Nivetha Thomas | విశ్వనాథ్‌ సినిమా గుర్తొస్తుంది.. అందుకే ఆ పాత్ర చేయడం ఇబ్బందిగా అనిపించలే: నివేతా థామస్‌

మన భారతీయ సమాజంలో 22 ఏండ్లకే పెళ్లెప్పుడని అడుగుతుంటారు. అందుకే హౌస్‌వైఫ్‌ (గృహిణి) పాత్ర చేయడం ఇబ్బందిగా అనిపించలేదు. ఓ నటిగా అన్ని రకాల పాత్రలు చేయాలన్నదే నా అభిమతం’ అని చెప్పింది కథానాయిక నివేతా థామస్‌. ఆమె ప్రధాన పాత్రలో నటిస్తున్న ‘35-చిన్న కథ కాదు’ ఈ నెల 6న ప్రేక్షకుల ముందుకురానుంది.

Nivetha Thomas | ‘మన భారతీయ సమాజంలో 22 ఏండ్లకే పెళ్లెప్పుడని అడుగుతుంటారు. అందుకే హౌస్‌వైఫ్‌ (గృహిణి) పాత్ర చేయడం ఇబ్బందిగా అనిపించలేదు. ఓ నటిగా అన్ని రకాల పాత్రలు చేయాలన్నదే నా అభిమతం’ అని చెప్పింది కథానాయిక నివేతా థామస్‌. ఆమె ప్రధాన పాత్రలో నటిస్తున్న ‘35-చిన్న కథ కాదు’ ఈ నెల 6న ప్రేక్షకుల ముందుకురానుంది. కిషోర్‌ ఈమాని దర్శకుడు. ఈ సందర్భంగా శనివారం నివేతా థామస్‌ పాత్రికేయులతో ముచ్చటిస్తూ పంచుకున్న విశేషాలు…

• ఈ సినిమాలో నేను సరస్వతి పాత్రలో కనిపిస్తా. మదర్‌ క్యారెక్టర్‌ చేయడం సవాలుగా తీసుకున్నా. నటిగా ఓ మూసలో ఇమిడిపోవడం నాకు ఇష్టం ఉండదు. నేను ఎలాంటి పాత్రనైనా చేయగలనని దర్శకులు నమ్మితే అంతకు మించిన ఆనందం ఏముంటుంది (నవ్వుతూ).
• ఈ సినిమాలో సరస్వతికి చిన్న వయసులోనే పెళ్లవుతుంది. తనకు పిల్లలు ఉన్నప్పటికీ ఆమెలో ఇంకా చైల్డ్‌ నేచర్‌ కనిపిస్తుంటుంది. తిరుపతి నేపథ్యంలో నడిచే ఈ కథ మధ్యతరగతి భావోద్వేగాలు, సంఘర్షణలకు అద్దం పడుతుంది. తిరుపతి బ్యాక్‌డ్రాప్‌ కాబట్టి అంతర్లీనంగా ఆధ్యాత్మిక భావాలతో కూడిన ఫ్యామిలీ డ్రామాగా మెప్పిస్తుంది.
• తారే జమీన్‌ పర్‌’ చిత్రంతో ఈ సినిమాకు అస్సలు పోలిక ఉండదు. లెక్కల సబ్జెక్ట్‌లో పిల్లలకు చాలా సందేహాలుంటాయి. ఈ సినిమాలో మా పెద్దబ్బాయికి మ్యాథ్స్‌ అంటే కష్టంగా అనిపిస్తుంటుంది. ఈ నేపథ్యంలో వచ్చే సన్నివేశాలు ప్రతి ఒక్కరికి కనెక్ట్‌ అవుతాయి. భార్య, భర్త , పిల్లలు, ఉపాధ్యాయులు, విద్యార్థుల మధ్య అందమైన అనుబంధాన్ని ఆవిష్కరిస్తుంది. కె.విశ్వనాథ్‌గారి సినిమా చూసిన అనుభూతినందిస్తుంది.
• ప్రియదర్శి ఈ సినిమాలో లెక్కల మాస్టర్‌ చాణక్యగా కనిపిస్తారు. గౌతమి, భాగ్యరాజా వంటి సీనియర్స్‌తో నటించడం వల్ల ఎన్నో కొత్త విషయాలు తెలుసుకున్నా. సురేష్‌ ప్రొడక్షన్స్‌ ఈ సినిమాను ప్రజెంట్‌ చేయడం చాలా ఆనందంగా ఉంది. ప్రస్తుతానికైతే తెలుగులో ఏ సినిమా కన్‌ఫర్మ్‌ కాలేదు. ఆ వివరాలను త్వరలో తెలియజేస్తా.