HCU | విధ్వంసంపై మౌనమేల రాహుల్‌.. దొంగల్లా అర్ధరాత్రి చెట్లు ఎందుకు నరుకుతున్నరు?

హైదరాబాద్‌ సెంట్రల్‌ యూనివర్సిటీకి చెందిన కంచె గచ్చిబౌలి అటవీ భూముల్లో వేలం పేరిట రేవంత్‌ ప్రభుత్వం సాగిస్తున్న దమనకాండపై సినీ ప్రముఖుల్లో ఆగ్రహం వ్యక్తమవుతున్నది. గ్రీన్‌ లంగ్స్‌ ఆఫ్‌ హైదరాబాద్‌గా అభివర్ణించే ఈ ప్రాంతంలో చెట్ల నరికివేతను వెంటనే ఆపాలని, జీవ వైవిధ్యాన్ని కాపాడాలని సోషల్‌మీడియా వేదికగా వారు ప్రభుత్వాన్ని అభ్యర్థిస్తున్నారు.

• బాలీవుడ్‌ నటి రీచా ఛద్దా సూటి ప్రశ్న
• స్వార్థాన్ని నరకండి.. చెట్లను కాదు: శ్రీలీల
• నా హృదయం ముక్కలైంది: రష్మిక మందన
• కోర్టునూ ధిక్కరిస్తారా?: రేణుదేశాయ్‌
• హెచ్‌సీయూ ఘటనలపై కథానాయికల ఆగ్రహం
• విద్యార్థులకు మద్దతుగా సోషల్‌మీడియాలో పోస్టులు

హైదరాబాద్‌ సెంట్రల్‌ యూనివర్సిటీకి చెందిన కంచె గచ్చిబౌలి అటవీ భూముల్లో వేలం పేరిట రేవంత్‌ ప్రభుత్వం సాగిస్తున్న దమనకాండపై సినీ ప్రముఖుల్లో ఆగ్రహం వ్యక్తమవుతున్నది. గ్రీన్‌ లంగ్స్‌ ఆఫ్‌ హైదరాబాద్‌గా అభివర్ణించే ఈ ప్రాంతంలో చెట్ల నరికివేతను వెంటనే ఆపాలని, జీవ వైవిధ్యాన్ని కాపాడాలని సోషల్‌మీడియా వేదికగా వారు ప్రభుత్వాన్ని అభ్యర్థిస్తున్నారు. ఇప్పటికే ఈ విషయంపై ప్రముఖ నటుడు ప్రకాష్‌రాజ్‌, దర్శకుడు నాగ్‌అశ్విన్‌ స్పందించగా..తాజాగా అగ్ర కథానాయికలు కొందరు తెలంగాణ ప్రభుత్వ చర్యలకు వ్యతిరేకంగా గళం విప్పారు. హెచ్‌సీయూ విద్యార్థుల పోరాటానికి మద్దతు ప్రకటిస్తూ, అటవీ ధ్వంసాన్ని వెంటనే ఆపాలని కోరారు.

HCU | మంగళవారం హెచ్‌సీయూ ఘటనపై తన స్పందనను తెలియజేసిన సీనియర్‌ నటి రేణూదేశాయ్‌ మరోమారు ఇన్‌స్టాగ్రామ్‌లో ఓ వీడియోను విడుదల చేశారు. ‘ప్రజలందరి పక్షాన ఈ వీడియో ద్వారా సీఎం రేవంత్‌ రెడ్డికి విజ్ఞప్తి చేస్తున్నా. నాకు రెండు రోజుల క్రితం హెచ్‌సీయూ ఘటనల గురించి తెలిసింది. మిత్రుల ద్వారా కొంత సమాచారాన్ని సేకరించి ఈ వీడియోతో ముందుకొచ్చాను. సీఎంగారు..ఓ తల్లిగా నేను మిమ్మల్మి అభ్యర్థిస్తున్నా. మన భవిష్యత్తు తరాల కోసం ఆక్సిజన్‌, చెట్లు అవసరమవుతాయి. ఐటీ పార్కులు, ఆకాశహర్మ్యాలతో కూడిన అభివృద్ధి అవసరమే.. కానీ ఈ 400 ఎకరాల భూమిని మాత్రం వదిలివేయమని మిమ్మల్ని కోరుతున్నా. తెలంగాణలో నివసిస్తున్న పౌరురాలిగా మీకు నా అభ్యర్థన ఇది. అభివృద్ధి చేయాలంటే ఇతర ప్రాంతాల్లో వేల ఎకరాల ప్రభుత్వ భూమి ఉంది. ఆక్సిజన్‌ కోసం మనకు చక్కటి పర్యావరణం అవసరం కాబట్టి ఆ 400 ఎకరాలను వదిలిపెట్టమని అడుగుతున్నా. హెచ్‌సీయూ భూముల వేలం విషయంలో మీరు, మీ అధికారులందరూ పునరాలోచన చేసి మంచి నిర్ణయాన్ని తీసుకుంటారని ఆశిస్తున్నా’ అని పేర్కొన్నారు. మరో పోస్ట్‌లో… కోర్టు ఆదేశాలను ధిక్కరించి బుధవారం సాయంత్రం కూడా అటవీ ధ్వంసం చేశారని రేణూదేశాయ్‌ ఆగ్రహం వ్యక్తం చేసింది.

• ‘రాత్రికి రాత్రే బుల్డోజర్ల మోహరింపు, విద్యార్థుల అరెస్టులు, అసలు హెచ్‌సీయూలో ఏం జరుగుతున్నది’ అనే క్యాప్షన్స్‌తో కూడిన ఫొటోలను తన ఇన్‌స్టాగ్రామ్‌ ఖాతాలో షేర్‌ చేసిన అగ్ర కథానాయిక రష్మిక మందన్న.. వృక్ష సంపదను ధ్వంసం చేస్తూ ప్రభుత్వం అనుసరిస్తున్న దుర్మార్గమైన వైఖరిని తప్పుపట్టింది. ‘నేను ఇప్పుడే ఈ వీడియోలను చూశాను. నా హృదయం ముక్కలైంది. ఇది ఏమాత్రం అంగీకారం కాదు. మంచిది కూడా కాదు’ అంటూ రష్మిక మందన్న తన ఇన్‌స్టాగ్రామ్‌ పోస్ట్‌లో ఆవేదన వ్యక్తం చేసింది. పోస్ట్‌ చేసిన నిమిషాల్లోనే రష్మిక మాటలు సోషల్‌మీడియాలో వైరల్‌గా మారాయి.
• గచ్చిబౌలిలోని హెచ్‌సీయూ అటవీ ప్రాంతంలో జీవ వైవిధ్యం, వన్యప్రాణులకు సంబంధించిన వీడియోను కథానాయిక వరలక్ష్మీ శరత్‌కుమార్‌ తన ఇన్‌స్టాగ్రామ్‌ ఖాతాలో పంచుకుంది. ‘సేవ్‌ సిటీ ఫారెస్ట్‌’ అనే సంస్థ పోస్ట్‌ను కూడా షేర్‌ చేసిన వరలక్ష్మీ శరత్‌కుమార్‌ వెంటనే ఈ విధ్వంసానికి అడ్డుకట్ట వేయాలని ప్రభుత్వాన్ని కోరింది.
• అటవీ నిర్మూలన వల్ల కంచె గచ్చిబౌలిలో 1 నుంచి 4 డిగ్రీల సెల్సియస్‌ ఉష్ణోగ్రత పెరిగే అవకాశం ఉందని ఎకలాజికల్‌ హెరిటేజ్‌ సంస్థ రిపోర్టును ఉటంకిస్తూ ‘తెలంగాణ టుడే’ పత్రిక పబ్లిష్‌ చేసిన ఆర్టికల్‌ను తన ఇన్‌స్టాగ్రామ్‌ స్టోరీస్‌లో షేర్‌ చేసింది సమంత. దీనితో పాటు అటవీ విధ్వంసం సందర్భంగా నెమళ్లు, జింకలు అరుస్తున్న వీడియోను సైతం తన ఖాతాలో షేర్‌ చేసింది.
• హెచ్‌సీయూ విద్యార్థుల నిరసనలు, బుల్డోజర్లతో అటవీ నేలమట్టం తాలూకు వరుస వీడియోలు, నెమళ్ల ఆక్రందనల వీడియోలను తన ఇన్‌స్టాగ్రామ్‌ స్టోరీస్‌లో పంచుకుంది కథానాయిక రెజీనా కాసాండ్రా. వేలానికి వ్యతిరేకంగా వివిధ ఆంగ్ల పత్రికల్లో వచ్చిన కథనాలను కూడా పంచుకుంది. పర్యావరణానికి తీవ్ర విఘాతం కలిగించే ఈ పనులను వెంటనే నిలిపివేయాలని కోరింది.
• స్వార్థాన్ని నరికివేయండి, చెట్లను కాదు, ప్రకృతిని కాపాడండి, ప్రతి వన్యప్రాణి మన మనుగడకు ప్రధానమే అనే రైటింగ్స్‌లో కూడిన వీడియోను తన ఇన్‌స్టాగ్రామ్‌ స్టోరీస్‌లో పంచుకుంది అగ్ర కథానాయిక శ్రీలీల.
• ‘ప్రకృతి సంపదను పరిరక్షించి భవిష్యత్తు తరాలకు అందించాలనే తపనతో విద్యార్థులు పోరాటం చేస్తున్నారు. ఐటీ పార్కులకంటే అడవిని కాపాడుకుంటేనే రేపటి మన భవిష్యత్తు భద్రంగా ఉంటుంది. జీవ వైవిధ్యాన్ని ధ్వంసం చేస్తూ దానినే అభివృద్ధి అనుకుంటే చివరకు అది విధ్వంసానికి దారితీస్తుంది’ అంటూ సీనియర్‌ నాయిక, హైదరాబాద్‌కు చెందిన దియా మిర్జా తన ఇన్‌స్టాగ్రామ్‌ స్టోరీలో ఆవేదన వ్యక్తం చేసింది.
• హెచ్‌సీయూ పరిధిలోని 400 ఎకరాల కంచె గచ్చిబౌలి అటవీ ప్రాంతాన్ని ధ్వంసం చేయడంపై బాలీవుడ్‌ నటి రిచా చద్దా ఆందోళన వ్యక్తం చేశారు. రాష్ట్ర ముఖ్యమంత్రి రేవంత్‌రెడ్డి, కాంగ్రెస్‌ అగ్రనేత రాహుల్‌గాంధీపై ఆమె విమర్శలు గుప్పించారు. విద్యార్థులపై లాఠీచార్జి చేయడం, వందలాది మందిని అరెస్టు చేసినప్పటికీ రాహుల్‌గాంధీ మౌనంగా ఉండటాన్ని ఆమె తప్పుబట్టారు. ఈ మేరకు ఓ విద్యార్థులను పోలీసులు వ్యాన్లలోకి ఈడ్చుకెళ్తున్న వీడియోను ఆమె సోషల్‌ మీడియాలో షేర్‌ చేశారు. ‘హే..! రాహుల్‌గాంధీ.. మీ వద్ద ప్రేమ చాలా ఎక్కువగా ఉంటుంది కదా. ఆ ప్రేమలో కొంచెమైనా ప్రకృతిపై చూపండి’ అని చెబుతూ రాహుల్‌గాంధీ, తెలంగాణ సీఎంవోను ట్యాగ్‌ చేశారు. ‘అర్ధరాత్రి చిమ్మచీకట్లో చెట్లు ఎందుకు నరుకుతున్నారు. చిమ్మచీకట్లో పని చేసేదెవరు? దొంగలే కదా?’ అని తీవ్రంగా స్పందించారు. వాతావరణ మార్పులపై చూపే ప్రభావం గురించి నటి రిచా చద్దాను ‘ది టెలిగ్రాఫ్‌’ ప్రశ్నించగా ఆమె స్పందించారు. ‘ఇప్పటికే మనం తీవ్రమైన ఉష్ణోగ్రతలను చవిచూస్తున్నాం. పర్యావరణ సూచీలో భారత్‌ 180 దేశాల్లో 176వ స్థానంలో ఉంది. ఇలాంటి పరిస్థితుల్లో జీవవైవిధ్యానికి ఆలవాలమైన అటవీని పూర్తిగా ధ్వంసం చేసి ఐటీ హబ్‌లను నెలకొల్పడమంటే భయకంపిత సమాజం వైపు అడుగులు వేయడమే’ అని ఆమె అన్నారు.