భారీ వర్షం

ఉమ్మడి జిల్లా వ్యాప్తంగా జోరుగా వాన
సిద్దిపేట జిల్లాలో 1.17 సెంటీ మీటర్లు
అత్యధికంగా నారాయణరావుపేటలో 6.43 సెం.మీ
అప్రమత్తంగా ఉండాలి
సదాశివపేట మున్సిపల్‌ కమిషనర్‌ కృష్ణారెడ్డి

సిద్దిపేట, ఆగస్టు 28: ఉమ్మడి జిల్లాలో శనివారం భారీ వర్షం కురిసింది. జోరువానతో చెరువులు, కుంటల్లో నీరు చేరి జలకళ సంతరించుకున్నాయి. పట్టణ ప్రాంతాల్లో లోతట్టు ప్రాంతాలన్నీ జలమయమయ్యాయి. సిద్దిపేట జిల్లాలో సరాసరిగా 1.17 సెంటీ మీటర్ల వర్షపాతం నమోదైంది. అత్యధికంగా నారాయణరావుపేటలో 6.43 సెం.మీ నమోదు కాగా, మండలాల వారీగా దుబ్బాకలో 0.51 సెంటీ మీటర్లు, సిద్దిపేట రూరల్‌లో 1.90 సెం.మీ, చిన్నకోడూరులో 0.08 సెం.మీ, బెజ్జంకిలో 0.59 సెం.మీ, కోహెడలో 1.05 సెం.మీ, హుస్నాబాద్‌లో 0.20 సెం.మీ, అక్కన్నపేటలో 2.90 సెం.మీ, నంగునూరులో 3.22 సెం.మీ, సిద్దిపేట అర్బన్‌లో 2.04 సెం.మీ, తొగుటలో 1.06 సెం.మీ, మిరుదొడ్డిలో 0.24 సెం.మీ, దౌల్తాబాద్‌లో 0.54 సెం.మీ, రాయిపోల్‌లో 0.92 సెం.మీ, వర్గల్‌లో 1.39 సెం.మీ, ములుగులో 0.77 సెం.మీ, మర్కూక్‌లో 0.38 సెం.మీ, జగదేవ్‌పూర్‌లో 0.06 సెం.మీ, గజ్వేల్‌లో 0.21 సెం.మీ, కొండపాకలో 0.18 సెం.మీ, కొమురవెల్లిలో 1.18 సెం.మీ, చేర్యాలలో 1.48 సెం.మీ, మద్దూరులో 0.13 సెం.మీ, ధూళిమిట్టలో 0.50 సెం.మీ వర్షం కురిసినట్లు అధికారులు తెలిపారు.

అప్రమత్తంగా ఉండాలి..

• సదాశివపేట మున్సిపల్‌ కమిషనర్‌ కృష్ణారెడ్డి
  సదాశివపేట/ జిన్నారం, ఆగస్టు 28: ఎడతెరపి లేకుండా కురుస్తున్న భారీ వర్షాలకు సదాశివపేటలో ఇల్లు కూలిపోయింది. శుక్రవారం రాత్రి కురిసిన వర్షానికి సదాశివపేట పట్టణంలోని రజకకేరిలో ఓ ఇల్లు కూలిపోయింది. ఇల్లు కూలిన సమయంలో ఇంట్లో ఎవరూ లేకపోవడంతో ప్రమాదం తప్పింది. ఇల్లు కూలిన విషయం తెలుసుకున్న మున్సిపల్‌ కమిషనర్‌ కృష్ణారెడ్డి సంఘటనా స్థలానికి చేరుకుని పరిశీలించారు. ఈ సందర్భంగా ఆయన మాట్లాడుతూ ప్రస్తుతం జిల్లా వ్యాప్తంగా భారీ వర్షాలు కురుస్తున్నాయని ప్రజలు అప్రమత్తంగా ఉండాలని ప్రజలకు సూచించారు. పట్టణంలోని రజక కేరిలో వర్షానికి ఇల్లు కూలిపోయిందని, కూలిన సమయంలో ఇంట్లో ఎవరూ లేకపోవడంతో ప్రాణ నష్టం జరుగలేదన్నారు. జిన్నారం మండల పరిధిలో శనివారం భారీ వర్షం కురిసింది. ఖాజీపల్లి, గడ్డపోతారం పారిశ్రామిక గ్రామాలతో పాటు అన్ని గ్రామాల్లో వర్షం భారీగా కురిసింది. వర్షంతో వరికి భారీ మేలు జరిగిందని రైతులు సంతోషం వ్యక్తం చేశారు. చెరువు, కుంటల్లోకి కొద్ది మేర నీరు చేరింది.