అది జరిగితే.. మలినేనికి అగ్నిపరీక్షే

1986లో అగ్ర హీరో నందమూరి బాలకృష్ణ నటించిన ఆరు సినిమాలు బ్లాక్‌బస్టర్స్‌గా నిలిచాయి. ఒకే ఏడాది వరుసగా ఆరు హిట్స్‌ అనమాట. ఆయన సమకాలీనుల్లో కానీ, ఆ తర్వాత వచ్చిన హీరోల్లో కానీ.. ఎవరికీ లేని రికార్డ్‌ ఇది. మళ్లీ 39ఏండ్ల తర్వాత అదే సీన్‌ రిపీట్‌ అయ్యేలా ఉంది.

1986లో అగ్ర హీరో నందమూరి బాలకృష్ణ నటించిన ఆరు సినిమాలు బ్లాక్‌బస్టర్స్‌గా నిలిచాయి. ఒకే ఏడాది వరుసగా ఆరు హిట్స్‌ అనమాట. ఆయన సమకాలీనుల్లో కానీ, ఆ తర్వాత వచ్చిన హీరోల్లో కానీ.. ఎవరికీ లేని రికార్డ్‌ ఇది. మళ్లీ 39ఏండ్ల తర్వాత అదే సీన్‌ రిపీట్‌ అయ్యేలా ఉంది. ఒకే ఏడాది కాకపోయినా.. ఇప్పటికే వరుసగా నాలుగు హిట్స్‌ని అందుకున్నారు బాలయ్య. అయిదో నంబర్‌గా ‘అఖండ 2 – తాండవం’ వచ్చేస్తోంది. ఆ సినిమాకున్న హైప్‌ను బట్టి, దాదాపుగా విజయం ఖరారనిపిస్తున్నది.

ఇక అసలైన అగ్నిపరీక్ష మలినేని గోపీచంద్‌కే. ఎందుకంటే ‘అఖండ 2’ విజయం ఖరారైతే.. ఆ వరుసలో వచ్చే ఆరో సినిమా మలినేనిదే అవుతుంది. మొత్తంగా బాలకృష్ణతో రెండోసారి సిక్సర్‌ కొట్టించే బాధ్యత మలినేని గోపీచంద్‌ చేతిలో ఉందన్నమాట. అందుకే.. స్క్రిప్ట్‌ విషయంలో పకడ్బందీగా ముందుకెళ్తున్నారట మలినేని గోపీచంద్‌. డైలాగ్‌ వెర్షన్‌ మినహా స్క్రిప్ట్‌ వర్కంతా పూర్తయిందని సమాచారం. ఈ సినిమా కథ విషయంలో ఆసక్తికరమైన విషయం వెలుగుచూసింది.

ఆద్యంతం ఎమోషన్స్‌తో ఈ కథ సాగుతుందట. ద్వితీయార్ధంలో భారీ యాక్షన్‌ ఎలిమెంట్స్‌తోపాటు, ఫుల్‌ ఎమోషనల్‌ సీక్వెన్స్‌ కూడా ఉంటాయని తెలిసింది. ద్వితీయార్ధంలోనే బాలయ్య పాత్రపై ఓ మెమొరబుల్‌ ఫ్లాష్‌బ్యాక్‌ను ప్లాన్‌ చేశారట మలినేని గోపీచంద్‌. ఈ ఫ్లాష్‌బ్యాక్‌లో బాలకృష్ణ మాఫియా డాన్‌లా కనిపిస్తారని సమాచారం. ఈ సినిమా గురించి రీసెంట్‌గా మలినేని గోపీచంద్‌ ఎక్స్‌ వేదికగా స్పందించారు. ‘గాడ్‌ ఆఫ్‌ మాసెస్‌ ఈజ్‌ బ్యాక్‌.. ఈసారి సింహగర్జన మరింత గట్టిగా ఉండబోతోంది.. చరిత్రలో నిలిచుండే సినిమా రాబోతున్నది.. వెయిట్‌ అండ్‌ సీ.. ’ అని ఆయన ఎక్స్‌లో పేర్కొన్నారు. బాలకృష్ణ 111వ చిత్రంగా రాబోతున్న ఈ సినిమాను వృద్ధి సినిమాస్‌ పతాకంపై వెంకట సతీశ్‌ కిలారు నిర్మించనున్నారు.