Diabetes and food | నిశ్శబ్దంగా మనలో చేరి మనతోపాటే జీవితాంతం ఉండేదే డయాబెటిస్. ఈ వ్యాధి ఒక్కసారి మనలో కనిపించిందంటే.. దాన్ని ఒక పూర్తిగా నిరోధించడం కుదరదు. దాన్ని అదుపులో పెట్టుకోవడంపైనే దృష్టి సారించాల్సి ఉంటుంది. 30 ఏండ్ల లోపు వారు కూడా ఈ వ్యాధి బారిన పడటం మరింత ఆందోళన కలిగించే విషయం. రక్తంలో చక్కెరల స్థాయిలను తగ్గించుకునేందుకు మందులు మింగాల్సిన పరిస్థితులు ఉంటాయి. అయితే, కొన్ని ఆహారాలను నిత్యం తీసుకోవడం అలవాటు చేసుకుంటే షుగర్ను అదుపులో ఉచుకోవచ్చు.
చక్కెరను నియంత్రించుకోవడంలో వాడే మందుల వల్ల కొన్ని దుష్ప్రభావాలను ఎదుర్కోవాల్సి ఉంటుంది. మందులను తక్కువగా వాడుతూ కొన్ని రకాల ఆహార నియమాలను పాటించడం వల్ల షుగర్ను అదుపులో ఉంచుకోవచ్చు. తక్కువ సమయంలో తేలిగ్గా జీర్ణమై తొందరగా రక్తంలో కలిసే ఆహారాలన్నీ షుగర్ వ్యాధి వచ్చేలా చేస్తాయని మరిచిపోవద్దు. అందుకే నెమ్మదిగా జీర్ణమై రక్తంలో స్లోగా కలిసే ఆహారాలన్నీ చక్కెర స్థాయిలను అదుపులో ఉంచుతాయి.
వీటిని దూరం పెట్టాలి..
మనకు శక్తినిచ్చే ఆహారాలు 3 రకాలుగా ఉంటాయి. అవి పిండి పదార్థాలు, మాంసకృత్తులు, కొవ్వులు. ఒక గ్రాము పిండిపదార్థం, మాంసకృత్తులు తీసుకుంటే మనకు 4 క్యాలరీల శక్తి అందుతుంది. అదే ఒక గ్రాము కొవ్వు పదార్థాన్ని తీసుకుంటే 9 క్యాలరీలు అందుతాయి. వీటిలో పిండిపదార్థాలు త్వరగా జీర్ణమై రక్తంలో కలిసి చక్కెర స్థాయిలను వెంటనే పెంచుతాయి. అన్నింటికంటే ఆలస్యంగా జీర్ణమై రక్తంలో కలిసేవి కొవ్వు పదార్థాలు. పిండి పదార్థాలైన అన్నం, ఇడ్లీ, ఉప్మా, తెల్లటి రవ్వలు, మైదా పిండి, ఉప్పుడు రవ్వలను దూరం పెట్టడం ఎంతో ఉత్తమం.
వీటిని దగ్గరికి తీసుకోవాలి..
మాంసకృత్తులు, కొవ్వులు కొంత ఆలస్యంగా జీర్ణమవుతాయి. దీంతో చక్కెర నెమ్మదిగా తయారై రక్తంలో కలుస్తుంది. ఇలా ఆలస్యంగా జీర్ణమై రక్తంలో కలియడం వల్ల చక్కెర స్థాయిలు పెరగవు. అందుకని కొవ్వులు, మాంసకృత్తులు కలిగి ఉండే పల్లీలు, నువ్వులు, పచ్చి కొబ్బరి, పుచ్చకాయ గింజలు, గుమ్మడి గింజలు, బాదం పప్పులు, వాల్నట్, పిస్తా వంటివి ఎక్కువగా తింటూ ఉండాలి. మధ్యాహ్నం వేళ అన్నం తగ్గించి పుల్కా, జొన్న రొట్టే, రాగి రొట్టే తినడం చాలా మంచిది.
చివరగా..
నిత్యం తినే ఆహారంలో ఫైబర్, ప్రొటీన్లు, యాంటీ ఆక్సిడెంట్లు ఎక్కువగా ఉండేలా చూసుకోవాలి. బీన్స్, గింజలు, విత్తనాలు లేదా టోఫు, చేపలు, చికెన్ , కోడి గుడ్లు తినడం చాలా మంచిది. బ్లాక్ వీట్, బార్లీ, ఓట్స్, క్వినోవా, రాగి వంటి తృణధాన్యాలను తీసుకోవటం ఉపయుక్తకరం. బచ్చలికూర, పాలకూర, ఉసిరి ఆకులు వంటి ఆకుకూరల్లో కార్బోహైడ్రేట్లు, క్యాలరీలు తక్కువగా ఉంటాయి. యాపిల్, బెర్రీలు , పియర్ వంటి పండ్లలో ఫైబర్ పుష్కలంగా ఉండి చక్కెర స్థాయిలను తగ్గించడంలో సహాయపడతాయి.