Lungs | ఢిల్లీలో యువ‌త ఊపిరితిత్తుల‌పైనా న‌ల్ల‌ని మ‌చ్చ‌లు.. హెచ్చ‌రిస్తున్న వైద్య నిపుణులు..

ఢిల్లీలో గులాబీ రంగులో ఉండే ఆరోగ్యకరమైన ఊపిరితిత్తులను చూడడ‌మే అరుదుగా మారిపోయింది. ఇటీవల కజకిస్థాన్‌కు చెందిన 14 ఏళ్ల బాలికకు శస్త్రచికిత్స చేస్తున్న సమయంలో ఆమె ఊపిరితిత్తులు గులాబీ రంగులో కనిపించడంతో ఆపరేషన్‌ థియేటర్‌లో వైద్యులు ఆశ్చర్యానికి గురయ్యారు.

Lungs | ఢిల్లీలో గులాబీ రంగులో ఉండే ఆరోగ్యకరమైన ఊపిరితిత్తులను చూడడ‌మే అరుదుగా మారిపోయింది. ఇటీవల కజకిస్థాన్‌కు చెందిన 14 ఏళ్ల బాలికకు శస్త్రచికిత్స చేస్తున్న సమయంలో ఆమె ఊపిరితిత్తులు గులాబీ రంగులో కనిపించడంతో ఆపరేషన్‌ థియేటర్‌లో వైద్యులు ఆశ్చర్యానికి గురయ్యారు. గులాబీ రంగు ఊపిరితిత్తులు.. అంటూ సంభ్రమాశ్చర్యాలు వ్యక్తం చేశారు. ఢిల్లీ ఎన్‌సీఆర్‌ ప్రాంతంలో సాధారణంగా ఊపిరితిత్తులపై నల్లని కాలుష్యపు మచ్చలు కనిపించడానికి వైద్యులు అలవాటు పడిపోయారు. అందుకే ఆరోగ్యకరమైన గులాబీ రంగు ఊపిరితిత్తులు కనిపించడం ఇప్పుడు అరుదైన విషయంగా మారింది.

న‌మూనాల‌ను చూపించిన వైద్యులు..

ఈ విషయాన్ని వివరించేందుకు కొన్ని ఊపిరితిత్తుల నమూనాలను కూడా చూపించారు. ఢిల్లీకి చెందిన ఒక టీనేజర్ ఊపిరితిత్తులపై అప్పటికే స్పష్టంగా నల్లని కాలుష్యపు మచ్చలు కనిపించాయి. ఢిల్లీలో నివసించే, ఎప్పుడూ ధూమపానం చేయని పెద్దవారి ఊపిరితిత్తుల్లోనూ గణనీయమైన స్థాయిలో నల్లని మచ్చలు ఉన్నాయి. పుట్టినప్పుడు మన ఊపిరితిత్తులు స్వచ్ఛమైన గులాబీ రంగులో ఉంటాయి. కానీ మనం పీల్చే విషపూరిత పదార్థాల కారణంగా వాటిపై నల్లని మచ్చలు ఏర్పడుతున్నాయి. ముఖ్యంగా టీనేజర్ల ఊపిరితిత్తుల్లో కూడా కాలుష్యం వల్ల కలిగిన నష్టం కనిపిస్తుండడం ఆందోళన కలిగిస్తోంది.

చిన్న వ‌య‌సుల వారికి కూడా స‌మ‌స్య‌లు..

కాలుష్యం వల్ల ఊపిరితిత్తులు దెబ్బతినడం కేవలం ధూమపానం చేసేవారికి లేదా వృద్ధులకే పరిమితమనే భావన తప్పు. చిన్న వయసు నుంచే కలుషిత గాలిని పీల్చడం వల్ల దాని ప్రభావం శరీరంపై క్రమంగా పేరుకుపోతుంది. మరోవైపు యువతలోనూ, ఎప్పుడూ ధూమపానం చేయని మహిళల్లోనూ ఊపిరితిత్తుల క్యాన్సర్ కేసులు పెరుగుతున్నట్లు వైద్యులు చెబుతున్నారు. గతంలో 50 నుంచి 60 ఏళ్ల మధ్య వయసు వారిలో ఎక్కువగా కనిపించే ఈ వ్యాధి, ప్రస్తుతం 30 ఏళ్ల చివరి దశలో ఉన్నవారు, 40 ఏళ్ల వయసు వారిలోనూ ఎక్కువగా కనిపిస్తోంది.

ధూమ‌పానం చేయ‌క‌పోయినా..

ఊపిరితిత్తుల క్యాన్సర్‌తో బాధపడుతున్న రోగుల్లో 50 శాతానికి పైగా ధూమపానం చేయని వారే ఉంటుండగా, దాదాపు 40 శాతం మంది మహిళలు ఉన్నట్లు వైద్యులు వెల్లడిస్తున్నారు. గులాబీ రంగులో ఉండాల్సిన ఊపిరితిత్తులు ఆపరేషన్‌ థియేటర్‌లో వైద్యులకు ఆశ్చర్యం కలిగించే స్థాయికి చేరుకోవడం మనం పీల్చే గాలి ఎంతగా కలుషితమవుతోందో తెలియజేస్తోంది. వాయు కాలుష్యం ప్రభావం చిన్న వయసు నుంచే మొదలవుతున్న నేపథ్యంలో స్వచ్ఛమైన గాలి ప్రాధాన్యాన్ని గుర్తించాల్సిన అవసరం ఉందని ఈ ఘటన మరోసారి గుర్తుచేస్తోంది.