Visit:
Face Inflammation | ఇంటర్నెట్లో ప్రస్తుతం రిలాక్సింగ్ ఫేస్ మసాజ్ వీడియోలు విపరీతంగా వైరల్ అవుతున్నాయి. అలాగే ముఖంలో వచ్చే ఇన్ఫ్లమేషన్ (వాపు) తగ్గిస్తాయని చెప్పే హెర్బల్ షాట్స్ కూడా చాలామంది ఉపయోగిస్తున్నారు. ఇన్ఫ్లమేషన్ అనేది శరీరంలోని రోగనిరోధక వ్యవస్థ గాయాలు లేదా ఇన్ఫెక్షన్లకు ప్రతిస్పందనగా వచ్చే సహజ ప్రక్రియ. అయితే ఇది ఎక్కువకాలం కొనసాగితే హృదయ రోగాలు, మధుమేహం, ఆటో ఇమ్యూన్ వ్యాధులు, క్యాన్సర్ వంటి తీవ్రమైన సమస్యలకు దారితీసే అవకాశం ఉంటుంది. అదే విధంగా ముఖంపై వచ్చే ఇన్ఫ్లమేషన్ వల్ల ఎర్రబడటం, వాపు, పఫ్నెస్ వంటి లక్షణాలు కనిపించి రూపాన్ని ప్రభావితం చేస్తాయి. ముఖంపై ఇన్ఫ్లమేషన్ ఎక్కువకాలం కొనసాగితే ఇన్ఫ్లమేజింగ్ అనే పరిస్థితి ఏర్పడుతుంది. దీని వల్ల కొల్లాజెన్, ఎలాస్టిన్ వంటి ముఖ్యమైన ప్రోటీన్లు దెబ్బతిని చర్మం ముందుగానే ముడతలు పడటం, వదులుగా మారటం, చర్మ రంగు అసమానంగా మారటం జరుగుతుంది. మొటిమలు, రోజేసియా, ఎగ్జిమా, సోరియాసిస్ వంటి చర్మ సమస్యలు కూడా ఇన్ఫ్లమేషన్తో సంబంధం కలిగి ఉంటాయి.
ఈ పరిస్థితులు చర్మాన్ని ఎర్రగా, ఉబ్బుగా చేసి నిస్సత్తువగా కనిపించేలా చేస్తాయి. అలాగే ఇన్ఫ్లమేటరీ స్పందనల వల్ల కళ్ల చుట్టూ నీరు నిల్వ అవడంతో ముఖం అలసటగా కనిపిస్తుంది. ఇన్ఫ్లమేషన్ నుండి తక్షణ ఉపశమనం కోసం కొన్ని సులభమైన మార్గాలు ఉన్నాయి. చల్లని కంప్రెస్ ఉపయోగించడం వల్ల రక్తనాళాలు కుంచించుకుని వాపు తగ్గుతుంది. మంచులో ముంచిన వస్త్రం, చల్లని స్పూన్ లేదా చిల్ మాస్క్ను 10-15 నిమిషాలు పెట్టుకోవచ్చు. నిద్రపోతున్నప్పుడు తలను కొంచెం ఎత్తుగా ఉంచితే రాత్రివేళ ముఖంలో ద్రవం నిల్వ కాకుండా ఉంటుంది. అలాగే మృదువైన లింఫాటిక్ మసాజ్ చేయడం ద్వారా అదనపు ద్రవం బయటకు వెళ్లేందుకు సహాయపడుతుంది.
ఆహారం, జీవనశైలి మార్పులు కూడా ఇన్ఫ్లమేషన్ ను తగ్గించడంలో కీలకంగా పని చేస్తాయి. యాంటీ ఆక్సిడెంట్లు, ఒమెగా-3 ఫ్యాటీ ఆమ్లాలు ఉన్న ఆహారం తీసుకోవడం మంచిది. పండ్లు, కూరగాయలు, నట్స్, గింజలు, చేపలు, సంపూర్ణ ధాన్యాలను ఆహారంలో చేర్చుకోవాలి. ప్రాసెస్ చేసిన ఆహారం, చక్కెర, ట్రాన్స్ ఫ్యాట్స్ తగ్గించడం అవసరం. రోజుకు కనీసం 8 గ్లాసుల నీరు తాగడం ద్వారా శరీరంలోని విషాలు బయటకు వెళ్లి చర్మ ఆరోగ్యం మెరుగుపడుతుంది. మానసిక ఒత్తిడి కూడా ఇన్ఫ్లమేషన్ను పెంచుతుంది. అందువల్ల ధ్యానం, యోగా, లోతైన శ్వాసాభ్యాసాలు వంటి పద్ధతులను పాటించడం ద్వారా ఒత్తిడిని నియంత్రించవచ్చు. ప్రతిరోజూ 7-9 గంటల నాణ్యమైన నిద్ర తీసుకోవడం శరీరానికి విశ్రాంతి ఇచ్చి ఇన్ఫ్లమేషన్ ను తగ్గించడంలో సహాయపడుతుంది.
అంతేకాకుండా చర్మ సంరక్షణలో కూడా జాగ్రత్తలు అవసరం. గట్టి సబ్బులు లేదా చర్మాన్ని ఇరిటేట్ చేసే ఉత్పత్తులు వాడకూడదు. అలొవెరా, కామొమైల్, గ్రీన్ టీ వంటి సాంత్వన కలిగించే పదార్థాలు ఉన్న ఉత్పత్తులను ఎంచుకోవాలి. అలాగే నియమిత వ్యాయామం చేయడం ద్వారా రక్తప్రసరణ మెరుగై శరీరంలో ఇన్ఫ్లమేషన్ తగ్గుతుంది. మద్యం, ధూమపానం వంటి అలవాట్లు చర్మానికి హానికరమైనవిగా మారుతాయి. వీటిని తగ్గించడం లేదా పూర్తిగా మానేయడం వల్ల చర్మం ఆరోగ్యంగా మారుతుంది. పసుపులో ఉండే కర్కుమిన్, ఒమెగా-3 ఫ్యాటీ ఆమ్లాలు, ప్రోబయోటిక్స్ వంటి పదార్థాలు కూడా ఇన్ఫ్లమేషన్ను తగ్గించడంలో సహాయపడతాయి. ఈ మార్పులను పాటించడం ద్వారా శరీరంలో, ముఖంలో ఇన్ఫ్లమేషన్ను నియంత్రించి చర్మాన్ని ఆరోగ్యంగా ఉంచుకోవచ్చు. అయితే సమస్యలు ఎక్కువకాలం కొనసాగితే వైద్యుడిని లేదా చర్మ నిపుణుడిని సంప్రదించడం మంచిది.
