డయాబెటిస్ అదుపులో లేకపోతే గుండె జబ్బుల బారినపడే ప్రమాదం ఎక్కువట. గుండెను ఆరోగ్యంగా ఉంచుకోవాలంటే రక్తంలో చక్కెర స్థాయిలను అదుపులో పెట్టుకోవడం అత్యంత ముఖ్యమట. డయాబెటిస్ లేని వారితో పోల్చితే డయాబెటిస్ ఉన్న వారిలో గుండె జబ్బులు వచ్చే ప్రమాదం రెండింతలు ఎక్కువని పలు పరిశోధనలు కూడా తేల్చాయి. కాబట్టి మన గుండెను కాపాడుకోవాలంటే షుగర్ వ్యాధిని అదుపులో పెట్టడం చాలా ముఖ్యం. ఈ నేపథ్యంలో షుగర్ను అదుపు చేసే కొన్ని చిట్కాల గురించి ఇప్పుడు తెలుసుకుందాం..
1. ఆరోగ్యకరమైన డైట్
డయాబెటిస్ వ్యాధి ఉన్నవారు తాము తీసుకోవాల్సిన, తీసుకోగూడని ఆహారాలను గురించి తెలుసుకోవడం చాలా ముఖ్యం. ఫ్రైడ్ ఫుడ్స్, షుగర్ స్థాయిలు అధికంగా ఉండే ఫుడ్ ఐటమ్స్, ప్రాసెస్ చేసిన ఆహార పదార్థాలను తీసుకోకపోవడం ఉత్తమం.
2. శారీరక వ్యాయామం
షుగర్ సమస్య ఉన్నవారు రోజుకు కనీసం 30 నిమిషాలకు తగ్గకుండా వ్యాయామం చేయడం అవసరం. యోగాసనాలు వేయడం, ఎక్సర్సైజ్లు చేయడం ద్వారా రక్తంలో షుగర్ స్థాయిలు కంట్రోల్లో ఉంటాయి.
3. నిపుణుల పర్యవేక్షణలో ఔషధాల వాడకం
డయాబెటిక్స్ సంబంధిత వైద్యుల పర్యవేక్షణలో ఔషధాలను సరిగ్గా వాడాలి. సమయపాలన, రెగ్యులారిటీ లేకుండా ఔషధాలను వినియోగించడంవల్ల సరైన ఫలితం ఉండదు.
4. బరువును అదుపులో ఉంచడం
షుగర్ పేషెంట్స్ కొందరు వెయిట్ లాస్ అయితే, మరి కొంతమంది వెయిట్ గెయిన్ అవుతుంటారు. ఇవి రెండూ ప్రమాదకరమే. కాబట్టి బరువును అదుపులో పెట్టుకోకపోతే గుండె జబ్బుల బారినపడే ప్రమాదం ఉన్నది.
5. కండ్లను కాపాడుకోవడం
డయాబెటిస్ అదుపు తప్పితే కంటి సమస్యలు వచ్చే ప్రమాదం కూడా ఉన్నది. కాబట్టి రెగ్యులర్గా కంటి పరీక్షలు చేయించుకోవాలి. లేదంటే కంటి లోపలి భాగాలు దెబ్బతిని చూపును కోల్పోయే ప్రమాదం ఉంది.
6. మూత్ర పరీక్షలు
షుగర్ పేషెంట్లు క్రమం తప్పకుండా మూత్ర పరీక్షలు చేయించుకోవాలి. దీనివల్ల ప్రొటీన్ లీకేజీ ఏమైనా ఉన్నదా, సీరమ్ క్రియాటినైన్ ఎంత ఉన్నది అనే వివరాలు తెలుస్తాయి. ఇలా తెలుసుకోవడం వల్ల భవిష్యత్తులో కిడ్నీ సమస్యలు రాకుండా జాగ్రత్త పడవచ్చు.