యూరిక్‌ యాసిడ్‌కు పండ్లతో చెక్‌

ప్రస్తుతం చాలామందిలో యూరిక్‌ యాసిడ్‌ అనేది ఓ సాధారణ అనారోగ్యంగా మారిపోయింది. ఒకప్పుడు పెద్దల్లో మాత్రమే కనిపించే ఈ సమస్య.. ఇప్పుడు యువతనూ ఇబ్బంది పెడుతున్నది.

ప్రస్తుతం చాలామందిలో యూరిక్‌ యాసిడ్‌ అనేది ఓ సాధారణ అనారోగ్యంగా మారిపోయింది. ఒకప్పుడు పెద్దల్లో మాత్రమే కనిపించే ఈ సమస్య.. ఇప్పుడు యువతనూ ఇబ్బంది పెడుతున్నది. అయితే, కొన్ని పండ్లను ఆహారంలో భాగం చేసుకుంటే.. యూరిక్‌ యాసిడ్‌ సమస్యకు ఇట్టే చెక్‌ పడుతుంది. శరీరం డిటాక్స్‌ అవుతుంది. అలాంటి పండ్ల జాబితాలోకి వెళ్తే..

దోసకాయలు: 90% కంటే ఎక్కువ నీటితో నిండి ఉండే దోసకాయలను.. పరిపూర్ణ మూత్రవిసర్జన ఆహారంగా చెబుతుంటారు. ఇవి మూత్ర విసర్జనను పెంచడం ద్వారా.. యూరిక్‌ యాసిడ్‌ను బయటికి పంపడంలో సాయపడతాయి. దోసకాయలోని ఆల్కలిన్‌ గుణాలు.. శరీరంలోని యూరిక్‌ యాసిడ్‌ను తటస్థీకరించడంలో సమర్థంగా పనిచేస్తాయి.

పుచ్చకాయ: నీరు, పొటాషియంతో నిండిన హైడ్రేటింగ్‌ పండు.. పుచ్చకాయ. ఇది యూరిక్‌ యాసిడ్‌ను పలుచన చేసి.. మూత్రం ద్వారా బయటికి పంపించేస్తుంది. ఇక పుచ్చకాయలోని సుగుణాలు.. మూత్రపిండాల పనితీరుకు మద్దతునిస్తాయి.

బొప్పాయి: జీర్ణక్రియకు ఉపశమనం కలిగించడంతోపాటు యూరిక్‌ యాసిడ్‌ స్థాయులను తగ్గించడంలో బొప్పాయి కీలక పాత్ర పోషిస్తుంది. దీనిలోని పాపైన్‌ అనే ఎంజైమ్‌.. కాలేయంతోపాటు మూత్రపిండాల పనితీరును మెరుగుపరుస్తాయి.

బెర్రీ పండ్లు: యాంటి ఆక్సిడెంట్లతో నిండిన బెర్రీ పండ్లలో.. విటమిన్‌ సి, పాలీఫెనాల్స్‌ కూడా అధికమే! ఇవి శరీరంలో పేరుకుపోయిన యూరిక్‌ యాసిడ్‌ను తగ్గించి.. టాక్సిన్స్‌ను బయటికి పంపేస్తాయి. ఉదయపు బ్రేక్‌ఫాస్ట్‌లో యోగర్ట్‌తో కలిపి బెర్రీ పండ్లను తీసుకుంటే.. అద్భుతమైన ప్రయోజనాలు అందుతాయి.

సిట్రస్‌ పండ్లు: నిమ్మకాయ, ఆరెంజ్‌, బత్తాయి లాంటి సిట్రస్‌ పండ్లలో విటమిన్‌ సి పుష్కలంగా లభిస్తుంది. యూరిక్‌ యాసిడ్‌ స్థాయులను నియంత్రణలో ఉంచడంలో విటమిన్‌ సి సమర్థంగా పనిచేస్తుంది. కిడ్నీల పనితీరునూ మెరుగుపరుస్తుంది. ఇది శరీర ఆల్కలైజ్‌కు సహాయపడి.. ఎసిడిటీని తగ్గిస్తుంది. ప్రతిరోజూ నిమ్మకాయ రసం తాగడాన్ని అలవాటుగా మార్చుకుంటే.. మంచి ఫలితం కనిపిస్తుంది.

చెర్రీ పండ్లు: ఎర్రగా, చిన్నగా ఉండే చెర్రీలలో.. ఆంథోనిసైనిన్స్‌, యాంటి ఆక్సిడెంట్లు అధికంగా ఉంటాయి. ఇవి శరీరంలో మంట, నొప్పుల సమస్యను తగ్గిస్తాయి. యూరిక్‌ యాసిడ్‌ స్థాయులను సమతుల్యం చేయడంలోనూ చెర్రీ పండ్లు ముందుంటాయి.