మెగాస్టార్ చిరంజీవి తనయుడిగా ఇండస్ట్రీకి ఎంట్రీ ఇచ్చిన రామ్ చరణ్ అనతి కాలంలోనే స్టార్ హీరోగా ఎదిగాడు. చిరుత సినిమాతో చరణ్ తెరంగేట్రం చేయగా, ఈ చిత్రం సెప్టెంబర్ 28, 2007న విడుదలైంది. అంటే నేటితో చరణ్ సినిమాల్లోకి వచ్చి 14 ఏళ్లు అయింది. ఈ సందర్భంగా పలువురు ప్రముఖులు, అభిమానులు ఆయనకు శుభాకాంక్షలు తెలియజేస్తున్నారు.
రామ్ చరణ్ 14 ఏళ్ల సినీ ప్రస్థానం పూర్తి చేసుకున్న సందర్భంగా హైదరాబాద్లోని నెక్లెస్ రోడ్ ఏరియాలో వివిధ రంగులతో రామ్ చరణ్ ఆర్ట్ను గీశారు కొందరు అభిమానులు. దీనికి సంబంధించిన వీడియో సోషల్ మీడియాలో చక్కర్లు కొడుతోంది. #14YrsOfRAMCHARANEra అనే ట్యాగ్ను ట్విట్టర్లో ట్రెండ్ చేస్తున్నారు ఫ్యాన్స్. చరణ్ తన కెరీర్లో మగధీ, రచ్చ, ఎవడు, ధృవ, రంగస్థలం వంటి బ్లాక్ బస్టర్ విజయాలు సాధించాడు.
రీసెంట్గా ఆర్ఆర్ఆర్ అనే పాన్ ఇండియా సినిమా షూటింగ్ పూర్తి చేసిన చరణ్ ఇప్పుడు శంకర్ దర్శకత్వంలో తన 15వ సినిమా చేస్తున్నాడు. భారీ బడ్జెట్తో అత్యంత ప్రతిష్టాత్మకంగా రూపొందుతున్న ఈ సినిమాలో కియారా అద్వానీ కథానాయికగా నటిస్తుంది.