దేశంలోనే రెండో స్థానంలో నిలిచింది. శాంపిల్‌ రిజిస్రేషన్‌ సర్వే (ఎస్‌ఆర్‌ఎస్‌) నివేదిక ప్రకారం 2015-17లో తెలంగాణ ఎంఎంఆర్‌ 76 కాగా.. ఇటీవల వెల్లడించిన నివేదిక ప్రకారం ఎంఎంఆర్‌ 43కు తగ్గింది.
• ఆరోగ్యంగా శిశువులు : తెలంగాణలో 93.8 శాతం మంది పిల్లలు సరైన బరువుతో పుడుతున్నట్టు నివేదిక తెలిపింది. కేసీఆర్‌ కిట్‌లో భాగంగా తరుచూ ఏఎన్సీ చెకప్స్‌ చేయడంతోపాటు ఆరోగ్యలక్ష్మి కార్యక్రమం ద్వారా వారికి పోషకాహారం అందించడం, కేసీఆర్‌ న్యూట్రిషన్‌ కిట్‌ అందించడం, ముర్రుపాలు అందించడంపై ప్రత్యేక దృష్టిసాధించడం వల్లే ఇది సాధ్యమైంది. పుట్టిన పిల్లలకు గంటలోపు తల్లిపాలు అందించడంలోనూ తెలంగాణ టాప్‌ రాష్ర్టాల్లో నిలిచింది. 81 శాతం మంది పిల్లలకు ముర్రుపాలు అందుతున్నట్టు తెలిపింది. కేసీఆర్‌ కిట్‌లో మూడు, నాలుగో ఇన్‌స్టాల్‌మెంట్లను పిల్లలకు మూడో నెల, తొమ్మిదో నెల టీకాలు వేసిన తర్వాత అందిస్తారు. దీంతో పిల్లలందరికీ టీకాలు అందించడంలో తెలంగాణ ముందువరుసలో నిలిచింది. రాష్ట్రంలో 100 శాతం మంది పిల్లలకు టీకాలు వేసినట్టు కేంద్రం అనేకసార్లు స్పష్టంచేసింది. అంతేకాదు.. తెలంగాణలో పుట్టిన ప్రతి శిశువును అధికారికంగా నమోదు చేస్తున్నట్టు కేంద్ర ప్రభుత్వం, నీతి ఆయోగ్‌ చెప్తున్నాయి. దీంతో ప్రతి శిశువుకు వ్యాక్సిన్లు అందుతూ ఆరోగ్యంగా ఉంటున్నారు.