మత్స్యపరిశ్రమకు ఊపిరి

విదేశాలకు చేపలు ఎగుమతి చేసే స్థాయికి ఎదిగాం
ఆ ఘనత సీఎం కేసీఆర్‌దే
ఆర్థిక శాఖ మంత్రి తన్నీరు హరీశ్‌రావు
వచ్చే రెండేండ్లలో ఫెడరేషన్‌ ద్వారా చేపల కొనుగోళ్లు
మత్స్యకారులందరికీ సొసైటీల్లో సభ్యత్వం
మత్స్యకారులకు మొబైల్‌ ఔట్‌లెట్లు అందిస్తాం
మంత్రి తలసాని శ్రీనివాస్‌యాదవ్‌
రంగనాయకసాగర్‌, కోమటి చెరువుల్లో చేపపిల్లలు, రొయ్యల విడుదల

తెలంగాణలో మత్స్యపరిశ్రమకు ఊపిరి పోసిన ఘనత సీఎం కేసీఆర్‌కే దక్కుతుందని ఆర్థిక శాఖ మంత్రి తన్నీరు హరీశ్‌రావు అన్నారు. పశుసంవర్ధక, మత్స్య, పాడి పరిశ్రమల అభివృద్ధి, సినిమాటోగ్రఫీ శాఖల మంత్రి తలసాని శ్రీనివాస్‌యాదవ్‌తో కలిసి బుధవారం సిద్దిపేట జిల్లాలోని రంగనాయకసాగర్‌, కోమటి చెరువుల్లో చేపపిల్లలు, రొయ్యలు విడుదల చేసి, రాష్ట్ర వ్యాప్తంగా చేపట్టే చేప పిల్లల పంపిణీ కార్యక్రమాన్ని మంత్రి హరీశ్‌రావు లాంఛనంగా ప్రారంభించారు. ఒకప్పుడు చేపలంటే, కోస్తా ప్రాంతం నుంచి దిగుమతి చేసుకుంటారనే భావన ఉండేదని, కానీ, సీఎం కేసీఆర్‌ ప్రత్యేక చొరవతో ఏడేండ్లలోనే మనం చేపలను ఎగుమతి చేసే స్థాయికి చేరుకున్నామని మంత్రి చెప్పారు. వచ్చే రెండేండ్లలో మత్స్య ఫెడరేషన్‌ ద్వారా చేపల మార్కెటింగ్‌ కార్యాచరణ సిద్ధం చేస్తున్నామని మంత్రి శ్రీనివాస్‌యాదవ్‌ తెలిపారు. తెలంగాణ వచ్చాక సీఎం కేసీఆర్‌ మత్స్య రంగాన్ని అన్ని విధాలా అభివృద్ధి చేస్తున్నారన్నారు. ఉచిత చేపపిల్లల పంపిణీతో మత్స్యకారుల జీవితాల్లో కొత్త వెలుగులు తీసుకొచ్చారని, రాష్ట్రంలో నీలి విప్లవానికి శ్రీకారం చుట్టారని వెల్లడించారు. మెదక్‌ మండలం కోంటూరు చెరువులో ఎమ్మెల్యే పద్మాదేవేందర్‌రెడ్డి, సంగారెడ్డి జిల్లా సిర్గాపూర్‌ మండలం నల్లవాగు ప్రాజెక్టులో జడ్పీ చైర్‌పర్సన్‌ మంజుశ్రీజైపాల్‌రెడ్డితో కలిసి ఎమ్మెల్యే మహారెడ్డి భూపాల్‌రెడ్డి చేప పిల్లలను వదిలారు.

సిద్దిపేట/ చిన్నకోడూరు, సెప్టెంబర్‌ 8: తెలంగాణలో మత్స్య పరిశ్రమకు ఊపిరి పోసిన ఘనత సీఎం కేసీఆర్‌కే దక్కుతుందని మంత్రులు తన్నీరు హరీశ్‌రావు, తలసాని శ్రీనివాస యాదవ్‌ అన్నారు. సిద్దిపేట జిల్లా రంగనాయకసాగర్‌, కోమటి చెరువుల్లో చేపపిల్లలు, రొయ్యలను బుధవారం విడుదల చేసి రాష్ట్రవ్యాప్తంగా చేపపిల్లల వదిలే కార్యక్రమాన్ని వారు లాంఛనంగా ప్రారంభించారు. ఈ సందర్భంగా మంత్రి హరీశ్‌రావు మాట్లాడుతూ ఒకప్పుడు చేపలంటే ఆంధ్రా ప్రాంతమే గుర్తుకు వచ్చేదని, కానీ, సీఎం కేసీఆర్‌ ప్రోత్సహిస్తుండడంతో తెలంగాణలో ఇప్పుడు అన్నిచోట్లా చేపలు అందుబాటులో ఉంటున్నట్లు తెలిపారు. దిగుమతి చేసే స్థాయి నుంచి ఎగుమతి చేసే స్థాయి మనం చేరామన్నారు. చేపల పెంపకాన్ని మత్స్యకారులు సద్వినియోగం చేసుకోవాలని కోరారు. రాష్ట్రవ్యాప్తంగా చేపపిల్లలు విడుదల కార్యక్రమాన్ని సిద్దిపేట జిల్లా నుంచే ప్రారంభించడం సంతోషంగా ఉందన్నారు. ఉచిత చేపపిల్లల పంపిణీ పథకంతో మత్స్యకారుల జీవితాల్లో సీఎం కేసీఆర్‌ కొత్త వెలుగులు తీసుకొచ్చారని, రాష్ట్రంలో నీలి విప్లవానికి శ్రీకారం చుట్టారని తెలిపారు. సిద్దిపేట జిల్లాలో రూ.4.87 కోట్లతో అన్ని నీటి వనరుల్లో 4.19 కోట్ల చేప, రొయ్య పిల్లలను వదలుతున్నామని చెప్పారు. కుల వృత్తులకు ముఖ్యమంత్రి కేసీఆర్‌ పూర్వవైభవం తెచ్చినట్లు తెలిపారు.

కులవృత్తులకు పూర్వవైభవం..

• మంత్రి తలసాని
  కులవృత్తులకు పూర్వవైభవం కల్పించేందుకు ప్రభుత్వం కృషి చేస్తున్నదని రాష్ట్ర పశుసంవర్ధక, మత్స్య, పాడి పరిశ్రమల అభివృద్ధి, సినిమాటోగ్రఫీ శాఖల మంత్రి తలసాని శ్రీనివాస్‌యాదవ్‌ అన్నారు. మత్స్యకారుల జీవన ప్రమాణాలు పెంచడానికే ప్రభుత్వం సమీకృత మత్స్య అభివృద్ధి పథకం ద్వారా 2014 నుంచి ఉచిత చేప పిల్లల విడుదల కార్యక్రమం చేపడుతున్నదని తెలిపారు. ప్రభుత్వ చొరవతో రాష్ట్రంలో ఊహించనంత మత్స్య సంపద అందుబాటులోకి వచ్చిందన్నారు. ఒకటి రెండేండ్లలో మత్స్య ఫెడరేషన్‌ ద్వారా చేపల మార్కెటింగ్‌కు కార్యాచరణ సిద్ధం చేస్తున్నామన్నారు. మత్స్య సంపదను పెంచేందుకు జల వనరుల్లో సమీకృత మత్స్య అభివృద్ధి పథకం ద్వారా క్వాలిటీ, కౌంటింగ్‌, సైజులో రాజీపడకుండా నాణ్యమైన చేపపిల్లలను విడుదల చేస్తున్నామని వివరించారు. ఈ సంవత్సరం జల వనరుల్లో 93 కోట్ల చేపపిల్లలు, 20 కోట్ల రొయ్య పిల్లలను వదులుతామని తెలిపారు. ఉమ్మడి రాష్ట్రంలో నిర్లక్ష్యం చేయబడ్డ మత్స్య పరిశ్రమను, తెలంగాణ వచ్చాక సీఎం కేసీఆర్‌ అన్ని విధాలుగా అభివృద్ధి చేస్తున్నారన్నారు. సాగునీటి ప్రాజెక్టులు పూర్తి చేయడం, చెరువుల్లో 365 రోజులు నీళ్లు ఉండడం, ఉచిత చేపపిల్లల విడుదలతో మత్స్య సంపద పెరిగిందని, ఈ రంగంపై ఆధారపడి జీవనం సాగిస్తున్న వారికి ఉపాధి లభిస్తున్నదన్నారు. మంత్రి హరీశ్‌రావు సూచన మేరకు మొబైల్‌ ఔట్‌లెట్లకు ఆర్థిక సాయం అందిస్తామని మంత్రి తెలిపారు. మత్స్యకారుల కుటుంబాల్లో అర్హులందరికీ త్వరలోనే సొసైటీల్లో సభ్యత్వం కల్పిస్తామన్నారు. కార్యక్రమంలో జడ్పీ చైర్‌పర్సన్‌ వేలేటి రోజాశర్మ, మున్సిపల్‌ చైర్‌పర్సన్‌ మంజులా రాజనర్సు, రాష్ట్ర పశుసంవర్ధక శాఖ ముఖ్య కార్యదర్శి అనితా రాజేంద్రన్‌, మత్స్యశాఖ కమిషనర్‌ భూక్యా లచ్చిరాంనాయక్‌, సిద్దిపేట అదనపు కలెక్టర్‌ ముజామ్మిల్‌ఖాన్‌, శిక్షణ కలెక్టర్‌ ప్రఫుల్‌ దేశాయి, సుడా చైర్మన్‌ రవీందర్‌రెడ్డి, కౌన్సిలర్‌ వడ్లకొండ సాయికుమార్‌, ఎంపీపీ కూర మాణిక్యరెడ్డి, మార్కెట్‌ కమిటీ చైర్మన్‌ కాముని శ్రీనివాస్‌, వైస్‌ ఎంపీపీ కీసరి పాపయ్య, రైతుబంధు సమితి జిల్లా డైరెక్టర్‌ మేడికాయల వెంకటేశం, గంగాపూర్‌ సొసైటీ చైర్మన్‌ కనకరాజు, సర్పంచులు చంద్రకళ రవిగౌడ్‌, లింగం, ఎంపీటీసీ దుర్గారెడ్డి, డీసీసీబీ డైరెక్టర్‌ కనకరాజు, ఆయా గ్రామాల మత్స్యశాఖ చైర్మన్లు, ముదిరాజ్‌ సంఘం నాయకులు, మత్స్యకారులు, ప్రజాప్రతినిధులు, అధికారులు పాల్గొన్నారు. అంతకుముందు మంత్రి హరీశ్‌రావు సిద్దిపేటలోని ఎమ్మెల్యే క్యాంపు కార్యాలయంలో వర్షాలకు ఇండ్లు కూలిపోయిన బాధిత కుటుంబాలకు నష్ట పరిహారం చెక్కులు అందజేశారు. సిద్దిపేట అర్బన్‌ మండలంలో 49 బాధిత కుటుంబాలకు ఒక్కొక్కరికీ రూ.3,500 చొప్పున రూ.1,71,500, నారాయణరావుపేట మండలంలో 62 బాధిత కుటుంబాలకు ఒక్కొక్కరికీ రూ.3,200 చొప్పున రూ.1,98,400 మంత్రి అందజేశారు.

రంగనాయకసాగర్‌, కోమటి చెరువు అందాలకు మంత్రి ఫిదా..

సిద్దిపేట జిల్లాలోని రంగనాయకసాగర్‌, కోమటిచెరువు అందాలను చూసి మంత్రి తలసాని శ్రీనివాస్‌యాదవ్‌ ఫిదా అయ్యారు. ప్రజలకు ఆహ్లాదం, ఆనందం పంచేలా తీర్చిదిద్దారన్నారు.