బౌరంపేటలో భారీ అగ్నిప్రమాదం.. ఐదు ట్రావెల్స్‌ బస్సులకు మంటలు.. మూడు బస్సులు దగ్ధం!

హైదరాబాద్‌ నగర శివార్లలోని దుండిగల్‌ పోలీస్‌ స్టేషన్‌ పరిధిలో భారీ అగ్నిప్రమాదం చోటుచేసుకుంది. బౌరంపేటలోని బొడ్రాయి సమీపంలో ఉన్న ప్రైవేట్‌ ట్రావెల్స్‌ బస్సుల పార్కింగ్‌ యార్డ్‌లో అర్ధరాత్రి ఒక్కసారిగా మంటలు చెలరేగాయి.

హైదరాబాద్‌ నగర శివార్లలోని దుండిగల్‌ పోలీస్‌ స్టేషన్‌ పరిధిలో భారీ అగ్నిప్రమాదం చోటుచేసుకుంది. బౌరంపేటలోని బొడ్రాయి సమీపంలో ఉన్న ప్రైవేట్‌ ట్రావెల్స్‌ బస్సుల పార్కింగ్‌ యార్డ్‌లో అర్ధరాత్రి ఒక్కసారిగా మంటలు చెలరేగాయి. ఈ ఘటనలో మూడు బస్సులు పూర్తిగా దగ్ధమవగా.. మరో రెండు బస్సులకు మంటలు వ్యాపించాయి. దీంతో స్థానికంగా తీవ్ర భయాందోళనలు నెలకొన్నాయి.

స్థానికుల సమాచారం ప్రకారం.. ప్రైవేట్‌ ట్రావెల్స్‌కు చెందిన పలు బస్సులను యార్డ్‌లో ఒకదాని పక్కన మరొకటి పార్కింగ్‌ చేసి ఉంచారు. ఈ క్రమంలో అకస్మాత్తుగా ఓ బస్సుకు మంటలు అంటుకున్నాయి. బస్సులన్నీ దగ్గరదగ్గరగా ఉండటంతో మంటలు వేగంగా పక్కనే ఉన్న వాహనాలకు వ్యాపించాయి. చూస్తుండగానే మూడు బస్సులు పూర్తిగా అగ్నికి ఆహుతయ్యాయి. మరో రెండు బస్సులకు కూడా మంటలు అంటుకున్నాయి.

సమాచారం అందుకున్న వెంటనే పోలీసులు, అగ్నిమాపక సిబ్బంది ఘటనాస్థలానికి చేరుకున్నారు. ఫైర్‌ సిబ్బంది మంటలను అదుపులోకి తెచ్చేందుకు తీవ్రంగా శ్రమించారు. ప్రమాదానికి విద్యుత్‌ షార్ట్‌ సర్క్యూట్‌ కారణమై ఉండవచ్చని పోలీసులు అనుమానిస్తున్నారు. అయితే, అగ్నిప్రమాదానికి అసలు కారణం ఏమిటన్నది ఇంకా తెలియాల్సి ఉంది. ఈ ఘటనలో భారీగా ఆస్తి నష్టం వాటిల్లినట్లు అంచనా వేస్తున్నారు. ప్రమాదంపై పోలీసులు దర్యాప్తు చేపట్టారు.

Bus Fire Accident