ఎప్పుడు పడితే అప్పుడు తినొద్దు

ఆహారం విషయంలో మీరు ఏం తింటున్నారనే దానిలాగే, ఎప్పుడు తింటున్నారనేది కూడా అతి ముఖ్యమైన అంశం. మీ శరీర సహజ స్పందనలకు అనుగుణంగా మీ తిండివేళలు అనుసంధానమై ఉంటాయి. దీన్ని క్రోనోన్యూట్రిషన్‌ అని పిలుస్తారు.

ఆహారం విషయంలో మీరు ఏం తింటున్నారనే దానిలాగే, ఎప్పుడు తింటున్నారనేది కూడా అతి ముఖ్యమైన అంశం. మీ శరీర సహజ స్పందనలకు అనుగుణంగా మీ తిండివేళలు అనుసంధానమై ఉంటాయి. దీన్ని క్రోనోన్యూట్రిషన్‌ అని పిలుస్తారు. దీన్ని గమనింపులో ఉంచుకుంటే ఆహారం ద్వారా దక్కే ప్రయోజనాలను గరిష్ఠం చేసుకోవచ్చని పోషకాహార నిపుణుల మాట. వివిధ షిఫ్టుల్లో పనులు, యాప్స్‌ ద్వారా ఎప్పుడంటే అప్పుడే ఆహారం లభ్యం కావడం వల్ల నిర్ణీత వేళల్లో తినే విధానం ఇప్పుడు బాగా తగ్గిపోయింది. ఈ నేపథ్యంలో క్రోనోన్యూట్రిషన్‌ గురించి తెలుసుకోవడం తప్పనిసరి.

• మీరు తినే వేళలకు అనుగుణంగానే మీ శరీరాల్లో హార్మోన్ల విడుదల, నిద్రించడం, మేల్కొనడం, జీవక్రియల క్రమబద్ధీకరణ ఆధారపడి ఉంటాయి.
• క్రోనోన్యూట్రిషన్‌లో ప్రధాన అంశం ఏంటంటే… ఉదయం వేళల్లో కార్బొహైడ్రేట్లు ఎక్కువగా తీసుకోవాలి. దీంతో రక్తంలో గ్లూకోజ్‌ స్థాయులు అదుపులో ఉంటాయి. అలా డయాబెటిస్‌ వచ్చే ప్రమాదం తగ్గుతుంది.
• అదే రాత్రి వేళల్లో కార్బొహైడ్రేట్లు ఎక్కువగా తీసుకుంటే శరీరంలో గ్లూకోజ్‌కు సంబంధించిన జీవక్రియల మీద ప్రభావం పడుతుంది. బరువు పెరగడానికి దారి తీస్తుంది.

క్రోనోన్యూట్రిషన్‌ ప్రయోజనాలు…

• ఉదయం వేళల్లో ఎక్కువ క్యాలరీలు తీసుకోవడం వల్ల బరువు అదుపులో ఉంటుంది.
• శరీర జీవ గడియారాన్ని అనుసరించి జీర్ణవ్యవస్థ పనిచేస్తుంది. వేళాపాళా లేకుండా తింటే ఆహారం జీర్ణమయ్యే క్రమం దెబ్బతింటుంది. జీర్ణ సమస్యలు వస్తాయి. సమయానికి తింటే జీర్ణక్రియ సాఫీగా సాగిపోతుంది.
• మీ తిండి వేళలు నిద్రా చక్రం మీద కూడా ప్రభావం చూపుతాయి. రాత్రిళ్లు అతిగా తింటే నిద్రలో అసౌకర్యం కలుగుతుంది. కాబట్టి నిద్రించడానికి రెండు మూడు గంటల ముందే తినేయాలి.

చిట్కాలు

• ప్రొటీన్లు, ఆరోగ్యకరమైన కొవ్వులు, ముతకధాన్యాలతో కూడిన ఉపాహారంతో రోజు ప్రారంభించాలి.
• నియమిత వేళల్లోనే తినాలి. రోజులో ఏదో ఒకసారి మాత్రమే సుష్టుగా భోజనం చేయాలి.
• ప్రతిరోజూ ఒకే భోజన సమయాలను కొనసాగించాలి.
• రాత్రి భోజనం తర్వాత సాధ్యమైనంత వరకు ఇక తినకూడదు. ఒకవేళ తినాలనుకుంటే తేలికగా అరిగిపోయే వాటిని ఎంచుకోవాలి. రాత్రివేళ మరీ ఆలస్యంగా తినకూడదు.
• మీ శరీర హెచ్చరికలకు అనుగుణంగా భోజన విధానాన్ని అలవాటు చేసుకోవాలి. వేళాపాళా లేకుండా తింటే అది మీ ఆరోగ్యం మీద దుష్ప్రభావం చూపుతుంది.

సరైన వేళలో…

నాణ్యమైన పోషకాహారం తీసుకోవడం మాత్రమే సరిపోదు.. దాన్ని సరైన వేళలో తీసుకోవాలనేది క్రోనోన్యూట్రిషన్‌ ప్రాథమిక సూత్రం. ఇలా చేస్తేనే మీ శరీర జీవక్రియలు, బరువు నిర్వహణ, జీర్ణవ్యవస్థ ఆరోగ్యం, నిద్ర అన్నీ సవ్యంగా సాగిపోతాయి.