Itllu Arjuna | అనీష్‌ ‘ఇట్లు అర్జున’ రివ్యూ.. మాటల్లేని ప్రేమ.. మాస్ యాక్షన్ ప్రయాణం!

Itllu Arjuna | టాలీవుడ్ ప్రేక్షకులను ఎప్పుడూ కొత్తదనంతో అలరించేందుకు వచ్చే సినిమాల్లో ‘ఇట్లు అర్జున’ ఒకటి. యువ హీరో అనీష్‌ను పరిచయం చేస్తూ తెరకెక్కిన ఈ చిత్రానికి మహేష్ ఉప్పల దర్శకత్వం వహించారు.

టాలీవుడ్ ప్రేక్షకులను ఎప్పుడూ కొత్తదనంతో అలరించేందుకు వచ్చే సినిమాల్లో ‘ఇట్లు అర్జున’ ఒకటి. యువ హీరో అనీష్‌ను పరిచయం చేస్తూ తెరకెక్కిన ఈ చిత్రానికి మహేష్ ఉప్పల దర్శకత్వం వహించారు. అగ్ర కథానాయకుడు అక్కినేని నాగార్జున సమర్పణలో, టాలెంట్ క్రియేటర్ వెంకీ కుడుముల ఈ సినిమాను నిర్మించడం విశేషం. భారీ అంచనాల మధ్య నేడు ప్రేక్షకుల ముందుకు వచ్చిన ఈ చిత్రం ప్రేక్షకులను ఏ మేరకు మెప్పించిందో ఇప్పుడు చూద్దాం.

కథ
అర్జున్ (అనీష్) మాట్లాడలేని మూగ యువకుడు. అయితేనేం, ఎంతో చురుకైన వాడు. చిన్నతనం నుంచే కొన్ని కారణాల వల్ల దొంగతనాలు చేయడం అలవాటు చేసుకుంటాడు. మరోవైపు, అదే అపార్ట్‌మెంట్‌లో ఉండే కీర్తి (అనస్వ‌ర రాజ‌న్) అంటే అర్జున్‌కు ప్రాణం. ఆమెను ఒక్కసారైనా హ్యాండ్‌షేక్ చేసి తన మనసులోని ప్రేమను చెప్పాలని కలలు కంటుంటాడు. కానీ, కీర్తి జీవితం మాత్రం ఆమె తల్లి కఠిన నిబంధనల మధ్య గిరి గీసుకున్నట్టుగా సాగుతుంది. అనుకోకుండా ఆమె తల్లి దిల్లీ వెళ్లడంతో కీర్తికి మొదటిసారి స్వేచ్ఛ దొరుకుతుంది. కొత్త సంవత్సరం వేడుకల కోసం పబ్‌కి వెళ్లిన ఆమె, తన బావ కిశోర్ (వెన్నెల కిశోర్) కంట పడకుండా తిరిగే క్రమంలో అర్జున్‌ని కలుస్తుంది. ఈ ప్రయాణంలో అనుకోకుండా రూ. 1000 కోట్ల హవాలా డెడ్లీ మనీ, ఒక పెన్‌డ్రైవ్‌తో ముడిపడిన ప్రమాదకరమైన వివాదంలో ఇద్దరూ చిక్కుకుంటారు. మరోవైపు పెద్దన్న (ముఖేష్ రుషి) గ్యాంగ్, పోలీస్ అధికారి ఇరానీ (ఎలాంగో కుమరవేల్) వీళ్ల కోసం వేట మొదలుపెడతారు. అసలు ఆ వెయ్యి కోట్ల రహస్యం ఏమిటి? ఆ ప్రమాదం నుంచి అర్జున్, కీర్తి ఎలా బయటపడ్డారు? మాటలు రాని అర్జున్ తన ప్రేమను ఎలా వ్యక్తపరిచాడు? అన్నదే మిగతా అసలు కథ.

విశ్లేషణ
ఒక కొత్త హీరోని లాంచ్ చేసేటప్పుడు దర్శకులు సాధారణంగా రెగ్యులర్ కమర్షియల్ బాటను ఎంచుకుంటారు. కానీ దర్శకుడు మహేష్ ఉప్పల మొదటి సినిమా హీరో అయిన అనీష్ పాత్రకు ‘మాటలు రాకపోవడం’ అనే విభిన్నమైన వైకల్యాన్ని ఆపాదించి ఒక పెద్ద సాహసమే చేశారు. ఏ చిన్న పొరపాటు జరిగినా సినిమా పక్కదారి పట్టే ప్రమాదం ఉంది. అయితే ఆ బలహీనతనే కథకు ప్రధాన బలంచేస్తూ రాసుకున్న స్క్రీన్‌ప్లే ఈ సినిమాను నిలబెట్టింది. సినిమా ప్రారంభమే ఒక ఇంటెన్స్ క్రైమ్ థ్రిల్లర్‌లా రూ. 1000 కోట్ల హవాలా డెడ్లీ కాన్సెప్ట్‌తో వేగంగా సాగుతుంది. ఆ వెంటనే హీరో హీరోయిన్ల మధ్య సాగే క్యూట్ లవ్ ట్రాక్, వెన్నెల కిశోర్ కామెడీ టైమింగ్ సినిమాకు మంచి ఊపునిస్తాయి. ప్రథమార్థంలో వచ్చే ట్విస్టులు, హీరో బాల్యపు ఎపిసోడ్స్, ఇంటర్వెల్ బ్యాంగ్ సినిమాపై ఆసక్తిని బాగా పెంచుతాయి. ద్వితీయార్ధంలో కూడా అదే పెన్‌డ్రైవ్ టైమ్‌లైన్ చుట్టూ కథ నడిచినా, స్క్రీన్‌ప్లేలో వేగం తగ్గకుండా చూసుకున్నారు. క్లైమాక్స్ సన్నివేశాలు, హీరోయిన్ పాత్రలోని మెచ్యూరిటీ, మాటలు లేకుండానే హీరో తన భావాలను వ్యక్తపరిచిన తీరు ప్రేక్షకులను కంటతడి పెట్టిస్తాయి. రెగ్యులర్ రొటీన్ సినిమాలకు భిన్నంగా ఈ థ్రిల్లర్ లవ్ స్టోరీ మెప్పిస్తుంది.

నటీనటుల ప్రతిభ
అనీష్ తొలి సినిమా అయినప్పటికీ ఎక్కడా తడబడకుండా చాలా మెచ్యూర్డ్‌గా నటించాడు. మాటలు రాకపోయినా కేవలం కళ్లు, హావభావాలతోనే భావోద్వేగాలను పండించిన తీరు అద్భుతం. ముఖ్యంగా యాక్షన్ సీక్వెన్స్‌లు, డ్యాన్సుల్లో అనీష్ ఈజ్ చూపెట్టాడు. అనస్వ‌ర రాజ‌న్ తన అందంతో, సహజమైన నటనతో స్క్రీన్‌పై మాయ చేసింది. అనీష్‌తో ఆమె కెమిస్ట్రీ చాలా ఫ్రెష్‌గా వర్కౌట్ అయింది. వెన్నెల కిశోర్ తనదైన కామెడీ టైమింగ్‌తో థ్రిల్లర్ జోనర్లోకి నవ్వులను పంచాడు. ముఖేష్ రుషి, బ్రహ్మాజీ, ఎలాంగో కుమరవేల్ తమ పరిధి మేరకు పాత్రలకు పూర్తిన్యాయం చేశారు.

సాంకేతిక నిపుణులు
తమన్ అందించిన పాటలు వినసొంపుగా ఉండగా, బ్యాక్‌గ్రౌండ్ మ్యూజిక్ సినిమాను నెక్స్ట్ లెవెల్‌కు తీసుకెళ్లింది. థ్రిల్ సీన్లలో ఆయన ఇచ్చిన ఆర్జీవీ-మార్క్ బీజీఎం హైలైట్. రాజ మహదేవన్ విజువల్స్ ప్రతి ఫ్రేమ్‌ను రిచ్‌గా, కలర్‌ఫుల్‌గా చూపించాయి. వాట్ నెక్ట్స్ ఎంటర్‌టైన్‌మెంట్ బ్యానర్‌పై వెంకీ కుడుముల పాటించిన ప్రొడక్షన్ వాల్యూస్ ఉన్నత స్థాయిలో ఉన్నాయి.

ప్లస్ పాయింట్లు
కొత్తదూరణతో కూడిన కథాంశం, స్క్రీన్‌ప్లే ట్విస్టులు
అనీష్ మరియు అనస్వర రాజన్ ఆన్-స్క్రీన్ కెమిస్ట్రీ
తమన్ నేపథ్య సంగీతం మరియు విజువల్స్
వెన్నెల కిశోర్ కామెడీ ఎపిసోడ్స్

మైనస్ పాయింట్లు
సెకండాఫ్‌లో కొన్ని సన్నివేశాలు కొద్దిగా నెమ్మదించడం

చివరిగా కొత్తదనాన్ని కోరుకునే ప్రేక్షకులకు ‘ఇట్లు అర్జున’ ఒక మంచి దృశ్యకావ్యం. అనీష్ అరంగేట్రం అదిరింది!

రేటింగ్: 3.25 / 5