అభినవ రూపశిల్పి

అతడు స్వప్నించడమే కాదు విజయానంద స్వప్న సౌధాల అభినవ రూపశిల్పి తడారిన తెలంగాణ తల్లిని స్ఫటిక జలాలతో అభిషేకించిన అపర భగీరథుడు

February 17, 2025 / 02:31 AM IST

అతడు
స్వప్నించడమే కాదు
విజయానంద స్వప్న సౌధాల
అభినవ రూపశిల్పి

తడారిన తెలంగాణ తల్లిని
స్ఫటిక జలాలతో అభిషేకించిన
అపర భగీరథుడు

కరెంట్‌ స్తంభాలకు వేలాడుతున్న
అన్నదాతల బతుకు
బట్టలు కరెంట్‌ తీగల మీద
తగలబడి పోతుంటే
కరెంట్‌ను పర్మినెంట్‌ వరంగా మార్చి
ఆరిపోని ఆశాదీపాలను వెలిగించిన
ఆత్మజ్యోతి
కరెంటు ట్రాన్స్‌ఫార్మర్‌

మందుగోళీలకే కాదు
ముది వయసు జిహ్వాచాపల్యాన్ని తీర్చే
తెలంగాణ అవ్వ ఆకుల సంచి

జననం నుంచి పునర్జన్మ వరకు
చెయ్యి పట్టి నడిపిన మేనమామల
కల్యాణలక్ష్మి కిట్టు

నెర్రెలు వారిన నేలలో చలిచెలిమ
శిశిరమైన జీవితాలకు నవవసంతం
వెలసిపోయిన వార్ధక్యపు మేడల్లో
కొత్త కాంతులు నింపిన
తెలంగాణ సింగిడి
అయోమయపు అన్నదాతల జీవితాలకు ధీమానిచ్చిన రైతుబీమా
వర్గాంతరాలకు సవాలుగా నిలిచిన
దళిత బంధు
తెలంగాణ భవిష్యద్దర్శనం చేసుకున్న ద్రష్ట
ఎవ్వరికీ, ఎప్పుడూ తలవంచని
తెలంగాణ ఆత్మగౌరవం

అతడే
సమస్త తెలంగాణ జనుల
హృదయ స్పందన