కథలోనే కావాల్సినంత ఎమోషన్‌ ఉంది

‘నానితో సినిమాలు చేస్తే ప్రొడ్యూసర్‌కి టెన్షన్‌ ఉండదు’. ప్రీరిలీజ్‌ ఈవెంట్‌లో నిర్మాత డీవీవీ దానయ్య అన్నమాట ఇది. నిజమే.. కథను ఓకే చేయడం.. షూటింగ్‌ టైమ్‌లో ప్రతీది దగ్గరుండి చూసుకోవడం.. ప్రమోషన్‌లో అన్నీ తానై సినిమాను ప్రేక్షకుల దగ్గరకు తీసుకెళ్లడం..

‘నానితో సినిమాలు చేస్తే ప్రొడ్యూసర్‌కి టెన్షన్‌ ఉండదు’. ప్రీరిలీజ్‌ ఈవెంట్‌లో నిర్మాత డీవీవీ దానయ్య అన్నమాట ఇది. నిజమే.. కథను ఓకే చేయడం.. షూటింగ్‌ టైమ్‌లో ప్రతీది దగ్గరుండి చూసుకోవడం.. ప్రమోషన్‌లో అన్నీ తానై సినిమాను ప్రేక్షకుల దగ్గరకు తీసుకెళ్లడం.. నిజానికి ఇంత ఇన్వాల్వ్‌ అయ్యే హీరోలు ఇండస్ట్రీలో అరుదే. అందుకే నిర్మాతలకు నాని నిజంగా స్పెషల్‌. ఆయన ‘సరిపోదా శనివారం’ సినిమా రేపు (గురువారం) విడుదల కానున్న విషయం తెలిసిందే. ఈ సందర్భంగా మంగళవారం విలేకరులతో నాని ముచ్చటించారు.

• ‘శనివారం దుష్టసంహారం’.. ట్రైలర్‌లోనే ఆ పాయింట్‌ చూపించాం. ఈ కథలో నాకు నచ్చింది కూడా అదే. దాన్ని ప్రేక్షకులకు నచ్చేలా చెప్పామా? లేదా? అనేది రేపు థియేటర్లలో చూస్తారు. ‘సరిపోదా శనివారం’ మంచి కథ. కథలోనే కావల్సినన్ని ఉద్వేగపూరితమైన మూమెంట్స్‌ ఉన్నాయి. వాటిని వందశాతానికి తీసుకెళ్లాం. ఇందులో యాక్షన్‌ పార్ట్‌ 20శాతమే. మిగతా 80శాతం యాక్షన్‌ మూడ్‌లో ఉంటుంది.

ఆ మూడ్‌నే ఆడియన్స్‌ ఎంజాయ్‌ చేస్తారు. సూర్య, దయ, చారులత.. ఈ ముగ్గురు మధ్య సాగే కథ ఇది. ఈ ముగ్గరికీ సోకులపాలెం అనే ఊరికి ఉన్న సంబంధం ఏమిటి? అనేది ఇందులో ఆసక్తికరమైన అంశం. స్క్రీన్‌ప్లే ఈ సినిమాకు ప్రధాన బలం. జనరల్‌గా నా సినిమాలన్నింటిలో తెలియని ఓ బరువును మోస్తుంటా. ఈ సారి మాత్రం ఆ బరువును ఎస్‌.జె.సూర్య, దర్శకుడు వివేక్‌ ఆత్రేయ మీద వేసేశా. నేను కొంచెం బ్యాక్‌ సీట్‌ తీసుకున్నా.

• ఎస్‌.జె.సూర్యతో ఎంజాయ్‌ చేస్తూ నటించా. నటుడిగా ఆయన్నుంచి చాలా నేర్చుకున్నా. ఆ రోల్‌కి ఆయన తప్ప మరో ఛాయిస్‌ లేదు. తన పాత్రకు ఏడు రోజులు డబ్బింగ్‌ చెప్పారు. అద్భుతంగా వచ్చింది. అలాగే ప్రియాంక, మురళీశర్మ కూడా కథను మోసే పాత్రలే చేశారు. ఈ సినిమాలో వేస్ట్‌ కేరక్టర్‌ కనిపించదు.
• ముఖ్యంగా దర్శకుడు వివేక్‌ ఆత్రేయ గురించి చెప్పాలి. చాలామందికి నచ్చేలా తను ‘అంటే సుందరానికి’ తీశాడు. కానీ కొన్ని కారణాల వల్ల సరిగ్గా ఆడలేదు. దాంతో ‘నేను సరిగ్గా చేశానా?’ అనే డౌట్‌ అతనిలో ఉండేది. అలాంటి సమయంలో తన బలాన్ని తనకు గుర్తు చేస్తూ నేను తన పక్కన ఒక బ్రదర్‌లా ఉన్నా. నా నమ్మకాన్ని నిజం చేస్తూ టెర్రిఫిక్‌ సినిమా తీశాడు. ఈ కథకు సీక్వెల్‌ కూడా చేయొచ్చు.
• సినిమా తీయడం ఒకెత్తు అయితే.. దాన్ని జనాల్లోకి తీసుకెళ్లడం ఒకెత్తు. నిజానికి కంటెంటే సినిమాను చూసుకుంటుంది. అయితే అది రిలీజ్‌ తర్వాత. ముందు సినిమాను జనాల్లోకి తీసుకెళ్లాలి. అందుకే ప్రమోషన్‌ విషయంలో అగ్రెసివ్‌గా ఉంటా. నేను హీరోగా చేసే ప్రతి సినిమాకూ అసిస్టెంట్‌ డైరెక్టర్‌లా పనిచేస్తా. నా నిర్మాతలు హ్యాపీగా ఉండాలని కోరుకుంటా. సినిమా విడుదలయ్యాక అందరూ హ్యాపీగా ఉన్నారని తెలిసిన తర్వాత సక్సెస్‌ని ఎంజాయ్‌ చేస్తా.