పుష్పలో అల్లు అర్జున్ పక్కనే ఉండే ఆ నటుడు ఎవరో తెలుసా..?

December 18, 2021 / 10:01 PM IST

jagadeesh prathap bandari in Pushpa | పుష్ప సినిమా చూసిన ఎవ‌రికైనా ఇప్పుడు ఒక్క‌టే అనుమానం వ‌స్తుంది. అల్లు అర్జున్ పక్కనే సినిమా అంతా ఓ నటుడు ఇప్పుడు అందర్నీ బాగా ఆకట్టుకుంటున్నాడు. ఎక్కడ్నుంచి వచ్చాడు.. ఎవరబ్బా ఇతగాడు అంటూ అంతా సెర్చ్ చేస్తున్నారు. ఆయన పేరు జగదీశ్‌ ప్రతాప్ భండారి. సుకుమార్ కంట్లో పడటంతో ఇప్పుడు ఈయన జాతకమే మారిపోయింది. సినిమాలో అల్లు అర్జున్ తర్వాత అంత పెద్ద క్యారెక్టర్ చేసింది ఈయనే. బన్నీ కనిపించిన ప్రతిసారి జగదీశ్‌ కూడా కనిపిస్తాడు.. ఒక్క‌ పాటలు వ‌చ్చిన‌ప్పుడు తప్ప.

రంగస్థలంలో రామ్‌చ‌ర‌ణ్ ప‌క్క‌న‌ మహేశ్‌ మాదిరే ఇప్పుడు బన్నీతో జగదీష్ క్యారెక్టర్ ఉంటుంది. ఆయనకు అసిస్టెంట్ పాత్ర ఇది. రాయలసీమ యాసలో మాట్లాడుతూ అందర్నీ ఆకట్టుకున్నాడు ఈయన. దాంతో ఇప్పుడు ఈ నటుడి గురించి ఆరా తీస్తున్నారు నెటిజన్లు. ఇంతకుముందు ఏ సినిమాలో కూడా పెద్దగా కనిపించలేదు జగదీశ్‌. ఉన్నట్లుండి ఒకేసారి అంత పెద్ద క్యారెక్టర్ చేసేసరికి అంతా ఆయన గురించే మాట్లాడుకుంటున్నారు. అత్యంత కీలకమైన పాత్రలో అద్భుతంగా నటించాడు ఈయన. పుష్పలో ఈ పాత్ర రావడానికి ముందు ఆయన కొన్ని సినిమాలు చేశాడు కానీ పెద్దగా రిజిష్టర్ కాలేదు.

పలాస 1978లో ఓ కీలక పాత్రలో నటించాడు జగదీశ్‌. అందులో కూడా ఈయన పాత్రకు మంచి పేరు వచ్చింది. దానికి ముందు ప్రియదర్శి మల్లేశం సినిమాలోనూ నటించాడు ఈయన. అయితే ఇవన్నీ చిన్న సినిమాలు కావడంతో పెద్దగా గుర్తింపు రాలేదు. ఆహాలో వచ్చిన కొత్త పోరడు వెబ్ సిరీస్ లోనూ నటించాడు జగదీశ్‌. అవన్నీ కాదు కానీ ఇప్పుడు పుష్ప సినిమాతో మనోడు ఒక్కసారిగా పాపులర్ అయిపోయాడు. అల్లు అర్జున్ తర్వాత ఈయన పాత్ర గురించే అంతా బాగా చర్చించుకుంటున్నారు. మరి పుష్పతో వచ్చిన క్రేజ్ ఈ నటుడు ఎంతవరకు వాడుకుంటాడో చూడాలిక.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి