Visit:
Summer Diet | వేసవికాలం ప్రారంభమైన వెంటనే ఉష్ణోగ్రతలు పెరగడం, చెమట ఎక్కువగా రావడం, డీహైడ్రేషన్, ఇన్ఫెక్షన్ల ప్రమాదం పెరగడం సహజం. ఈ సమయంలో శరీర రోగనిరోధక వ్యవస్థ మరింత కష్టపడి పనిచేయాల్సి ఉంటుంది. చాలా మంది తీసుకునే ఆహారం ఈ పరిస్థితుల్లో కీలక పాత్ర పోషిస్తుంది. కొన్ని ఆహారాలు ఇమ్యూనిటీని బలహీనపరచడం మాత్రమే కాకుండా జీర్ణ సమస్యలు, ఇన్ఫెక్షన్ల ప్రమాదాన్ని కూడా పెంచుతాయని నిపుణులు చెబుతున్నారు. న్యూట్రిషన్ జర్నల్లో ప్రచురితమైన అధ్యయనం ప్రకారం అధిక కొవ్వు, వేయించిన ఆహారాలు మెటబాలిక్ ఎండోటాక్సీమియాకు దారితీస్తాయి, దీని వల్ల జీర్ణ వ్యవస్థ ఆరోగ్యం దెబ్బతిని రోగనిరోధక శక్తి తగ్గుతుంది.
వేసవిలో ఇమ్యూనిటీని మెల్లగా దెబ్బతీసే ఆహారాల్లో మొదటిగా డీప్ ఫ్రైడ్ ఫుడ్స్ ఉన్నాయి. పకోడీలు, చిప్స్ వంటి అధిక నూనె ఉన్న పదార్థాలు జీర్ణక్రియను మందగింపజేస్తాయి. వేడి కాలంలో వీటిని తీసుకుంటే అలసట, అసిడిటీ, పొట్టలో అసౌకర్యం పెరుగుతాయి. జీర్ణ వ్యవస్థ ఆరోగ్యం దెబ్బతింటే అది నేరుగా ఇమ్యూనిటీపై ప్రభావం చూపుతుంది. అలాగే చక్కెర పానీయాలు, స్వీట్లు కూడా ప్రమాదకరమే. కోల్డ్ డ్రింక్స్, ప్యాకేజ్డ్ జ్యూసులు, డెజర్ట్స్ తాత్కాలికంగా చల్లదనం ఇస్తున్నట్లు అనిపించినా, అధిక చక్కెర రోగనిరోధక శక్తిని తగ్గిస్తుంది. న్యూట్రియెంట్స్ జర్నల్లో వచ్చిన అధ్యయనం ప్రకారం గ్లూకోజ్, ఫ్రక్టోజ్, సుక్రోజ్ వంటి సింపుల్ షుగర్లు వైట్ బ్లడ్ సెల్స్ పనితీరును తగ్గిస్తాయి. దీని వల్ల శరీరం ఇన్ఫెక్షన్లను ఎదుర్కొనే సామర్థ్యం తగ్గుతుంది.
ప్రాసెస్ చేసిన, ప్యాకేజ్డ్ ఆహారాలు కూడా ఇమ్యూనిటీకి హానికరం. వీటిలో ప్రిజర్వేటివ్స్, అధిక ఉప్పు, అనారోగ్యకరమైన కొవ్వులు ఎక్కువగా ఉంటాయి. ఇవి జీర్ణ వ్యవస్థ బ్యాలెన్స్ను దెబ్బతీసి శరీరం ఇన్ఫెక్షన్లను ఎదుర్కొనే శక్తిని తగ్గిస్తాయి. అందుకే వేసవిలో వీటిని తగ్గించడం మంచిది. అధిక కెఫీన్ ను తీసుకోవడం కూడా ప్రమాదకరం. కాఫీ, ఎనర్జీ డ్రింక్స్ ఎక్కువగా తీసుకుంటే డీహైడ్రేషన్ పెరుగుతుంది. జర్నల్ ఆఫ్ ఆక్యుపేషనల్ మెడిసిన్ అండ్ టాక్సికాలజీ ప్రకారం అధిక కెఫీన్ శరీరంలో మెటబాలిజం, హార్ట్ రేట్ పెంచి వేడి పరిస్థితుల్లో శరీరంపై అదనపు ఒత్తిడిని కలిగిస్తుంది. దీని వల్ల హీట్ ఎగ్జాషన్ వంటి సమస్యలు వచ్చే అవకాశం ఉంటుంది. అదే విధంగా అత్యధికంగా మసాలా ఆహారం తీసుకోవడం కూడా సమస్యలకు దారితీస్తుంది. మిరపకాయల్లో ఉండే క్యాప్సైసిన్ శరీరంలో వేడి భావనను పెంచి చెమట ఎక్కువగా రావడానికి కారణమవుతుంది. ఇది అసిడిటీ, కడుపులో మంట వంటి సమస్యలను కలిగించే అవకాశాలు ఉంటాయి.
వేసవిలో స్ట్రీట్ ఫుడ్ తీసుకోవడం కూడా ప్రమాదకరమని నిపుణులు చెబుతున్నారు. వేడి వాతావరణంలో బ్యాక్టీరియా వేగంగా పెరుగుతాయి. పరిశుభ్రత లేని ఆహారం తీసుకుంటే ఫుడ్ పాయిజనింగ్ ప్రమాదం పెరుగుతుంది. అందుకే తాజాగా శుభ్రంగా తయారైన ఆహారం తీసుకోవడం అత్యంత ముఖ్యం. అధిక ఉప్పు ఉన్న ఆహారాలకు కూడా దూరంగా ఉంచాలి. ఇవి శరీరంలో నీటి నిల్వలను ప్రభావితం చేసి డీహైడ్రేషన్కు దారితీస్తాయి. అలాగే రక్తపోటు, ద్రవ సమతుల్యతపై ప్రతికూల ప్రభావం చూపుతాయి. కనుక వేసవిలో ఆరోగ్యాన్ని కాపాడుకోవాలంటే ఆహారంలో జాగ్రత్తలు చాలా అవసరం. అధిక నూనె, చక్కెర, ప్రాసెస్ చేసిన, పరిశుభ్రత లేని ఆహారాలను తగ్గించడం ద్వారా ఇమ్యూనిటీని రక్షించుకోవచ్చు. తాజా పండ్లు, నీటితో నిండిన, పోషకాలు అధికంగా ఉన్న ఆహారం తీసుకోవడం ద్వారా శరీరాన్ని చల్లగా, శక్తివంతంగా ఉంచుకోవచ్చని నిపుణులు సూచిస్తున్నారు.
