వక్ఫ్‌బిల్లుకు వాట్సాప్‌ వర్సిటీ వత్తాసు

‘ముస్లిం సమాజ హితం కోసం’ అనే అందమైన ముసుగు తొడిగి ‘వక్ఫ్‌ చట్టం- 1995’లోని ఇటీవల పార్లమెంట్‌ ఆమోదించిన సవరణలన్నీ ఏకపక్షంగా ఉన్నాయి. వక్ఫ్‌ ఆస్తుల నిర్వహణలో ముస్లింల పాత్ర తగ్గించి, ముస్లిమేతరులు ముఖ్యంగా, ప్రభుత్వ తాబేదార్ల జోక్యం పెంచి, తద్వారా లక్షల ఎకరాల వక్ఫ్‌ భూములు బడా వ్యాపారవేత్తలకు కట్టబెట్టడానికి మార్గం సుగమం చేసినట్టయ్యింది.

‘ముస్లిం సమాజ హితం కోసం’ అనే అందమైన ముసుగు తొడిగి ‘వక్ఫ్‌ చట్టం- 1995’లోని ఇటీవల పార్లమెంట్‌ ఆమోదించిన సవరణలన్నీ ఏకపక్షంగా ఉన్నాయి. వక్ఫ్‌ ఆస్తుల నిర్వహణలో ముస్లింల పాత్ర తగ్గించి, ముస్లిమేతరులు ముఖ్యంగా, ప్రభుత్వ తాబేదార్ల జోక్యం పెంచి, తద్వారా లక్షల ఎకరాల వక్ఫ్‌ భూములు బడా వ్యాపారవేత్తలకు కట్టబెట్టడానికి మార్గం సుగమం చేసినట్టయ్యింది. ఈ వక్ఫ్‌ సవరణలను పార్లమెంట్‌లో ప్రవేశపెట్టకముందే బీజేపీ తనదైన శైలిలో వాట్సాప్‌ యూనివర్సిటీ ద్వారా వక్ఫ్‌ ఆస్తులపై, వక్ఫ్‌బోర్డుపై తీవ్రమైన దుష్ప్రచారం చేసింది. ‘వక్ఫ్‌ బోర్డు’ అంటే జన బాహుళ్యంలో ఒక భూ మాఫియాగా, హిందువుల ఆస్తులను, దేశ ఆస్తులను కబళించే ఒక రాక్షస సంస్థగా చిత్రీకరించడంలో బీజేపీ కొంతమేర సఫలమైంది.

కేంద్రంలోని ప్రస్తుత ఎన్డీయే ప్రభుత్వానికి 1995 చట్టంలోని చాలా సెక్షన్లు నచ్చక వాటిని తొలగిస్తూ, సవరణలు చేస్తూ వక్ఫ్‌ సవరణ బిల్లు 2025 ప్రవేశపెట్టి తమ మద్దతుదారుల సహకారంతో, ముస్లిం ప్రజల, సంఘాల, విపక్షాల అభ్యంతరాలను తోసిపుచ్చి, అర్ధరాత్రి 3 గంటలకు ఆమోదించుకొని, నిన్న అమల్లోకి తీసుకువచ్చింది. అయి తే, వక్ఫ్‌ 1995 చట్టంలోని సవరణలు, తొలగింపులు, మార్పుచేర్పులపై ముస్లిం సమాజానికి ఉన్న అభ్యంతరాలను ఒకసారి పరిశీలిద్దాం.

• సెక్షన్‌ 3 ఆఫ్‌ వక్ఫ్‌ ఆక్ట్‌ 1995ను సవరించి sec. 3(i) (aa), sec. 3(i) (ca) చేర్చి ప్రస్తుతం ఉన్న వక్ఫ్‌ బోర్డులను విభజించి ‘ఆగాఖాని వక్ఫ్‌ బోర్డు’, ‘బొహారా’ల కోసం ప్రత్యేక వక్ఫ్‌ బోర్డులను ఏర్పాటు చేయడమన్నది ముస్లిం సమాజంలో చీలిక తేవడానికి ఉద్దేశించినది మాత్రమే.
• సెక్షన్‌ 3ను సవరించి sec. 3 (ix) (c)లో వితంతువులు, విడాకులు పొందినవారు, అనాథల పోషణ అని చేర్చడం ‘మనషాఏ వక్ఫ్‌’ నుంచి డీవియెట్‌ కావడమే అవుతుంది.
• సెక్షన్‌ (3)ను సవరించి ఇస్లాంను ఐదేండ్ల కింది నుంచి ఆచరిస్తున్న వ్యక్తి మాత్రమే తన ఆస్తిని వక్ఫ్‌ చేయగలరని చేర్చడం దేశ సెక్యులర్‌ స్ఫూర్తికి విరుద్ధమైనది. అంతేకాకుండా కొత్తగా ఎవరు కూడా తమ ఆస్తిని వక్ఫ్‌ చేయకుండా నివారించడానికి మాత్రమే ఉద్దేశించింది. చాలా సందర్భాల్లో గ్రామాల్లో ముస్లిమేతరులు కూడా వారు నమ్మిన దర్గాకు తమ ఆస్తిని దానం ఇచ్చారు. అంతేకాకుండా గ్రామాల్లోని భూస్వాములు అక్కడి పేద ముస్లింల అభ్యర్థన మేరకు ఖబ్రస్థాన్లకు, మజీద్‌లకు భూములు దానం ఇచ్చిన సందర్భాలెన్నో. ఒక వ్యక్తి తన ఆస్తిని ఎవరికి దానం చేయవచ్చో, చేయరాదో కూడా ప్రభుత్వం నిర్దేశించడం ఆ వ్యక్తి ప్రాథమిక హక్కులకు భంగం కలిగించడమే.
• సెక్షన్‌ (4) 1995వ చట్టం ప్రకారం ఆస్తి నిర్ధారణ కోసం రాష్ట్ర ప్రభుత్వం సర్వే కమిషనర్‌ను నియమించాలన్న నిబంధన తొలగించి జిల్లా కలెక్టర్‌కు అధికారాలు కట్టబెట్టారు. దీంతో వక్ఫ్‌ నిర్ధారణ ఆలస్యం చేయడంతో పాటు, వక్ఫ్‌ బోర్డుకు, ప్రభుత్వానికి వివాదం వచ్చినప్పుడు కలెక్టర్‌ ద్వారా ప్రభుత్వం అనుకూల నిర్ణయాలు తీసుకునే ఆస్కారం ఉంటుంది. అంతేకాదు, హిందూ ఎండోమెంట్‌ చట్టం సెక్షన్‌ 43 ప్రకారం ఎండోమెంట్‌ కమీషనర్‌కు హిందూ ఎండోమెంట్‌ రిజిష్టర్‌ చేసే అధికారం ఉటుంది. జిల్లా కలెక్టర్‌కు హిందూ ఎండోమెంట్‌ రిజిష్టర్‌ చేసే అధికారం ఉండదు. అదే ఒక వక్ఫ్‌ ఆస్తి రిజిస్ట్రేషన్‌ కోసం మాత్రమే వక్ఫ్‌ కమీషనర్‌ను తొలగించి జిల్లా కలెక్టర్‌కు అధికారం ఇవ్వడం ముస్లింల పట్ల వివక్షను ప్రదర్శించడమే.
• 1995వ చట్టం సెక్షన్‌ 6, 7 ప్రకారం వక్ఫ్‌ గెజిట్‌ ప్రచురణ అయిన తర్వాత ఆ ఆస్తిపై ఎవరికైనా అభ్యంతరం ఉంటే వారు ఏడాది లోపు వక్ఫ్‌ ట్రిబ్యునల్‌లో ఫిర్యాదు చేసే అవకాశం ఉన్నది. దాన్ని సవరించి ప్రస్తుత సవరణ బిల్లు ఫిర్యాదు కాలాన్ని 2 సంవత్సరాలకు పెంచడం వక్ఫ్‌ ఆస్తులపై వివాదాలను సృష్టించే అవకాశం ఇవ్వడమే.
• 1995వ చట్టం సెక్షన్‌ 14 ప్రకారం… రాష్ట్ర వక్ఫ్‌ బోర్డుకు ముస్లిం ఎమ్మెల్యే, ముస్లిం ఎంపీ, ముస్లిం ఎమ్మెల్సీ, ముతవల్లిలు, ముస్లిం అడ్వకేట్లతో ఎన్నిక నిర్వహించి వక్ఫ్‌ బోర్డు ఏర్పాటవుతుంది. అంతేకాదు, ప్రభుత్వం ఒక సున్నీ, ఒక షియా, ఒక ముస్లిం మహిళను రాష్ట్ర వక్ఫ్‌ బోర్డులో నామినేట్‌ చేస్తుంది. ప్రస్తుత సవరణల కారణంగా ఇద్దరు ముస్లిమేతరులను ప్రభుత్వం నామినేట్‌ చేసే అధికారం కట్టబెట్టడమన్నది ముస్లింల మతపరమైన అంశాల నిర్వహణలో ఇతరులను చొప్పించి, వారి స్వయంప్రతిపత్తిని దెబ్బతీయడమే.
• హిందూ దేవాలయాల్లో స్వీపర్‌ పోస్టులో అన్య మతస్థులు ఉండకూడదని వాదించే పార్టీ, రాష్ట్రస్థాయిలో 11 మందితో ఏర్పాట య్యే వక్ఫ్‌బోర్డులో ఏడుగురు, కేంద్రస్థాయి లో 22 మందితో ఏర్పాటయ్యే వక్ఫ్‌ కౌన్సిల్‌ లో 11 మంది ముస్లిమేతరులను ప్రభుత్వం నామినేట్‌ చేసే అవకాశాన్ని కల్పించడాన్ని సమర్థించుకుంటుండటం శోచనీయం.
• 1995 చట్టం సెక్షన్‌ 20 (A) ప్రకారం వక్ఫ్‌ బోర్డు సభ్యులు వక్ఫ్‌బోర్డు చైర్మన్‌పై అవిశ్వాస తీర్మానం ప్రవేశపెట్టి తొలగించే అధికారం ఉన్నది. కానీ, ప్రస్తుత సవరణలో ఆ సెక్షన్‌ 20(A)ను తొలగించడం ప్రజాస్వామ్య స్ఫూర్తికి విరుద్ధం. అంతేకాదు, ఒక్కసారి చైర్మన్‌ అయిన వ్యక్తి ఎన్ని అవకతవకలకు పాల్పడినా అతడిని తొలగించే అధికారం సభ్యులకు లేకుండా చేశారు.
• వక్ఫ్‌ చట్టం 1995 సెక్షన్‌ 23 ప్రకారం డిప్యూటీ సెక్రెటరీ హోదాకు తగ్గకుండా ఉన్న ముస్లిం వ్యక్తి మాత్రమే వక్ఫ్‌ బోర్డు చీఫ్‌ ఎగ్జిక్యూటివ్‌ ఆఫీసర్‌గా ఉండాలని నిర్దేశిస్తుంది. ప్రస్తుత సవరణల వల్ల ముస్లిమేతరులు కూడా సీఈవో అయ్యే అవకాశం కల్పించారు. హిందూ ఎండోమెంట్‌ యాక్ట్‌ సెక్షన్‌ 152 ప్రకారం హిందువులు మాత్రమే ఎండోమెంట్‌ డిపార్ట్‌మెంట్‌లో ఉద్యోగానికి అర్హులు. అంతేకాదు, వారు మతం మారితే వారికి ఉన్న ఎండోమెంట్‌ కమిషనర్‌, అసిస్టెంట్‌ కమిషనర్‌ తదితర పదవులు కోల్పోతారని కూడా స్పష్టంగా ఉన్నది. ముస్లిం వక్ఫ్‌ బోర్డులో ముస్లిమేతరులకు ఉన్నత పదవులు కట్టబెట్టడం అంటే కుట్రపూరితమే.
• వక్ఫ్‌ చట్టం-1995 సెక్షన్‌ 40 ప్రకారం… ఏదేని ఆస్తి వక్ఫ్‌దా, కాదా? అన్న వివాదం వచ్చినప్పుడు, ఆ విషయమై విచారణ జరిపి నిర్ణయం తీసుకునే అధికారం వక్ఫ్‌ బోర్డుకు ఉన్నది. వక్ఫ్‌బోర్డు నిర్ణయంపై ఎవరికైనా అభ్యంతరం ఉంటే వారు వక్ఫ్‌ ట్రిబ్యునల్‌ను ఆశ్రయించవచ్చు. వక్ఫ్‌ ట్రిబ్యునల్‌ తీర్పుపై కూడా అభ్యంతరం ఉంటే, హైకోర్టునూ ఆశ్రయించవచ్చు. కానీ, ఏ ఆస్తి అయినా వక్ఫ్‌బోర్డు తనదని పేర్కొంటే అది వక్ఫ్‌బోర్డుదే అవుతుందని, వక్ఫ్‌బోర్డు నిర్ణయాన్ని సవాలు చేసే అధికారం లేదని సెక్షన్‌ 40పై తీవ్ర దుష్ప్రచారం చేసి దాన్ని ప్రస్తుత సవరణలతో తొలగించారు. Wakf By User అంటే, ఏదైనా పురాతన మజీద్‌, దర్గా ఉంటే దానిని పరిశీలించి వాడకం వల్ల అది వక్ఫ్‌గా ప్రకటించే అధికారాన్ని తొలగించారు. అంతేకాదు, ప్రతి మజీద్‌కు దర్గాకు, ఖబ్రస్థాన్‌, వక్ఫ్‌ ఆస్తికి దస్తావేజులు కోరడం వల్ల వందల ఏండ్ల నుంచి నమాజ్‌ తదితర ముస్లిం మతపరమైన కార్యక్రమాలు నిర్వహిస్తూ వక్ఫ్‌ సంస్థల ఆధీనంలో ఉన్న ఆస్తులపై వివాదాలకు అవకాశం కల్పించారు.
• 1995వ చట్టం సెక్షన్‌ 52 ప్రకారం ఎవరైనా ‘వక్ఫ్‌ ఆస్తిని ఆక్రమిస్తే వారికి కఠిన కారాగార శిక్ష విధించవచ్చు’ అన్న పదాన్ని నూతన సవరణలో తొలగించడం వల్ల వక్ఫ్‌ ఆస్తుల ఆక్రమణదారులకు ఎర్ర తివాచీ పరచడమే అవుతుంది.
• 1995వ చట్టం సెక్షన్‌ 83 ప్రకారం… ముగ్గురు సభ్యులతో ఏర్పాటయ్యే వక్ఫ్‌ ట్రిబ్యునల్‌లో ఇస్లామిక్‌ చట్టం తెలిసిన ఒక వ్యక్తి ఉండటాన్ని తొలగించి ఇద్దరు వ్యక్తులతోనే వక్ఫ్‌ ట్రిబ్యునల్‌ ఏర్పాటు చేయాలని సర్వీసులో ఉన్న జిల్లా జడ్జి స్థానంలో రిటైర్డ్‌ జిల్లా జడ్జిని నియమించాలని సవరణ చేయడం వక్ఫ్‌ ట్రిబ్యునల్‌ను నిర్వీర్యం చేయడమే.
• సెక్షన్‌ 143 హిందూ ఎండోమెంట్‌ చట్టం, సెక్షన్‌ 52 ఆఫ్‌ బాంబే పబ్లిక్‌ ట్రస్ట్‌ యాక్ట్‌ సెక్షన్‌ 107, 108, 108 ఆఫ్‌ వక్ఫ్‌ చట్టం 1995 ప్రకారం ఏదేని హిందూ ఎండోమెంట్‌కు గానీ, వక్ఫ్‌కు గాని చెందిన ఆస్తి ఆక్రమణకు గురైతే ఆ ఆక్రమణను తొలగించడానికి లిమిటేషన్‌ చట్టం 1963 వర్తించదని పై (3) చట్టాలు చెప్తున్నాయి. కానీ, ప్రస్తుత సవరణ ద్వారా ఒక్క వక్ఫ్‌ చట్టంలోని సెక్షన్‌ 107, 108, 108 తొలగించడం వల్ల వక్ఫ్‌ ఆస్తుల ఆక్రమణదారులు లిమిటేషన్‌ యాక్ట్‌ 1963 ప్రకారం తమ కబ్జాను శాశ్వతపరుచుకొని, తద్వారా వక్ఫ్‌ ఆస్తులు అన్యాక్రాంతం కావడానికి పూర్తి అవకాశం కల్పించింది.
• సెక్షన్‌ 108బీని సవరించి వక్ఫ్‌ నిబంధనలను తయారుచేసే అధికారం రాష్ట్ర ప్రభుత్వాల నుంచి కేంద్రం గుంజుకోవడం కూడా దేశ ఫెడరల్‌ స్ఫూర్తికి విరుద్ధం.

(నేటి నుంచి వక్ఫ్‌ బిల్లు అమలు..)
మహ్మద్‌ జమీలొద్దీన్‌ అహ్మద్‌
86862 11556