ట్రంపిజానికి ఎదురుదెబ్బ

అమెరికా అధ్యక్షుడు డొనాల్డ్‌ ట్రంప్‌కు 2026 మధ్యావధి ఎన్నికల్లో గట్టి ఎదురుదెబ్బ తగిలింది. 2024 అధ్యక్ష ఎన్నికల్లో ఘన విజయం సాధించి, కాంగ్రెస్‌లోనూ రిపబ్లికన్ల ఆధిపత్యంతో దూకుడుగా వ్యవహరిస్తూ వస్తున్న ట్రంప్‌ ప్రయాణానికి రెండేండ్లకే అడ్డుకట్ట పడింది.

అమెరికా అధ్యక్షుడు డొనాల్డ్‌ ట్రంప్‌కు 2026 మధ్యావధి ఎన్నికల్లో గట్టి ఎదురుదెబ్బ తగిలింది. 2024 అధ్యక్ష ఎన్నికల్లో ఘన విజయం సాధించి, కాంగ్రెస్‌లోనూ రిపబ్లికన్ల ఆధిపత్యంతో దూకుడుగా వ్యవహరిస్తూ వస్తున్న ట్రంప్‌ ప్రయాణానికి రెండేండ్లకే అడ్డుకట్ట పడింది. ప్రతినిధుల సభలో డెమోక్రాట్లు 254 విజయం సాధించగా, రిపబ్లికన్లు 162 సీట్లకే పరిమితమయ్యారు. సెనేట్‌లో డెమోక్రాట్లు 54 మంది, రిపబ్లికన్లు 44 మంది గెలుపొందారు. ఇక ప్రతినిధుల సభతోపాటు సెనేట్‌లోనూ డెమోక్రాట్లు మెజారిటీ సాధించడం ఆ దేశ రాజకీయాల్లో కీలక మలుపు. ఇప్పటివరకు ట్రంప్‌ తీసుకున్న అనేక నిర్ణయాలకు రిపబ్లికన్‌ ఆధిక్యంలోని కాంగ్రెస్‌ పెద్దగా అడ్డంకులు సృష్టించలేదు. ఇకపై పరిస్థితి అలా నల్లేరు మీద నడకలా మాత్రం ఉండబోదు.

అయితే ఎన్నికల ఫలితాల తర్వాత ట్రంప్‌ చేసిన వ్యాఖ్యలు ప్రాధాన్యతను సంతరించుకున్నాయి. ఓటమిని హుందాగా అంగీకరించకుండా తాను పోటీలో చేయలేదు కాబట్టి, ఫలితాలు ఇలా ఉన్నాయని, పోటీలో ఉండి ఉంటే మరోలా ఉండేవన్నారు. ఇదంతా కూడా తన పరాజయాన్ని పలుచనే చేసి చూపించే ప్రయత్నమేనని స్పష్టంగా అర్థమవుతున్నది. అంతేకాకుండా డెమోక్రాట్లు తీసుకొచ్చే బిల్లులను వీటో చేస్తానంటూ హెచ్చరించడం ట్రంప్‌ తెంపరితనానికి తాజా తార్కాణం. ఇక్కడే చర్చ ఆసక్తికరంగా మారింది. ట్రంప్‌ చేతిలో ఇంకా వీటో అధికారం ఉన్నది. తనకు నచ్చని బిల్లులను తిరస్కరించవచ్చు. కానీ కాంగ్రెస్‌లో మూడింట రెండొంతుల మెజారిటీతో ఆ బిల్లులను మళ్లీ ఆమోదిస్తే అధ్యక్షుడి వీటో కూడా పని చేయదు. ప్రస్తుతానికి డెమోక్రాట్లకు ఆ స్థాయి బలం లేదు. అయినప్పటికీ కాంగ్రెస్‌పై పట్టు కోల్పోవడం ట్రంప్‌కు చిన్న పరాభవం కాదు.

అగ్రరాజ్య మధ్యావది ఎన్నికలు అత్యంత ప్రతిష్టాత్మకమైనవి. తాజా ఫలితాలు ట్రంప్‌ వ్యక్తిగత రాజకీయ ప్రతిష్టకు మాత్రమే కాదు, ఆయన పాలనా విధానాలకూ ప్రజల నుంచి ఎదురైన ప్రశ్నలుగా చూడాలి. ద్రవ్యోల్బణం, జీవన వ్యయం, టారిఫ్‌ల విధింపు, ఇమ్మిగ్రేషన్‌ దాడులు, ఇరాన్‌ యుద్ధం వంటి అంశాలు ఓటర్ల నిర్ణయాన్ని ప్రభావితం చేశాయి. ఇప్పు డు అమెరికా కాంగ్రెస్‌లో అధ్యక్షుడికి అధికారం ఉంటుంది. కానీ దానికి హద్దులు ఉంటాయి. ట్రంప్‌కు ఇప్పుడు మిగిలింది రెండేండ్ల పదవీకాలం మాత్రమే. మిగిలిన ఈ కాలంలో గతం లో మాదిరిగా ఏకపక్షంగా నియంతృత్వ ధోరణిని అనుసరిస్తానంటే కుదరదు. ఉభయ సభ ల్లో సంఖ్యాబలంతో డెమోక్రాట్లు ముకుతాడు వేయగలరు. ప్రజల తీర్పు ట్రంప్‌కు రాజకీయ హెచ్చరిక మాత్రమే కాదు, ప్రజాస్వామిక హద్దులను దాటుతున్న పోకడలకు కొరడా దెబ్బ.

తాజా ఎన్నికల ఫలితాలు అమెరికాలోని పాలన, ప్రపంచ దేశాలపై ఎలాంటి ప్రభావం చూపుతాయనేది కూడా చర్చనీయాంశమే. ఇకపై ట్రంప్‌ ప్రతిపాదించే చట్టాలకు డెమోక్రాట్ల నుంచి ప్రతిఘటన ఎదురయ్యే అవకాశమున్నది. ప్రభుత్వ విధానాలపై విచారణలు, పరిపాలనా నిర్ణయాలపై ప్రశ్నలు ఎదుర్కోకతప్పదు. బడ్జెట్‌ కేటాయింపుల విషయంలోనూ అధ్యక్షుడికి రాజకీయ సవాళ్లు తలెత్తుతాయి. జనవరి నుంచి ప్రారంభం కానున్న కొత్త కాంగ్రెస్‌ ఇరాన్‌ యుద్ధం, సర్కార్‌ అవినీతి ఆరోపణలపై విచారణలు ప్రారంభిస్తుందని అమెరికా రాజకీయవర్గాల్లో సంకేతాలు వెలువడుతున్నాయి. సుప్రీంకోర్టు జడ్జిలు, మంత్రుల నియామకాలను కూడా డెమోక్రాట్లు అడ్డుకోవచ్చు. డెమోక్రాట్లు లీగల్‌ ఇమ్మిగ్రేషన్‌కు అనుకూలం.

కాబట్టి హఠాత్తుగా రూల్స్‌ మారుతాయనే భయం తగ్గుతుంది. గ్రీన్‌ కార్డు బ్యాక్‌లాగ్‌కు కూడా అవకాశాలు పెరుగుతాయి. కానీ వెంటనే పెద్ద పెద్ద సంస్కరణలు వస్తాయని మాత్రం అనుకోలేం. అయితే గియితే విద్యార్థులు, ఉద్యోగులకు ఊరట కలుగవచ్చు. టెక్సాస్‌, జార్జియా, ఓహియో వంటి తెలుగు విద్యార్థులు ఎక్కువగా ఉన్న రాష్ర్టాల్లో డెమోక్రాట్‌ గవర్నర్లు గెలుపొందడం మంచి పరిణామం. కానీ ప్రత్యక్షంగా గానీ, ఆన్‌లైన్‌ విద్వేష వ్యక్తీకరణ పట్ల గానీ మనవాళ్లు సంయమనం పాటించాల్సిన అవసరమున్నది. అమెరికాలోని తాజా రాజకీయ పరిణామాలతో టారిఫ్‌లు తగ్గి, భారత్‌తో వాణిజ్యం మళ్లీ కుదుటపడితే ఇండియన్‌ ఐటీ, ఫార్మా కంపెనీలకు మేలు జరుగుతుందని ఆశించవచ్చు. గెలిచిన వారిలో భారత సంతతికి చెందిన ప్రముఖులు కూడా ఉండటం విశేషం. మొత్తంగా ఎన్ని అడ్డదారులు తొక్కి అయినా అధికారం దక్కించుకోవాలని అనుకునేవాళ్లకు, నియంతలుగా తామే కొనసాగుతామని విర్రవీగేవాళ్లకు ట్రంప్‌కు తగిలిన ప్రజాస్వామిక దెబ్బ కచ్చితంగా ఒక గుణపాఠం అనే చెప్పాలి.