Vijay Antony | నటుడిగా, సంగీత దర్శకుడిగా, దర్శకుడిగా, నిర్మాతగా, డబ్బింగ్ ఆర్టిస్ట్గా మల్టీటాలెంటెడ్ స్కిల్స్ ఉన్న అతికొద్ది మంది సెలబ్రిటీల్లో ఒకడు విజయ్ ఆంటోని (Vijay Antony). బిచ్చగాడు (Bichagadu) సినిమాతో ఇండియన్ ఫిలిం ఇండస్ట్రీలో టాక్ ఆఫ్ ది టౌన్గా నిలిచాడు విజయ్ ఆంటోని. తెలుగు, తమిళ భాషల్లో సూపర్ ఫ్యాన్ ఫాలోయింగ్ సంపాదించుకున్న విజయ్ ఆంటోనీ ఇంట తీవ్ర విషాదం చోటుచేసుకుందని తెలిసిందే.
విజయ్ ఆంటోనీ కూతురు మీరా ఆంటోని (Meera Antony) మంగళవారం తెల్లవారుజామున 3 గంటలకు చెన్నైలోని (Chennai) డీడీకే రోడ్లోని తమ నివాసంలో ప్రాణాలు కోల్పోయింది. ఓ ప్రైవేటు పాఠశాలలో సీనియర్ ఇంటర్ చదువుతున్న 16 ఏండ్ల మీరా చదువుల్లో ఒత్తిడి నేపథ్యంలో ఆత్మహత్యకు పాల్పడినట్టుగా సమాచారం. కూతురు ఆకస్మిక మరణంతో విజయ్ ఆంటోనీ కుటుంబం తీవ్ర దు:ఖంలో మునిగిపోయింది.
ఏడేండ్ల వయస్సులోనే తండ్రిని కోల్పోయి..
విజయ్ ఆంటోనీ ఏడేండ్ల వయస్సులోనే తన తండ్రిని కోల్పోయాడు. అయితే తండ్రి కూడా ఆత్మహత్య చేసుకోవడం అందరినీ తీవ్రంగా కలచివేచే విషయం. తన తండ్రిని కోల్పోయిన విషయాన్ని గుర్తు చేసుకుంటూ ఓ ఈవెంట్లో మాట్లాడిన మాటలకు సంబంధించిన వీడియో ఇప్పుడు అందరి హృదయాలను కదిలిస్తోంది.
జీవితంలో ఎంతటి సంక్షోభం ఎదురైనా ఆత్మహత్యలు చేసుకోకండి. ఆత్మహత్య చేసుకున్న వారి పిల్లల గురించి తలుచుకుంటే నాకు చాలా బాధగా అనిపిస్తుంది. మా నాన్న ఆత్మహత్య చేసుకున్నాడు. అప్పుడు నాకు ఏడేళ్లు. మా చెల్లికి ఐదేళ్లు. అది ఇక్కడ చెప్పాల్సిన అవసరం లేదు. ఇది మీకు పెద్ద విషయం కాకపోవచ్చు. కానీ నాన్న వెళ్లిపోయాక మమ్మల్ని పెంచేందుకు మా అమ్మ ఎంత కష్టపడిందో నాకు తెలుసు. అందుకే ఆత్మహత్యల గురించి విన్నప్పుడు నాకు చాలా బాధగా ఉంటుంది. జీవితంలో ఎదురయ్యే పలు సంక్షోభాల లోతు నాకు తెలుసు.. అంటూ విజయ్ ఆంటోనీ చెప్పిన మాటలు అందరినీ ఆలోచింపజేస్తున్నాయి.
#VijayAntony lost his father to suicide when he was just 7 years old 🥹💔 Tragically, today, his own daughter has also taken her life 😭 In a video, #VijayAntony talks about the pain of life, why he’s silent & why suicide should never be an option 😓
pic.twitter.com/GbjD4eJ8E0— KARTHIK DP (@dp_karthik) September 19, 2023
సినిమాల్లో వ్యక్తిగత జీవిత ప్రభావం..
విజయ్ ఆంటోనీ సినిమాలను గమనిస్తే వ్యక్తిగత జీవితంలో ఎదుర్కొన్న సంఘటనల ప్రభావం కనిపిస్తుంది. బిచ్చగాడు సినిమాలో విజయ్ ఆంటోనీ సిల్వర్ స్క్రీన్పై అమ్మ సెంటిమెంట్ను చూపించి.. కోట్లాదిమందిని ఆలోచింపజేసేలా చేశాడు. ఆ తర్వాత ఈ సినిమాకు కొనసాగింపుగా వచ్చిన బిచ్చగాడు 2లో అన్నాచెల్లెళ్ల సెంటిమెంట్ కనిపిస్తుంది. ఈ రెండు సినిమాలు విజయ్ ఆంటోనీ వ్యక్తిగత జీవితానికి చాలా దగ్గరగా ఉన్నాయనేది ఎవరూ కాదనలేని సత్యం.
అనాథలు, బిచ్చగాళ్ల పాలిట దేవుడిలా మారి ఎంతోమందికి స్పూర్తిగా నిలిచిన విజయ్ ఆంటోనీ.. ఇలా కూతురును కోల్పోవడం పట్ల సినీ ప్రముఖులు, అభిమానులు, నెటిజన్లు ప్రగాఢ సంతాపం వ్యక్తం చేస్తున్నారు.