జవాబుదారీతనం లేని విశ్వగురు

రెండు వేల ఏండ్ల క్రితం యవన దేశ రాజు అలెగ్జాండర్‌ తన దేశ ప్రజలను గాలికి వదిలి, యుద్ధాలతో సైనికులను అష్టకష్టాల పాలుచేస్తూ అనేక దేశాలు జయించి పేరు తెచ్చుకోవాలనుకున్నాడు. కానీ, ఆ దేశాలను ఏం చేయాలి, ప్రజలకు ఎలా మంచి పాలకుడవ్వాలని ఆలోచించలేదు.

రెండు వేల ఏండ్ల క్రితం యవన దేశ రాజు అలెగ్జాండర్‌ తన దేశ ప్రజలను గాలికి వదిలి, యుద్ధాలతో సైనికులను అష్టకష్టాల పాలుచేస్తూ అనేక దేశాలు జయించి పేరు తెచ్చుకోవాలనుకున్నాడు. కానీ, ఆ దేశాలను ఏం చేయాలి, ప్రజలకు ఎలా మంచి పాలకుడవ్వాలని ఆలోచించలేదు. అలాగే ప్రస్తుత మన భారతీయ అలెగ్జాండర్‌ దేశంలోని రాష్ర్టాలన్నీ తన పాలన కిందే ఉండాలని పన్నాగాలు పన్నుతున్నాడే గానీ, ఆ తర్వాత వాటిని ఎట్లా పాలించాలి అన్న భావనే లేకుండా ఉన్నాడు. దేశ సంపదను తనకు కావాల్సిన వారి దగ్గర ఉంచి, విదేశాల్లో ప్రతిష్ఠ పెంచుకుని విశ్వ గురు అవ్వాలని తాపత్రయపడుతున్నాడు.

దేశం లోపల బీజేపీని విస్తరించడం, ప్రపంచ దేశాల అభిమానాన్ని సంపాదించి విశ్వ గురు అన్న బిరుదు పొందటం ఈయన కోరికలు. అయితే ఈయన అనుసరిస్తున్న విధానాలు అందుకు తగినట్టు ఉన్నాయా? విశ్వ గురు అయ్యాక ఇంకేం చేయాలనుకుంటున్నాడు?… అంటే జవాబులు దొరకవు. ధనవంతులవ్వాలన్న వారికి రచయిత జాన్‌ రస్కిన్‌ కొన్ని ప్రశ్నలు వేస్తాడు. ‘మీరు ప్రపంచంలో అందరిలో కంటే ధనవంతులైతే ఏం చేస్తారు? ఒక ఇటుక బంగారం ఇస్తా, చాలా? లేదు.. 100 కిలోలు ఇస్తా, కాదు… కాదు ప్రపంచంలో బంగారం అంతా ఇస్తా. ఏం చేస్తారు దానితోని?’ అని. దురాశ పరులైన మానవులు ఏమీ చెయ్యరు, ఎవరికీ ఉపయోగపడరని ఆయన ప్రశ్నల తాత్పర్యం. ఇప్పుడు భారత దేశంలో 16 రాష్ర్టాలు బీజేపీ లేదా వారి మిత్ర పక్షాల పాలనలో ఉన్నాయి. ఇక మిగిలిన కొన్ని రాష్ర్టాలను కూడా తమ అధీనంలోకి తెచ్చుకోవాలని బీజేపీ నాయకులు ముమ్మరంగా ప్రయత్నాలు చేస్తున్నారు. వారి పాలనలో ఉన్న 16 రాష్ర్టాలు మిగతా వాటి కంటే మెరుగైన ప్రగతి సాధించి ఆదర్శంగా ఉన్నాయా అంటే.. లేవు.

అలాంటప్పుడు మిగతా రాష్ర్టాల్లోని బీజేపీయేతర ప్రభుత్వాలను కూల్చి ఆక్రమించి మీరేం చేయదలచుకున్నారు? ఒక జాతీయ విధానం రూపొందించారా? గత ఎనిమిదేండ్లుగా దేశంలో జరిగిందేమిటి? మీరు సాధించిన ఫలితాలు ఏమిటి అంటే ఏమీ కనిపించవు. అన్నీ వైఫల్యాలే కనిపిస్తాయి.

• రైతుల ఆదాయం మీరు రెట్టింపు చేస్తామన్నారు. కానీ ఉన్న ఆదాయం సగానికి పడిపోయింది.
• ఏడాదికి రెండు కోట్ల ఉద్యోగాలిస్తామని చెప్పారు. కానీ మీరు అమలు చేస్తున్న ప్రభుత్వ సంస్థల అమ్మకం, నోట్ల రద్దు వంటి విధానాల వల్ల సంవత్సరానికి 30 లక్షల మంది ఉద్యోగాలు కోల్పోతున్నారు.
• నిత్యావసర వస్తువుల ధరలు నిరాటంకంగా పెరుగుతూ ప్రజల ఆర్థిక స్థాయిని కిందకు దించేస్తున్నాయి. దిగువ మధ్య తరగతి వారు బీద స్థితికి, ఎగువ మధ్య తరగతివారు దిగువ మధ్య తరగతి స్థాయికి వచ్చేశారు.
• విద్యా రంగం కుదేలైపోయింది. 2013 దాకా ప్రపంచ ర్యాంకుల్లో 200 స్థానాల్లోపు 2 లేదా 3 భారత విద్యా సంస్థలు ఉండేవి. ఇంకొక 2 లేదా 3 విద్యా సంస్థలు 400-500 ర్యాంకుల మధ్య ఉండేవి. కానీ ఇప్పుడు మన దేశానికి చెందిన అత్యుత్తమ విద్యా సంస్థలు 800 తర్వాతి ర్యాంకుల్లో ఉన్నాయి. మానవ వనరులను ప్రోది చేసే విద్యా రంగం, దాని విధానాల్లో రోజురోజుకీ నాణ్యత క్షీణిస్తున్నది.
• ఆదాయ పన్ను రాయితీలు లేక, పెరిగిన ధరలతో సంసారం ఈదలేక ఉద్యోగులంతా సతమతమవుతున్నారు.
• దేశం మొత్తం ఏలాలన్న లాలస ఉన్న కేంద్రంలోని బీజేపీ ప్రభుత్వానికి కనీసం నేరాలను కూడా కట్టడి చేయడం చేత కావడం లేదు. నేరం చేసినవారు హిందూ మతేతరులైతే ధర్నాలు చేస్తారు, త్వరగా అరెస్టులు చేస్తారు. అదే నేరస్థులకు ఏమాత్రం బీజేపీతో బీరకాయ పీచు సంబంధం ఉన్నా వారికి ఏమాత్రం హాని జరగదు. మోర్బీ వంతెన దుర్ఘటనకు బాధ్యులైనవారిలో ఏ ఒక్కరినైనా పట్టుకున్నారా?
• రాష్ట్ర స్థాయి పోటీ, అర్హత పరీక్షలను కేంద్రీకరించి దేశంలోని విద్యార్థులందరినీ లేని పోని చిక్కుల్లో పడేశారు.
• స్వతంత్రంగా వ్యవహరించాల్సిన ఐటీ, ఈడీ, సీబీఐ, గవర్నర్ల వ్యవస్థలను వారి చెప్పు చేతల్లో ఉంచుకుని రాష్ర్టాల ప్రగతికి సైంధవుల్లా అడ్డుపడుతున్నారు. రాష్ర్టాల ప్రగతి దేశ ప్రగతి అవుతుందని, దేశాలన్నింటి ప్రగతి ప్రపంచ ప్రగతి అవుతుందని విశ్వ గురుకి తెలియదా? కేంద్రం బతికేదే రాష్ర్టాలు సంపాదించి ఇచ్చే ఆదాయం మీద అన్న సోయి లేని కేంద్ర ప్రభుత్వం ఎన్నాళ్ళు మనగలదు?
•  అధికారంలోకి వచ్చిన ఒక్క సంవత్సరంలోపే తెలంగాణ రాష్ట్ర ప్రభుత్వం ప్రజలకు, వ్యవసాయానికి 24 గంటల నిరంతర విద్యుత్తును అందుబాటులోకి తెచ్చింది. 8 ఏండ్లలో కేంద్ర ప్రభుత్వం కనీసం తమ పార్టీ పాలనలో ఉన్న రాష్ర్టాల్లో అయినా ఆ వసతి కల్పించిందా?
• కేవలం మూడున్నర సంవత్సరాల్లో ప్రపంచంలోనే అతి పెద్ద ఎత్తిపోతల ప్రాజెక్టు అయిన కాళేశ్వరాన్ని తెలంగాణ ప్రభుత్వం పూర్తి చేయగలిగింది. ప్రజలకు మిషన్‌ భగీరథ ద్వారా శుద్ధి చేసిన మంచి నీరందిస్తున్నది. 8 ఏండ్ల పాలనలో ఇందులో పది శాతమైనా చేయగలిగిందా కేంద్ర ప్రభుత్వం?

ఇప్పటివరకు బీజేపీ పాలనలో తగ్గినవి, చేయనివి చెప్పుకున్నాం. ఇక పెరిగినవి ఏమున్నామో చూద్దాం!

•  మొట్టమొదటగా చెప్పుకోవాల్సినవి నిత్యావసర వస్తువుల ధరలు. గత ప్రభుత్వం ద్రవ్యోల్బణాన్ని అరికట్టడంలో విఫలమైందని డప్పు కొట్టి అధికారంలోకి వచ్చిన బీజేపీ హయాంలో ధరలు 20-50 శాతం పెరిగాయి. ఇది మోదీ పాలనకు లభించిన మొదటి బంగారు పతకం!
• దేశీయ కుబేరుడు అంబానీ ప్రపంచ కుబేరుడయ్యాడు. దేశ సంపన్నుల జాబితాలో ఎక్కడో ఉన్న అదానీ కూడా ప్రపంచంలో రెండో స్థానానికి వచ్చేశాడు. ఇది మోదీకి రెండో పతకం.
• దేశంలోని బ్యాంకుల్లో తీసుకున్న వేల కోట్ల రూపాయల రుణాలు ఎగవేసి విదేశాలకు పారిపోయిన వ్యాపారులు బాగా వృద్ధి చెందుతున్నారు. ఇది మోదీ పాలనకు మూడో పతకం.
• దేశంలోని రెండు పెద్ద మతాల మధ్య ఆరని చిచ్చు రగిల్చగలిగింది బీజేపీ ప్రభుత్వం. ఇది నాలుగో పతకం.
• నిరుద్యోగుల సంఖ్య ఇబ్బడి ముబ్బడిగా పెరిగింది. ఉద్యోగాల కల్పనకు కేంద్రం ప్రభుత్వం దగ్గర పథకాలేమీ లేవు. ఇది ఐదో బంగారు పతకం.
• రైతుల్లో, కార్మికుల్లో, ఉద్యోగుల్లో నిర్వేదం పెరిగింది. వీరి పట్ల కేంద్ర ప్రభుత్వ నిర్లక్ష్యం పెరిగింది. ఇది ఆరో బంగారు పతకం.

మరి ఇంత తక్కువ సమయంలో ఇన్ని పతకాలు సాధించగలిగిన ప్రధానమంత్రి విశ్వ గురు స్థానానికి అర్హుడేగా! ఈ ఎనిమిదేండ్లలో నరేంద్ర మోదీ ప్రసంగాలు, మంకీ మాటలను, ఆయన విస్తృత విదేశీ పర్యటనల్లో మాట్లాడిన మాటలను ఒక్క దగ్గర పెట్టుకుని వాటిని బీజేపీ విధానాలు, పాలనకు అన్వయించి పరిశీలిస్తే ఎవరికైనా గట్టి షాక్‌ తగలడం ఖాయం. ప్రవచించిన సూక్తులను పాటించకపోవడం వల్ల, చేసిన వాగ్దానాల్లో ఒక్కటీ నెరవేర్చకపోవడం వల్ల ప్రజా వ్యతిరేక విధానాలతో సామాన్యులంతా అల్లాడిపోతుంటే, భారతదేశం ప్రపంచానికే తలమానికంగా వెలిగిపోతోందన్న అనుభూతిని సామాన్య మానవుడికి కలిగించటం సాధ్యమా?… ఎన్నటికీ కాదు. అది సాధించగలిగినవాడు విశ్వ గురువు అన్న బిరుదుకి అర్హుడే! నమో నమః!

తాతల నాడు భారత్‌ నుంచి తరలిపోయిన కుటుంబానికి చెందిన వాడైన రిషి సునాక్‌ బ్రిటన్‌ ప్రధానమంత్రి అయినప్పుడు అతడు భారతీయుడని పొంగిపోయాం. అలాగే మన కళ్ల ముందు రాజకీయాల్లో ఎదిగి, ముఖ్యమంత్రి, ప్రధానమంత్రి పదవులు అలంకరించిన మన వాడు విశ్వ గురువు అయ్యాడంటే భారతీయులందరికీ ఆనందమేగా! భారతీయ విద్యార్థులను బ్రిటన్‌కు రానీయని రిషి, సామాన్య ప్రజలను ద్వేషిస్తూ బాధపెడుతున్న మోదీ మనవారే కదా! జబ్బలు చరచుకోవాలి. ఆనందిద్దాం! అభినందిద్దాం! అయితే అన్య దేశస్థులకు ఆలింగనాలు, స్వదేశంలో ఇతర రాష్ర్టాలతో అంతర్యుద్ధాలు సామెతకు వ్యతిరేకం కదా! ఇంట గెలిచి రచ్చ గెలవాలి. అందరూ ఐన్‌స్టీన్లు కాలేరు మరి!

డాక్టర్‌ కనకదుర్గ దంటు: 89772 43484