Visit:
Tape Worms | వర్షాకాలం వేడి నుంచి ఉపశమనం కలిగించినప్పటికీ, ఇదే సమయంలో అనేక రకాల ఇన్ఫెక్షన్ల ప్రమాదం కూడా పెరుగుతుంది. అధిక తేమ, నీరు నిల్వ ఉండటం, కలుషిత తాగునీరు, పరిశుభ్రత లోపించడం వంటి కారణాలతో బ్యాక్టీరియా, వైరస్లతో పాటు పరాన్నజీవులు కూడా వేగంగా వ్యాపిస్తాయి. ముఖ్యంగా టేప్వార్మ్ (పేగు నులిపురుగు) ఇన్ఫెక్షన్లు ఈ కాలంలో ఎక్కువగా కనిపించే అవకాశం ఉంటుందని ఆరోగ్య నిపుణులు హెచ్చరిస్తున్నారు. కలుషిత ఆహారం లేదా తాగునీరు తీసుకోవడం, సరిగా ఉడకని మాంసాహారం తినడం, అపరిశుభ్రంగా తయారుచేసిన ఆహారం తీసుకోవడం వల్ల టేప్వార్మ్ ఇన్ఫెక్షన్లు వచ్చే ప్రమాదం ఎక్కువగా ఉంటుంది. చాలా సందర్భాల్లో ఈ ఇన్ఫెక్షన్ స్వల్ప లక్షణాలతోనే ఉంటుంది. అయితే నిర్లక్ష్యం చేస్తే తీవ్రమైన ఆరోగ్య సమస్యలకు దారితీసే అవకాశం ఉంటుందని నిపుణులు చెబుతున్నారు. సరైన వైద్యుల సూచనతో మాత్రమే డీవార్మింగ్ మందులు తీసుకోవాలని సూచిస్తున్నారు.
వర్షాకాలంలో భారీ వర్షాల కారణంగా మురుగునీరు తాగునీటి వనరుల్లో కలిసే ప్రమాదం ఉంటుంది. వరదల వల్ల ఆహారం కూడా కలుషితం అవుతుంది. పరిశుభ్రత సరిగా లేని ప్రాంతాల్లో తయారయ్యే ఆహారం, వీధి ఆహారం తినడం వల్ల ఇన్ఫెక్షన్ ముప్పు మరింత పెరుగుతుంది. అలాగే సరిగా కడగని పండ్లు, కూరగాయలు, కలుషిత నీరు, సరిగా ఉడకని మాంసం లేదా చేపలు తినడం ద్వారా టేప్వార్మ్ లార్వా శరీరంలోకి ప్రవేశించి పేగుల్లో పెరిగే అవకాశం ఉంటుంది. టేప్వార్మ్లు పేగుల్లో నివసించే పరాన్నజీవులు. ఇవి కలుషిత ఆహారం లేదా నీటి ద్వారా శరీరంలోకి ప్రవేశించి పేగుల గోడలకు అంటుకుని, శరీరానికి అవసరమైన పోషకాలను గ్రహిస్తాయి. దీంతో క్రమంగా శరీరానికి పోషకాహార లోపం ఏర్పడే ప్రమాదం ఉంటుంది. కొందరిలో ఈ ఇన్ఫెక్షన్ నెలల తరబడి ఎలాంటి లక్షణాలు లేకుండానే కొనసాగుతుంది. అందువల్ల ప్రారంభ దశలో గుర్తించడం కొన్నిసార్లు కష్టమవుతుంది.
టేప్వార్మ్ ఇన్ఫెక్షన్ ఉన్నవారిలో కడుపునొప్పి లేదా అసౌకర్యం, వికారం, వాంతులు, విరేచనాలు లేదా మల విసర్జనలో మార్పులు, అలసట, బలహీనత, కారణం లేకుండా బరువు తగ్గడం, ఆకలి తగ్గడం, పోషకాల లోపం వంటి లక్షణాలు కనిపిస్తాయి. అయితే కొందరిలో ఎలాంటి లక్షణాలు లేకపోయినా ఇన్ఫెక్షన్ ఉండే అవకాశం ఉంటుంది. ముఖ్యంగా వర్షాకాలంలో జీర్ణకోశ సమస్యలు ఎక్కువకాలం కొనసాగితే వాటిని నిర్లక్ష్యం చేయకూడదని నిపుణులు సూచిస్తున్నారు. డీవార్మింగ్ మందులు పరాన్నజీవులను శరీరం నుంచి తొలగించేందుకు ప్రత్యేకంగా తయారైనవే. పేగు నులిపురుగుల ఇన్ఫెక్షన్లు ఎక్కువగా కనిపించే ప్రాంతాల్లో అవసరమైనప్పుడు వైద్యుల సూచన మేరకు డీవార్మింగ్ చేయించుకోవడం వల్ల ఇన్ఫెక్షన్ తీవ్రత తగ్గడంతోపాటు సంక్లిష్టతలను నివారించవచ్చు. దీనివల్ల శరీరం పోషకాలను సరిగా గ్రహించడంలో కూడా సహాయపడుతుంది.
అయితే జీర్ణ సంబంధిత ప్రతి సమస్య టేప్వార్మ్ వల్లే వస్తుందని భావించి స్వయంగా డీవార్మింగ్ మందులు వాడకూడదని నిపుణులు హెచ్చరిస్తున్నారు. వివిధ రకాల పరాన్నజీవులకు వేర్వేరు మందులు అవసరం అవుతాయి. తప్పుడు మందులు వాడటం వల్ల అసలు సమస్య గుర్తించడంలో ఆలస్యం కావడంతోపాటు చికిత్స కూడా ఆలస్యమయ్యే ప్రమాదం ఉంటుంది. లక్షణాలు తగ్గకపోతే లేదా మరింత తీవ్రమైతే వెంటనే వైద్యులను సంప్రదించడం అవసరం. టేప్వార్మ్ ఇన్ఫెక్షన్ ఉందో లేదో నిర్ధారించేందుకు వైద్యులు మల పరీక్ష (స్టూల్ ఎగ్జామినేషన్) లేదా ఇతర అవసరమైన పరీక్షలు సూచిస్తారు. వ్యాధిని నిర్ధారించిన తర్వాత సరైన మందులు, సరైన మోతాదులో తీసుకోవడం ద్వారా త్వరగా కోలుకునే అవకాశం ఉంటుంది. అలాగే దీర్ఘకాలిక సమస్యలను కూడా నివారించవచ్చు.
వర్షాకాలంలో టేప్వార్మ్ ఇన్ఫెక్షన్ నుంచి రక్షణ పొందాలంటే భోజనం చేసే ముందు, మరుగుదొడ్డి ఉపయోగించిన తర్వాత చేతులను సబ్బుతో శుభ్రంగా కడుక్కోవాలి. ఎల్లప్పుడూ పరిశుభ్రమైన తాగునీరు మాత్రమే తాగాలి. పండ్లు, కూరగాయలను బాగా కడిగి తినాలి. మాంసం, చేపలను పూర్తిగా ఉడికించిన తర్వాత మాత్రమే తీసుకోవాలి. అపరిశుభ్రంగా తయారైన ఆహారానికి దూరంగా ఉండాలి. ఇంటి పరిసరాల్లో పరిశుభ్రత పాటించడం కూడా చాలా ముఖ్యమని నిపుణులు సూచిస్తున్నారు. డీవార్మింగ్ ఒక్కటే టేప్వార్మ్ ఇన్ఫెక్షన్కు పూర్తి పరిష్కారం కాదని, వ్యక్తిగత పరిశుభ్రత, సురక్షితమైన ఆహారం, స్వచ్ఛమైన తాగునీరు, అవసరమైనప్పుడు వెంటనే వైద్యులను సంప్రదించడం వంటి అలవాట్లు కూడా అంతే ముఖ్యమని ఆరోగ్య నిపుణులు పేర్కొంటున్నారు. ఈ జాగ్రత్తలు పాటించడం ద్వారా వర్షాకాలంలో పరాన్నజీవుల ఇన్ఫెక్షన్ల నుంచి కుటుంబాన్ని కాపాడుకోవచ్చు.
