Krishna Leela | ‘కృష్ణ లీల’ మూవీ స‌మీక్ష‌.. పునర్జన్మల కాన్సెప్ట్‌తో వ‌చ్చిన సినిమా ఎలా ఉందంటే.!

Devan | స్వీయ దర్శకత్వంలో హీరో దేవన్ నటించిన చిత్రం 'కృష్ణ లీల' (ట్యాగ్ లైన్: 'తిరిగొచ్చిన కాలం'). ధన్య బాలకృష్ణన్ హీరోయిన్‌గా నటించగా, బబ్లూ పృథ్వీ, వినోద్ కుమార్, రజిత, సరయు వంటి నటీనటులు కీలక పాత్రలు పోషించారు.

KrishnaLeela Devan | స్వీయ దర్శకత్వంలో హీరో దేవన్ నటించిన చిత్రం ‘కృష్ణ లీల’ (ట్యాగ్ లైన్: ‘తిరిగొచ్చిన కాలం’). ధన్య బాలకృష్ణన్ హీరోయిన్‌గా నటించగా, బబ్లూ పృథ్వీ, వినోద్ కుమార్, రజిత, సరయు వంటి నటీనటులు కీలక పాత్రలు పోషించారు. బేబీ వైష్ణవి సమర్పణలో, మహాసేన్ విజువల్స్ బ్యానర్ పై జ్యోత్స్న జి ఈ సినిమాను నిర్మించారు. నవంబర్ 7న థియేటర్లలో విడుదల కానున్న ఈ సినిమా నేడు (నవంబర్ 6) ప్రీమియర్‌ను ప్రదర్శించింది. అయితే ఈ సినిమా ఎలా ఉంది అనేది రివ్యూలో చూద్దాం.

క‌థ‌.
అమెరికాలో టాప్ యోగా గురువు అయిన విహారి (దేవన్) తన చెల్లి పెళ్లి కోసం ఇండియాకు వస్తాడు. అక్కడ హోమ్ మినిస్టర్ కూతురు బృంద (ధన్య బాలకృష్ణన్)ను చూసి తొలి చూపులోనే ప్రేమలో పడతాడు. అయితే, బృందకు అబ్బాయిలంటే అస్సలు నచ్చదు. విహారి ఆమెను ప్రేమించాలని ప్రయత్నించిన ప్రతిసారీ తిరస్కారమే ఎదురవుతుంది. బృందను చూసినప్పటి నుంచి విహారికి గత జన్మ జ్ఞాపకాలు గుర్తుకురావడం మొదలవుతుంది. బృంద తండ్రి (వినోద్ కుమార్) పెళ్లి ప్రస్తావనను అవమానకరంగా తిరస్కరించడంతో, విహారి ఆవేశంతో పోలీస్ స్టేషన్ వెళ్లి హోమ్ మినిస్టర్ కూతుర్ని చంపేశాను అని చెబుతాడు. పోలీసులు విచారించగా, బృంద బతికే ఉంటుంది. విహారి గత జన్మలో చంపాను అని చెప్పడంతో కథనం ఊహించని మలుపు తిరుగుతుంది. అసలు గత జన్మలో బృంద – విహారి ఎవరు? ఆమెకు కూడా గతం గుర్తుకొస్తుందా? ఈ జన్మలో వారి ప్రేమ ఫలిస్తుందా? అనేది సినిమా ప్రధాన కథాంశం.

విశ్లేషణ
గత జన్మల ప్రేమ కథాంశం కొత్తది కాకపోయినా, దానికి దైవత్వాన్ని జోడించి కొత్తగా చెప్పే ప్రయత్నం చేశారు. ప్రథమార్థం: హీరో, హీరోయిన్ పాత్రల పరిచయాలు, రొటీన్ ప్రేమ ప్రయత్నాలు, పోలీస్ స్టేషన్ సన్నివేశాలతో సాగుతుంది. కాలేజీలో ధన్య బాలకృష్ణన్ సన్నివేశాలు మరీ అతిగా అనిపిస్తాయి. ఫస్ట్ హాఫ్ సాగదీతగా అనిపించినా, గత జన్మకు లీడ్ ఇచ్చే సన్నివేశాలు, పోలీస్ స్టేషన్ డ్రామాతో ఇంటర్వెల్ సమయానికి కొంత ఆసక్తి నెలకొంటుంది. ద్వితీయార్థం: గత జన్మకు సంబంధించిన ఫ్లాష్‌బ్యాక్‌ను పూర్తిగా చూపించకుండా క్లైమాక్స్ వరకు దాచడం ఇంట్రెస్ట్‌ను పెంచుతుంది. గత జన్మ ప్రేమకథ రొటీనే అయినా పాత్రల చిత్రీకరణ కొత్తగా ఉంటుంది. కోర్టులో బృందను కలిసేందుకు విహారి పిటిషన్ వేయడం వంటి కొన్ని సన్నివేశాలు కొత్తగా ఉన్నాయి. క్లైమాక్స్ కూడా కొద్దిగా భిన్నంగా ముగుస్తుంది.

న‌టీన‌టులు
హీరోగా, దర్శకుడిగా రెండు బాధ్యతలు తీసుకున్న దేవన్, రెండు విభిన్న పాత్రలలో వైవిధ్యం చూపించడానికి చేసిన కృషి తెరపై కనిపిస్తుంది. నటుడిగా ఆయన ప్రదర్శన పర్వాలేదనిపిస్తుంది. ధన్య బాలకృష్ణన్ మోడ్రన్ గర్ల్‌గా మరియు ఫ్లాష్‌బ్యాక్‌లోని గ్రామీణ యువతిగా అద్భుతమైన నటనతో ఆకట్టుకుంది. ఆమె పాత్రల్లోని తేడాలను చక్కగా పలికించింది. వినోద్ కుమార్ హోమ్ మినిస్టర్ పాత్రలో బలమైన నెగెటివ్ రోల్‌ను సమర్థవంతంగా పోషించారు.

సాంకేతికంగా

దర్శకుడు, హీరో దేవన్ పునర్జన్మల నేపథ్యంలో ప్రేమ కథను తీసుకుని, దానికి భక్తిపూర్వకమైన స్పర్శను జోడించి ‘కృష్ణ లీల’ చిత్రాన్ని తెరకెక్కించారు. ఈ ప్రయత్నం నిజంగా ప్రశంసనీయం. పాత కథాంశమైనా, దానికి దైవత్వాన్ని జోడించి కొత్తగా చెప్పాలనే దర్శకుడి సాహసోపేతమైన ఆలోచన బాగుంది. ఫ్లాష్‌బ్యాక్‌లోని పీరియడ్ సెట్టింగ్స్ కోసం ఆర్ట్ డిపార్ట్‌మెంట్ మంచి కృషి చేసింది, అది తెరపై కనిపిస్తుంది. భీమ్స్ సిసిరోలియో అందించిన నేపథ్య సంగీతం ఆకట్టుకునేలా ఉంది. గ్రాఫిక్స్ విషయంలో మరింత కేర్ తీసుకొని ఉంటే విజువల్స్ మరింత రిచ్‌గా ఉండేవని చెప్పొచ్చు.

చివ‌రిగా ‘కృష్ణ లీల’ అనేది పునర్జన్మల నేపథ్యంలో, భక్తి భావాన్ని మేళవించి తెరకెక్కించిన ఒక విభిన్న ప్రేమ కథా చిత్రం. రొటీన్ సన్నివేశాలు కొంత నిరాశపరిచినా, ఈ జన్మలో ఆగిపోయిన ప్రేమ కోసం హీరో చేసే విభిన్న పోరాటం మరియు ఆసక్తికరమైన క్లైమాక్స్ ప్రేక్షకులకు కొంత కొత్త అనుభూతిని అందిస్తాయి. పాత కథకు కొత్త టచ్ ఇచ్చేందుకు చేసిన ఈ ప్రయత్నాన్ని అభినందించవచ్చు.

రేటింగ్: 2.75/5