సాత్వికాహారం.. మానసిక ఆరోగ్యం!

మనసు స్వచ్ఛంగా, ప్రశాంతంగా ఉండటానికి సూత్రాలు వ్యక్తిత్వ వికాస పుస్తకాల్లోనో, మెడిటేషన్‌ యాప్స్‌లోనో ఉంటాయనుకుంటారు. కానీ, మనం తినే ఆహారంలోనే ఆ రహస్యం దాగుంది.

మనసు స్వచ్ఛంగా, ప్రశాంతంగా ఉండటానికి సూత్రాలు వ్యక్తిత్వ వికాస పుస్తకాల్లోనో, మెడిటేషన్‌ యాప్స్‌లోనో ఉంటాయనుకుంటారు. కానీ, మనం తినే ఆహారంలోనే ఆ రహస్యం దాగుంది. అన్నం ఎలా ఉంటే మన మనసు అలా ఉంటుందని పెద్దల మాట. అందుకే సాత్విక ఆహారానికి ఆయుర్వేదం, యోగా ఎంతో ప్రాధాన్యం ఇచ్చాయి.

సాత్విక ఆహార పదార్థాలు సరళంగా, సహజంగా, జీవం ఉట్టిపడుతూ ఉంటాయి. తాజా పండ్లు, రంగురంగుల కూరగాయలు, ముతకధాన్యాలు, గింజలు, మొలకలు, పాలు, నెయ్యి వంటివి సాత్విక ఆహారం కిందికి వస్తాయి. ఇవి తేలిగ్గా అరగడమే కాకుండా పోషకాలతో సమృద్ధిగా ఉంటాయి. శరీరానికి సరైన పోషణను అందిస్తాయి. సాత్వికాహారం సహజంగానే యాంటి ఇన్‌ఫ్లమేటరీ లక్షణాలను కలిగి ఉంటుంది. సాత్వికాహారం జీవక్రియలు సాఫీగా సాగేలా చేస్తుంది. కడుపు ఉబ్బరాన్ని తగ్గిస్తుంది. పొట్ట ఆరోగ్యాన్ని మెరుగుపరుస్తుంది.

ఏది సాత్వికం కాదు?

• మసాలా, పుల్లటి, ఉప్పదనం కలిగినవి, బరువైనవి, ప్రాసెస్డ్‌ పదార్థాలు సాత్వికాహారం కిందికి రావు.
• మసాలా ఆహారం, వేడి వేడి సాస్‌లు, వేపుళ్లు, నూనె పదార్థాలు, ఉప్పు ఎక్కువగా ఉన్న చిరుతిండ్లు.
• కాఫీ, టీ (హెర్బల్‌ టీ మినహా), ఇతర కెఫీన్‌ పానీయాలు.
• మిఠాయిలు, చక్కెరలు ఉన్న ఆహారాలు. ముఖ్యంగా రిఫైన్డ్‌ చక్కెర ఉన్నవి.
• మాంసం, గుడ్లు, ఉల్లి, వెల్లుల్లి, పాచిపోయినవి, మిగిలిపోయినవి, మళ్లీ వేడిచేసిన ఆహార పదార్థాలు.
• ప్రిజర్వేటివ్‌లు ఉన్న ప్రాసెస్డ్‌ ఆహారాలు, ఆర్టిఫీషియల్‌ యాడిటివ్స్‌, ఫ్లేవర్లు ఉన్నవి.
• ఫ్రిజ్‌లో ఉంచినవి, డబ్బాల్లో నిల్వచేసిన పదార్థాలు.