Video: కుక్క మొరగడంపై వ్యక్తి చిరాకు… కుక్కతోపాటు పొరుగువారిపై రాడ్‌తో దాడి

న్యూఢిల్లీ: కుక్క మొరగడంతో ఒక వ్యక్తి చిరాకుపడ్డాడు. ఆ కుక్కతోపాటు దాని యజమానులైన పొరుగువారిపై ఇనుప రాడ్‌తో దాడి చేశాడు. దీంతో కుక్కతో పాటు ముగ్గురు వ్యక్తులు గాయపడ్డారు. దేశ రాజధాని ఢిల్లీలో ఈ సంఘటన జరిగింది. పశ్చిమ్ విహార్ ప్రాంతానికి చెందిన ధరమ్‌వీర్ దహియా ఆదివారం ఉదయం తన ఇంటి నుంచి బయటకు వచ్చాడు. అయితే పొరుగింటి కుక్క అతడ్ని చూసి మొరిగింది. చిరాకుపడిన ఆ వ్యక్తి వెంటనే ఇనుప రాడ్‌ను పట్టుకుని వచ్చాడు. ఆ కుక్కపై దాడి చేయబోగా యజమానులతోపాటు పొరుగున ఉన్న వ్యక్తి అడ్డుకునేందుకు ప్రయత్నించారు.

అయితే కోపాన్ని కంట్రోల్‌ చేసుకోని ధరమ్‌వీర్ దహియా తన చేతిలో ఉన్న రాడ్‌తో కుక్క తలపై కొట్టాడు. అలాగే పక్కనే ఉన్న 53 ఏళ్ల పొరుగు వ్యక్తిని కూడా ఆ రాడ్‌తో కొట్టాడు. దీంతో కుక్క యజమాని రక్షిత్‌, ఆ కుటుంబానికి చెందిన మహిళ ఆ వ్యక్తిని పట్టుకుని నిలువరించేందుకు ప్రయత్నించారు. ఈ సందర్భంగా వారి మధ్య పెనుగులాట జరిగింది.

మరోవైపు ధరమ్‌వీర్ ఇనుప రాడ్‌తో కొట్టడంతో కుప్పకూలిన కుక్క కొంత సేపటి తర్వాత లేచింది. యజమానితో పెనుగులాడుతున్న ఆ వ్యక్తిని కరిచింది. ఈ దాడిలో ఆ కుక్కతోపాటు ముగ్గురు వ్యక్తులు గాయపడ్డారు. సమాచారం అందుకున్న పోలీసులు గాయపడిన వారిని ఆసుపత్రికి తరలించారు. ఈ ఘటనపై కేసు నమోదు చేసి దర్యాప్తు చేస్తున్నారు.

కాగా, గాయపడిన కుక్కను దాని యజయాని పశు వైద్యశాలకు తీసుకెళ్లాడు. అయితే అక్కడి సీసీటీవీలో రికార్డైన ఈ వీడియో సోషల్‌ మీడియాలో వైరల్‌ అయ్యింది.

https://twitter.com/MohitMohlia/status/1543655449324507137?ref_src=twsrc%5Etfw%7Ctwcamp%5Etweetembed%7Ctwterm%5E1543655449324507137%7Ctwgr%5E%7Ctwcon%5Es1_c10&ref_url=https%3A%2F%2Fwww.freepressjournal.in%2Findia%2Fwatch-video-delhi-man-gets-annoyed-by-barking-beats-dog-and-owners-with-iron-rod