The Kerala Story 2 | హింస, మత మార్పిడి నేపథ్యంగా ‘ది కేరళ స్టోరీ 2’.. బాక్సాఫీస్ వ‌ద్ద మిశ్ర‌మ స్పంద‌న

The Kerala Story 2 | 2023లో దేశవ్యాప్తంగా పెను సంచలనం సృష్టించిన 'ది కేరళ స్టోరీ'కి కొనసాగింపుగా వచ్చిన 'ది కేరళ స్టోరీ 2: గోస్ బియాండ్' ఫిబ్రవరి 27, 2026న థియేటర్లలోకి వచ్చిన సంగ‌తి తెలిసిందే.

The Kerala Story 2 | 2023లో దేశవ్యాప్తంగా పెను సంచలనం సృష్టించిన ‘ది కేరళ స్టోరీ’కి కొనసాగింపుగా వచ్చిన ‘ది కేరళ స్టోరీ 2: గోస్ బియాండ్’ ఫిబ్రవరి 27, 2026న థియేటర్లలోకి వచ్చిన సంగ‌తి తెలిసిందే. అయితే ఈ చిత్రం కేరళ సహజ సిద్ధమైన అందాలను లేదా అక్కడి సంస్కృతిని చూపించడం కంటే, ఒక నిర్దిష్టమైన సిద్ధాంతాన్ని బలంగా ప్రజల్లోకి తీసుకెళ్లడమే లక్ష్యంగా పెట్టుకున్నట్లు కనిపించింద‌ని ప్రేక్ష‌కులు అభిప్రాయ‌పడుతున్నారు. కొచ్చి, జోధ్‌పూర్, గ్వాలియర్ వంటి నగరాలకు చెందిన సురేఖ, దివ్య, నేహ అనే ముగ్గురు యువతులు ముస్లిం యువకుల ప్రేమలో పడి ఎలా మోసపోయారనేది ఈ చిత్ర ప్రధాన క‌థాంశం. ఒక జర్నలిస్ట్, ఒక భర్త, ఒక నవవధువు ఇలా ప్రతి పాత్ర కూడా మోసం, బలవంతపు మత మార్పిడి మరియు అక్రమ రవాణా వంటి భయంకరమైన కోణాల్లోనే చిత్రీకరించబడింది.

దర్శకుడు కామాఖ్య నారాయణ్ సింగ్, రచయిత విపుల్ అమృత్ లాల్ షా మొదటి భాగంలో ఉన్న ఆందోళనలను ఈ సీక్వెల్‌లో మరింత తీవ్రతరం చేశారు. కేవలం వ్యక్తుల కథలుగా కాకుండా, ఒక వర్గాన్ని లక్ష్యంగా చేసుకుని ‘గజ్వా-ఎ-హింద్ 2047’ వంటి అంశాలను కథలో జోడించి ఉద్రిక్తతను పెంచే ప్రయత్నం చేశారు. సినిమాలో చూపించిన ప్రతి ముస్లిం పాత్ర ప్రతికూలంగా ఉండటం, అదే సమయంలో హిందూ గృహాలను అత్యంత క్షేమదాయకంగా చూపించడం విమర్శలకు తావిస్తోంది. మనోజ్ ముంతాషిర్ రాసిన సాహిత్యం, నేపథ్య సంగీతంలో వచ్చే ‘హర్ హర్ శంభు’ శ్లోకాలు, బుల్డోజర్ల సీన్లు ఒక ప్రత్యేక వర్గాన్ని ఉద్దేశించి చేసిన హెచ్చరికల్లా ఉన్నాయని విశ్లేషకులు అభిప్రాయపడుతున్నారు.

కేర‌ళ హైకోర్టు ఈ సినిమా విడుద‌ల‌ను ఆపివేయాల‌ని ఆదేశించిన కూడా డివిజ‌న్ బెంచ్ ద్వారా అనుమ‌తిని తెచ్చుకుని విడుద‌లైన‌ ఈ చిత్రం రంజాన్ మాసం సమయంలో విమ‌ర్శ‌ల‌ను అందుకుంటుంది. అయితే ఈ సినిమా బాక్సాఫీస్ వద్ద మిశ్రమ ఫలితాలను అందుకుంటోంది. మొదటి రోజు కేవలం రూ.75 లక్షల వసూళ్లతో ప్రారంభమైనప్పటికీ, రెండో రోజు నాటికి సుమారు రూ.5 కోట్ల వరకు వసూలు చేసింది. నటన కంటే సందేశానికే ప్రాధాన్యత ఇవ్వడంతో పాత్రల్లో లోతు లోపించిందని, కేవలం హెచ్చరికలు మరియు భయాలను కలిగించే విధంగానే స్క్రీన్ ప్లే సాగిందని రివ్యూలు చెబుతున్నాయి. ఈ సినిమా చూస్తున్నప్పుడు ప్రేక్షకులలో ఒక వర్గం పట్ల అనుమానాలు కలిగేలా కథనం సాగడం వల్ల, ఇది సమాజంపై ఎలాంటి ప్రభావం చూపుతుందనే చర్చ ఇప్పుడు సర్వత్రా నడుస్తోంది.