Visit:
Diabetes | వయసుతో సంబంధం లేకుండా ప్రతి ఒక్కరిని వేధిస్తున్న అనారోగ్య సమస్యల్లో మధుమేహం కూడా ఒకటి. ఈ వ్యాధితో బాధపడే వారి సంఖ్య రోజురోజుకీ పెరుగుతుందని చెప్పవచ్చు. అయితే మధుమేహం ఒక్కసారిగా వచ్చే వ్యాధి కాదని, దానికి ముందే శరీరం చిన్న చిన్న సంకేతాల ద్వారా హెచ్చరిస్తుందని ఆరోగ్య నిపుణులు చెబుతున్నారు. సాధారణంగా ఒత్తిడి, హార్మోన్ల అసమతుల్యత, వయస్సు ప్రభావం లేదా ఆందోళనగా భావించే కొన్ని లక్షణాలు వాస్తవానికి ఇన్సులిన్ రెసిస్టెన్స్కు సంకేతాలు అవుతాయని తాజా వివరణలు చెబుతున్నాయి. చాలామంది ఈ సూచనలను సంవత్సరాల పాటు పట్టించుకోకపోవడం వల్ల తరువాత టైప్-2 డయాబెటిస్ బారిన పడుతున్నట్లు పేర్కొంటున్నారు. అలాగే టైప్ 2 డయాబెటిస్ ను సూచించే కొన్ని లక్షణాలను కూడా తెలియజేస్తున్నారు.
శరీరంలో ఇన్సులిన్ స్థాయులు అధికంగా ఉన్నప్పుడు మెడ, చేతి కింద భాగాలు లేదా తొడల దగ్గర చిన్న చిన్న స్కిన్ ట్యాగ్స్ కనిపిస్తాయని నిపుణులు వివరిస్తున్నారు. ఇవి సాధారణ చర్మ సమస్యలుగా కనిపించినా, వాస్తవానికి శరీరంలో హైపర్ ఇన్సులినీమియా ఉన్నట్లు సూచించే సంకేతాలుగా చెబుతున్నారు. రక్తంలో ఇన్సులిన్ మోతాదు ఎక్కువగా ఉండడం వల్ల ఈ మార్పులు కనిపించే అవకాశం ఉంటుందని అంటున్నారు. అలాగే మెడ చుట్టూ నల్లగా, వెల్వెట్లా కనిపించే చర్మపు మచ్చలను అకాంథోసిస్ నైగ్రికాన్స్గా పిలుస్తారు. ఇది కూడా అధిక ఇన్సులిన్ ప్రభావంతో చర్మ కణాలు ఎక్కువగా స్పందించడం వల్ల ఏర్పడుతుంది. రక్త పరీక్షల్లో సమస్య బయటపడకముందే చర్మం ఈ మార్పుల ద్వారా హెచ్చరిక ఇస్తుంది. అదే విధంగా రాత్రి 3 నుంచి 4 గంటల మధ్య అకస్మాత్తుగా మేల్కొనడం, గుండె వేగంగా కొట్టుకోవడం, ఆందోళనగా అనిపించడం వంటి లక్షణాలు కూడా రక్తంలో చక్కెర స్థాయిల మార్పులతో సంబంధం ఉంటాయి. నిద్రలో బ్లడ్ షుగర్ ఒక్కసారిగా తగ్గిపోతే శరీరంలో కార్టిసోల్, అడ్రినలిన్ వంటి స్ట్రెస్ హార్మోన్లు విడుదలై ఈ లక్షణాలు కనిపించే అవకాశం ఉంటుంది. చాలామంది దీన్ని కేవలం ఆందోళన సమస్యగా భావిస్తారు. భోజనం చేసిన తర్వాత మధ్యాహ్న సమయంలో తీవ్రమైన అలసట రావడం కూడా రక్తంలో చక్కెర స్థాయిలు ఒక్కసారిగా పెరిగి మళ్లీ పడిపోవడం వల్ల అవుతుంది. దీనిని రియాక్టివ్ హైపోగ్లైసీమియాతో అనుసంధానిస్తారు. ముఖ్యంగా కార్బోహైడ్రేట్లు ఎక్కువగా ఉన్న ఆహారం తీసుకున్న తర్వాత ఈ పరిస్థితి కనిపిస్తుంది.
ఎక్కువగా వ్యాయామం చేసినా, తక్కువగా తిన్నా పొట్ట చుట్టూ కొవ్వు తగ్గకపోవడం కూడా అధిక ఇన్సులిన్ ప్రభావమే అవుతుందని నిపుణులు వివరిస్తున్నారు. ఇన్సులిన్ అధికంగా ఉన్నప్పుడు శరీరంలో కొవ్వు కరిగే ప్రక్రియ నెమ్మదిస్తుంది. అందువల్ల బరువు తగ్గడం కష్టమవుతుంది. కేవలం కేలరీలు తగ్గించడం లేదా వ్యాయామం మాత్రమే చాలదు. హార్మోన్ల సమతుల్యత కూడా కీలకం. తీపి పదార్థాలపై అధిక కోరిక కూడా రక్తంలో చక్కెర మార్పులతో సంబంధం ఉంటుంది. చక్కెరను ఎక్కువగా తీసుకున్నప్పుడు మెదడులో డోపమైన్ పెరిగి తాత్కాలిక ఆనంద భావన కలుగుతుంది. తరువాత బ్లడ్ షుగర్ తగ్గిపోతే మళ్లీ తీపి పదార్థాల కోసం శరీరం కోరుకుంటుంది. ఇది వ్యక్తిగత బలహీనత కాదు, శరీరంలో జరిగే రసాయన మార్పుల ప్రభావం.
అలాగే భారతీయుల జీవనశైలిలో మార్పులు కూడా మధుమేహం పెరగడానికి ప్రధాన కారణమవుతున్నాయని ఆరోగ్య నిపుణులు హెచ్చరిస్తున్నారు. టీతో పాటు బిస్కెట్లు తీసుకోవడం, కార్బోహైడ్రేట్లు అధికంగా ఉండే అల్పాహారం, తగినంత ప్రోటీన్ లేకుండా భోజనం చేయడం, నిద్రలేమి, ఒత్తిడి, కూర్చునే జీవనశైలి, అధిక చక్కెర వినియోగం వంటి అలవాట్లు ప్రమాదాన్ని పెంచుతున్నాయి. భోజనం చేసిన వెంటనే నిద్రగా అనిపించడం, ఎప్పుడూ ఆకలిగా ఉండటం, సాయంత్రం అలసట, పొట్ట చుట్టూ కొవ్వు తగ్గకపోవడం వంటి లక్షణాలను చాలామంది సాధారణ సమస్యలుగా తీసుకుంటారు. అయితే ఇవి భవిష్యత్తులో మధుమేహానికి సంకేతాలు అవుతాయి. శరీరం ముందుగానే ఇచ్చే ఈ చిన్న సంకేతాలను గుర్తిస్తే, జీవనశైలిలో మార్పులు చేసి మధుమేహాన్ని ముందుగానే నియంత్రించే అవకాశం ఉంటుంది.
