Type 2 Diabetes | మ‌ధుమేహం ఉంటే స్వీట్ల‌కు బ‌దులుగా వీటిని తిన‌వ‌చ్చు.. పోష‌కాలు, శ‌క్తి రెండూ వ‌స్తాయి..

పండుగలు వచ్చాయంటే స్వీట్లు, పిండి వంటలు ప్రత్యేక ఆకర్షణగా నిలుస్తాయి. అయితే మధుమేహం ఉన్నవారు, ఆరోగ్యంపై శ్రద్ధ చూపేవారు తీపి పదార్థాలు తినాలంటే కొంత ఆందోళన చెందుతుంటారు. రక్తంలో చక్కెర స్థాయిలు పెరుగుతాయనే భయంతో పండుగల సమయంలోనూ తీపి పదార్థాలకు దూరంగా ఉంటారు.

Type 2 Diabetes | పండుగలు వచ్చాయంటే స్వీట్లు, పిండి వంటలు ప్రత్యేక ఆకర్షణగా నిలుస్తాయి. అయితే మధుమేహం ఉన్నవారు, ఆరోగ్యంపై శ్రద్ధ చూపేవారు తీపి పదార్థాలు తినాలంటే కొంత ఆందోళన చెందుతుంటారు. రక్తంలో చక్కెర స్థాయిలు పెరుగుతాయనే భయంతో పండుగల సమయంలోనూ తీపి పదార్థాలకు దూరంగా ఉంటారు. అలాంటి వారికి తాజా ఖర్జూరాలతో తయారుచేసిన శ‌నగపిండి లడ్డూలు ఒక ప్రత్యామ్నాయంగా ఉంటాయ‌ని పోషకాహార నిపుణురాలు సూచిస్తున్నారు. సాధారణ చక్కెరకు బదులుగా తాజా ఖర్జూరాలను ఉపయోగించి ఈ లడ్డూలను తయారుచేయవచ్చని వారు చెబుతున్నారు.

గ్లైసెమిక్ సూచీ మ‌ధ్య‌స్థంగానే..

ఖర్జూరాల్లో గ్లైసెమిక్‌ సూచీ మధ్యస్థం నుంచి తక్కువ స్థాయిలో ఉంటుందని, శ‌నగపిండిలో ఇది చాలా తక్కువగా ఉంటుందని వివరించారు. ఈ రెండింటితో తయారుచేసిన లడ్డూల గ్లైసెమిక్‌ సూచీ 45 నుంచి 50 మధ్య ఉంటుందని, ఒక్కో లడ్డూలో గ్లైసెమిక్‌ లోడ్‌ 7 నుంచి 9 వరకు ఉంటుందని పేర్కొన్నారు. గ్లైసెమిక్‌ సూచీ అనేది ఆహారం తీసుకున్న తర్వాత రక్తంలో చక్కెర స్థాయిలు ఎంత వేగంగా పెరుగుతాయో తెలియజేసే కొలమానం. గ్లైసెమిక్‌ లోడ్‌ మాత్రం ఆహారంలో ఉండే పిండి పదార్థాల పరిమాణాన్ని కూడా పరిగణనలోకి తీసుకుంటుంది. ఈ విలువలు తక్కువగా ఉండడం వల్ల ఈ లడ్డూలను తక్కువ గ్లైసెమిక్‌ ప్రభావం కలిగిన తీపి పదార్థంగా నిపుణులు అభివర్ణించారు.

ఆహారం మార్పులు స‌రిపోవు..

ఇక‌ రెండో రకం మధుమేహాన్ని నియంత్రించడానికి కేవలం ఆహారంలో మార్పులు చేసుకోవడం మాత్రమే సరిపోదని వివరించారు. శరీర ఆరోగ్యాన్ని సమగ్రంగా చూసుకోవడం కూడా ముఖ్యమని తెలిపారు. ముఖ్యంగా ఒత్తిడిని తగ్గించుకోవాలని సూచించారు. ఒత్తిడి పెరిగినప్పుడు శరీరంలో కార్టిసాల్‌ అనే హార్మోన్‌ స్థాయిలు పెరిగి రక్తంలో చక్కెర స్థాయిలపై ప్రభావం చూపుతుంది. అలాగే క్రమం తప్పకుండా వ్యాయామం చేయడం వల్ల ఉదయం ఖాళీ కడుపుతో ఉన్నప్పుడు రక్తంలో చక్కెర స్థాయిలను నియంత్రించడంలో సహాయపడుతుంది.

నాణ్య‌మైన నిద్ర కూడా ముఖ్య‌మే..

శరీరానికి సరిపడా నీరు తాగడం, ప్రతిరోజూ నాణ్యమైన నిద్ర పొందడం కూడా మధుమేహ నియంత్రణలో ముఖ్యమైనవని పేర్కొన్నారు. పీచు పదార్థాలు అధికంగా ఉండి, గ్లైసెమిక్‌ సూచీ తక్కువగా ఉన్న ఆహారాన్ని తీసుకోవడం రక్తంలో చక్కెర స్థాయిలను అదుపులో ఉంచేందుకు తోడ్పడుతుంది. అయితే తక్కువ గ్లైసెమిక్‌ సూచీ ఉన్న తీపి పదార్థమైనప్పటికీ, మధుమేహం ఉన్నవారు ఎంత పరిమాణంలో తింటున్నారనే విషయాన్ని గమనించాలి. వ్యక్తిగత ఆరోగ్య పరిస్థితులకు అనుగుణంగా ఆహారాన్ని ఎంచుకోవడం అవసరమ‌ని నిపుణులు చెబుతున్నారు.