‘ప్రతి నటుడికి కెరీర్లో గొప్ప సినిమా చేయాలనే లక్ష్యం ఉంటుంది. అన్ని అంశాలు పక్కాగా కుదిరిన కథ కోసం అన్వేషిస్తుంటారు. నా కల ఈ సినిమాతో నెరవేరింది’ అన్నారు శివ కందుకూరి. ఆయన హీరోగా నటిస్తున్న చిత్రం ‘మనుచరిత్ర’. భరత్ పెదగాని దర్శకుడు. నారల శ్రీనివాసరెడ్డి నిర్మాత. గురువారం టీజర్ను విడుదల చేశారు. ‘వాడు పడుతున్న బాధ అంతా ఇంతా కాదు. వాడి ఏడుపు దేవుడికి వినిపించేంత..మనుషులకు అర్థం కానంత..’ అనే సంభాషణతో సాగిన టీజర్ ఆద్యంతం ఆసక్తికరంగా సాగింది. ప్రేమలోని వ్యథను, సంఘర్షణను ఆవిష్కరిస్తూ ఇంటెన్స్ ప్రేమకథగా అనిపించింది. ఈ సందర్భంగా రాజ్కందుకూరి మాట్లాడుతూ ‘తీవ్రమైన భావోద్వేగాలు కలబోసిన ప్రేమకథా చిత్రాలు తప్పకుండా విజయవంతమవుతాయి. ప్రస్తుతం ట్రెండ్కు తగిన కథ ఇది. చంద్రబోస్ అద్భుతమైన పాటలిచ్చారు’ అని చెప్పారు. ప్రేక్షకుల హృదయాలపై గాఢమైన ప్రభావాన్ని చూపించే చిత్రమిదని దర్శకుడు చెప్పారు. నిర్మాత మాట్లాడుతూ ‘వైవిధ్యమైన కథే ఈ సినిమాకు బలం. కొత్త దర్శకుడు కొత్త ఆలోచనలతో తెరకెక్కించిన చిత్రమిది’ అన్నారు. కథానుగుణంగా మంచి పాటలు కుదిరాయని సంగీత దర్శకుడు గోపీసుందర్ తెలిపారు.