Komarakka | జబర్దస్త్ నటి కొమురక్కపై దాడి.. అభిమానులమంటూ ఇంట్లోకి దూసుకెళ్లి అరాచకం

Komarakka | మహబూబ్‌నగర్ జిల్లాలో సంచలనం రేపిన ఘటనలో జబర్దస్త్ నటి కొమురక్కపై జరిగిన దాడి తీవ్ర చర్చకు దారి తీసింది. బాలానగర్ మండలం ఉడిత్యాల గ్రామంలో జరిగిన ఈ సంఘటన స్థానికంగా ఉద్రిక్త పరిస్థితులను సృష్టించింది.వివరాల్లోకి వెళితే.. అభిమానులమంటూ సుమారు ఎనిమిది మంది యువకులు కొమురక్క నివాసానికి చేరుకున్నారు.

Komarakka | మహబూబ్‌నగర్ జిల్లాలో సంచలనం రేపిన ఘటనలో జబర్దస్త్ నటి కొమురక్కపై జరిగిన దాడి తీవ్ర చర్చకు దారి తీసింది. బాలానగర్ మండలం ఉడిత్యాల గ్రామంలో జరిగిన ఈ సంఘటన స్థానికంగా ఉద్రిక్త పరిస్థితులను సృష్టించింది.వివరాల్లోకి వెళితే.. అభిమానులమంటూ సుమారు ఎనిమిది మంది యువకులు కొమురక్క నివాసానికి చేరుకున్నారు. మొదట సాధారణంగా మాట్లాడుతున్నట్టు నటించిన వారు, ఒక్కసారిగా ఇంట్లోకి దూసుకెళ్లి ఆమెపై దాడికి పాల్పడ్డారు. కర్రలు, రాళ్లతో విచక్షణారహితంగా దాడి చేయడంతో కొమురక్కతో పాటు ఆమె సోదరుడు కూడా గాయపడ్డారు. ఈ దాడిలో కొమురక్కకు తీవ్ర గాయాలు కావడంతో స్థానికంగా ఆందోళన నెలకొంది.

ఈ ఘటన వెనుక పాత వివాదం ఉన్నట్లు పోలీసులు అనుమానిస్తున్నారు. కొంతకాలం క్రితం కొమురక్క ఇంట్లో జరిగిన బంగారం దొంగతనం కేసులో ఆమె తన అసిస్టెంట్ శ్రీనాథ్‌ను నిలదీశారని సమాచారం. ఈ విషయంపై కక్ష పెంచుకున్న శ్రీనాథ్ స్నేహితులే ఈ దాడికి పాల్పడ్డారని ప్రాథమికంగా తెలుస్తోంది. సమాచారం అందుకున్న వెంటనే పోలీసులు సంఘటనా స్థలానికి చేరుకుని పరిస్థితిని అదుపులోకి తీసుకున్నారు. కేసు నమోదు చేసి దర్యాప్తు ప్రారంభించారు. దాడికి పాల్పడిన నిందితులను గుర్తించే పనిలో పోలీసులు నిమగ్నమయ్యారు.

సెలబ్రిటీగా గుర్తింపు పొందిన కొమురక్కపై ఇలాంటి దాడి జరగడం అభిమానులను ఆగ్రహానికి గురిచేసింది. ఆమెకు న్యాయం చేయాలని, నిందితులపై కఠిన చర్యలు తీసుకోవాలని స్థానికులు, అభిమానులు డిమాండ్ చేస్తున్నారు. ఈ ఘటనతో సినీ ప్రముఖుల భద్రతపై మరోసారి చర్చ మొదలైంది. వ్యక్తిగత వివాదాలు ఇలా హింసాత్మక రూపం దాల్చడం పట్ల ఆందోళన వ్యక్తమవుతోంది.