పెరినేటల్‌.. ప్రసూతి వైరాగ్యం

‘ప్రసూతి వైరాగ్యం’ అని పెద్దలు ఊరికే అనలేదు. ప్రసవ సమయంలో శరీరంలో వచ్చే హార్మోన్‌ మార్పులు బాలింత మానసిక ఆరోగ్యం మీద తప్పక ప్రభావం చూపిస్తాయి.

‘ప్రసూతి వైరాగ్యం’ అని పెద్దలు ఊరికే అనలేదు. ప్రసవ సమయంలో శరీరంలో వచ్చే హార్మోన్‌ మార్పులు బాలింత మానసిక ఆరోగ్యం మీద తప్పక ప్రభావం చూపిస్తాయి. కుంగుబాటును కలిగిస్తాయి. ఆత్మహత్య ఆలోచనలకు దారితీయవచ్చు. ఈ విషయాన్నే కొన్ని పరిశోధనలు రుజువు చేస్తున్నాయి. గర్భం దాల్చిన దగ్గర్నుంచి ప్రసవమైన ఏడాది వరకు.. ఉన్న కాలాన్ని వైద్య పరిభాషలో ‘పెరినేటల్‌’ అంటారు. ఈ సమయంలో డిప్రెషన్‌కు లోనయ్యేవారిని లోతుగా గమనించాలనుకున్నారు స్వీడిష్‌ పరిశోధకులు.

ఆశ్చర్యంగా పెరినేటల్‌ సమయంలో డిప్రెషన్‌కు గురైనవారిలో, ఆత్మహత్య ఆలోచన ఆరురెట్లు బలంగా కనిపించింది. మానసిక సమతౌల్యం లేకపోవడం, పరధ్యానంలో ప్రమాదాలకు గురికావడం తదితర లక్షణాలు రెండు రెట్లు అధికంగా ఉన్నాయి. పెరినేటల్‌ డిప్రెషన్‌కు గురైనవారి మానసిక స్థితి చాలా ఏళ్ల తర్వాత కూడా అంతే సున్నితంగా ఉన్నట్టు తేలింది. కాబట్టి, గర్భధారణ సమయంలో, ప్రసవం తర్వాత కుంగుబాటు లక్షణాలు కనిపిస్తే తప్పకుండా మానసిక వైద్యుడిని సంప్రదించాలి. ఆ తర్వాత కూడా మనోస్థితిని గమనించుకుంటూ అవసరమైన చికిత్స తీసుకోవాలి.