Visit:
Tap Water | చాలా మంది వంటింట్లో ట్యాప్ నీటిని వాడటం సహజంగా తీసుకుంటారు. పాస్తా మరిగించడానికి, అన్నం, పప్పులు వండడానికి నేరుగా ట్యాప్ నీటినే ఉపయోగిస్తారు. నీరు స్పష్టంగా కనిపిస్తే వంటలో మరిగిస్తే అది సురక్షితమే అనేది సాధారణ అభిప్రాయం. అయితే నిపుణుల ప్రకారం వాస్తవం అంత సులభం కాదు. నీటిని మరిగించడం వల్ల బ్యాక్టీరియా, వైరస్లు నశిస్తాయి కానీ ట్యాప్ నీటిలో ఉండే రసాయన కాలుష్యాలను అది పూర్తిగా తొలగించదు. వంటింట్లో ఎక్కువగా నమ్మే ఒక అపోహ ఏమిటంటే, నీటిని మరిగిస్తే అది పూర్తిగా సురక్షితం అవుతుందనేది. నిజానికి, వేడి వల్ల బ్యాక్టీరియా, వైరస్లు, పరాన్నజీవులు నశించవచ్చు. కానీ నీటిలో కరిగి ఉన్న పదార్థాలు మాత్రం అలాగే మిగిలిపోతాయి.
ఎన్సైక్లోపీడియా బ్రిటానికా ప్రకారం నీటిని వేడి చేయడం ద్వారా సూక్ష్మజీవులను నశింపజేయవచ్చు. అయితే హెవీ మెటల్స్, లవణాలు వంటి అనేక కాలుష్య పదార్థాలు మరిగించిన తర్వాత కూడా నీటిలోనే ఉంటాయి. అలాంటి నీటిలో సీసం (లెడ్), ఆర్సెనిక్, ఫ్లోరైడ్, నైట్రేట్లు, పరిశ్రమల రసాయనాలు వంటి హానికర పదార్థాలు ఉండే అవకాశం ఉంది. నీటిని మరిగిస్తే అది పూర్తిగా సురక్షితం అవుతుందనే ఒక సాధారణ అపోహ ఉంది. వేడి అనేది బ్యాక్టీరియా, వైరస్లను నశింపజేస్తుంది కానీ రసాయన కాలుష్యాలను తొలగించదు. అంటే స్పష్టంగా కనిపించే నీరు, వంటలో మరిగించినప్పటికీ అందులో కరిగి ఉన్న హానికర పదార్థాలు అలాగే ఉండే అవకాశం ఉందని నిపుణులు తెలియజేస్తున్నారు.
ఇంకా ఆశ్చర్యకరమైన విషయం ఏమిటంటే, కొన్నిసార్లు నీటిని మరిగించడం వల్ల కొన్ని పదార్థాల సాంద్రత (కాన్సన్ట్రేషన్) పెరగవచ్చు. నీరు మరిగే సమయంలో కొంత భాగం ఆవిరైపోతుంది కానీ అందులోని రసాయనాలు మిగిలిపోతాయి. దీంతో నీటి పరిమాణం తగ్గిన కొద్దీ అవి మరింత సాంద్రతతో మిగిలిపోతాయి. అమెరికా పర్యావరణ పరిరక్షణ సంస్థ (EPA) ప్రకారం వేడి నీరు చల్లని నీటికంటే త్వరగా సీసాన్ని కరిగిస్తుంది, అందువల్ల వేడి నీటిలో సీసం మోతాదు ఎక్కువగా ఉండే అవకాశముంది. ఇటీవల కాలంలో మైక్రోప్లాస్టిక్లు కూడా ఒక కొత్త సమస్యగా మారాయి. ఇవి చాలా సూక్ష్మమైన ప్లాస్టిక్ కణాలు, కళ్లకు కనిపించవు. తాగునీటిలో కూడా ఈ మైక్రోప్లాస్టిక్లు ఉన్నట్లు అధ్యయనాలు నిరూపిస్తున్నాయి. ఇవి దీర్ఘకాలిక ఆరోగ్య సమస్యలకు దారితీయవచ్చు. ముఖ్యంగా ఇవి రుచి లేదా వాసన ద్వారా గుర్తించడం అసాధ్యం.
అయితే ఒకసారి ట్యాప్ నీటితో వంట చేయడం వల్ల పెద్ద ప్రమాదం జరుగుతుందా అంటే నిపుణులు కాదు అంటున్నారు. ప్రధాన ప్రమాదం దీర్ఘకాలిక వినియోగంలోనే ఉంటుంది. తక్కువ మోతాదులో ఉన్న కాలుష్యాలు పదేపదే శరీరంలోకి వెళ్తే, అవి కాలక్రమేణా శరీరంలో చేరి సమస్యలు కలిగించవచ్చు. సాధారణంగా తాగునీటికి ఫిల్టర్ చేసిన నీటిని ఉపయోగిస్తారు. కానీ వంటకు ఫిల్టర్ చేయని ట్యాప్ నీటినే ఉపయోగిస్తారు. అయితే తాగడానికి శుభ్రపరచిన నీటిని వాడినట్లే వంటలో కూడా అదే విధానాన్ని అనుసరించాలి. ఎందుకంటే వంటలో ఉపయోగించే నీరు కూడా శరీరంలో భాగమే అవుతుంది. ఇప్పటివరకు స్పష్టంగా కనిపించే నీరు, మరిగించడం సరిపోతుందని భావిస్తూ వచ్చారు. కానీ నీటి నాణ్యతపై పెరుగుతున్న సవాళ్లను దృష్టిలో ఉంచుకుని ఈ అభిప్రాయాలను తిరిగి పరిశీలించాల్సిన అవసరం ఉందని నిపుణులు సూచిస్తున్నారు.
