Visit:
తమిళ అగ్రహీరో శివకార్తికేయన్‌ యాక్షన్‌ చిత్రం ‘అమరన్‌’. ద్విభాషా చిత్రంగా తెరకెక్కుతున్న ఈ సినిమాకు పెరియస్వామి రచన, దర్శకత్వం వహించారు. సోనీ పిక్చర్స్‌ ఇంటర్నేషనల్‌ ప్రొడక్షన్స్‌, గాడ్‌ బ్లెస్‌ ఎంటైర్టెన్మెంట్‌తో కలిసి విఖ్యాత నటుడు కమల్‌హాసన్‌, ఆర్‌.రామచంద్రన్‌ ఈ సినిమాను నిర్మిస్తున్నారు. దీపావళి కానుకగా అక్టోబర్‌ 31న సినిమా విడుదల కానుంది.
కాగా, హీరో నితిన్‌ తండ్రి, ప్రముఖ పంపిణీదారుడు సుధాకర్‌రెడ్డి, అతని సోదరి నిఖితారెడ్డి ఈ సినిమా ఏపీ, తెలంగాణ థియేట్రికల్‌ హక్కులను సొంతం చేసుకున్నారు. తెలుగు రాష్ర్టాల్లో శ్రేష్ట్‌ మూవీస్‌ బ్యానర్‌ ద్వారా ఈ సినిమా విడుదల కానుంది. కమల్‌హాసన్‌ రీసెంట్‌ బ్లాక్‌బాస్టర్‌ ‘విక్రమ్‌’ని కూడా శ్రేష్ట్‌ మూవీసే తెలుగులో విడుదల చేసింది.
‘విక్రమ్‌’ని భారీగా విడుదల చేసిన శ్రేష్ట్‌ మూవీస్‌ ద్వారా తాను నిర్మిస్తున్న ‘అమరన్‌’ కూడా విడుదల అవుతుండటం పట్ల కమల్‌ ఆనందం వ్యక్తం చేశారు. మునుపెన్నడూ చూడని కొత్త తరహా పాత్రలో శివకార్తికేయన్‌ నటిస్తున్న ఈ చిత్రంలో సాయిపల్లవి కథానాయిక. ఈ చిత్రానికి కెమెరా: సీహెచ్‌ సాయి, సంగీతం: జి.వి.ప్రకాశ్‌కుమార్‌.
