Visit:
Hollywood | ప్రపంచవ్యాప్తంగా విశేష ప్రాచుర్యం సంపాదించుకున్న హాలీవుడ్‌ ఇండస్ట్రీలో సమ్మె అనే మాట వినిపించడం చాలా అరుదు. ప్రతీ విషయంలో ప్రణాళికాబద్దంగా వ్యవహరించడం, నిబంధనల ప్రకారం నడుచుకునే వ్యవస్థ కావడంతో అక్కడ బంద్‌లు, సమ్మెల ప్రస్తావన ఉండదని చెబుతుంటారు. అలాంటి హాలీవుడ్‌ ఇండస్ట్రీ దాదాపు 63 ఏళ్ల సుదీర్ఘ విరామం తర్వాత సమ్మె బాట పట్టింది. హాలీవుడ్‌కు చెందిన ‘సాగ్‌’ (స్క్రీన్‌ యాక్టర్స్‌ గిల్డ్‌- అమెరికన్‌ ఫెడరేషన్‌ ఆఫ్‌ టెలివిజన్‌ అండ్‌ రేడియో ఆర్టిస్టు) అసోసియేషన్‌ శుక్రవారం నుంచి సమ్మెకు పిలుపునిచ్చింది.
ఈ అసోసియేషన్‌లో లక్షా అరవై వేల మంది నటీనటులున్నారు. వారిలో టామ్‌ క్రూజ్‌, ఏంజెలినా జోలి వంటి అగ్రశ్రేణి తారలు ఉండటం విశేషం. ‘సాగ్‌’ పిలుపుతో హాలీవుడ్‌లో షూటింగ్స్‌ మొత్తం నిలిచిపోనున్నాయి. సినిమా ప్రమోషన్స్‌లో కూడా ఆర్టిస్టులు పాల్గొనవొద్దని అసోసియేషన్‌ కోరడంతో హాలీవుడ్‌ ఇండస్ట్రీ దాదాపుగా స్తంభించి నట్లేనని భావిస్తున్నారు. వేతనాల పెంపుతో పాటు ఆర్టిఫిషియల్‌ ఇంటెలిజెన్స్‌ వల్ల భవిష్యత్తులో తమ మనుగడకే ముప్పు వాటిల్లనుందని ‘సాగ్‌’ సభ్యులు ఆందోళన బాట పట్టారు. దీనివల్ల భారీ చిత్రాల రిలీజ్‌లు వాయిదా పడే అవకాశం ఉందని హాలీవుడ్‌ ట్రేడ్‌ వర్గాలు అంచనా వేస్తున్నాయి. ఈ సమ్మెకు సంఘీభావం తెలియజేస్తూ ప్రముఖ దర్శకుడు క్రిష్టోఫర్‌ నోలన్‌ రూపొందించిన ‘ఒప్పెన్‌ హైమర్‌’ ప్రీమియర్‌ షోను ఆ చిత్ర నటీనటులు బహిష్కరించడం హాలీవుడ్‌లో సంచలనంగా మారింది.
ఇదిలా ఉండగా మే 1వ తేదీ నుంచి ‘రైటర్స్‌ గిల్డ్‌ ఆఫ్‌ అమెరికా’ ఆధ్వర్యంలో నిరవధిక సమ్మె జరుగుతున్నది. ఇప్పుడు వీరికి యాక్టర్స్‌ అసోసియేషన్‌ తోడు కావడంతో హాలీవుడ్‌ ఇండస్ట్రీలో సినిమాలు, టీవీ సిరీస్‌లు దాదాపు నిలిచిపోనున్నాయి. తమ మేథస్సునంతా ధారబోసి రాసే కథలతో హాలీవుడ్‌ స్టూడియోలు కోట్లకు పడగలెత్తుతున్నాయని, తమకు మాత్రం నామమాత్రపు పారితోషికాలు అందుతున్నాయని రైటర్స్‌ గిల్డ్‌ ఆఫ్‌ అమెరికా ఆరోపిస్తున్నది. స్క్రీన్‌ రైటింగ్‌కు భవిష్యత్తు ఉండాలంటే భారీ ఎత్తున పారితోషికాలను పెంచాల్సిందేనని అక్కడి రచయితలు డిమాండ్‌ చేస్తున్నారు.
హాలీవుడ్‌లో 1960లో నటుడు రోనాల్డ్‌ రీగన్‌ ఆధ్వర్యంలో తొలిసారిగా హాలీవుడ్‌లో సమ్మె జరిగింది. అప్పుడు ఇదే మాదిరిగా యాక్టర్స్‌, రైటర్స్‌ యూనియన్స్‌ సంయుక్తంగా సమ్మెలో పాల్గొన్నారు. ఆ తర్వాత 1980లో స్క్రీన్‌ యాక్టర్స్‌ సమ్మెకు దిగారు. దాదాపు 63 ఏళ్ల తర్వాత హాలీవుడ్‌ మొత్తం సమ్మెబాట పట్టడం సంచలనంగా మారింది. తమ డిమాండ్లను సాధించేవరకు సమ్మెను విరమించబోమని గిల్డ్‌ అధ్యక్షుడు ఫ్రాన్‌ డ్రెషర్‌ లాస్‌ఏంజిల్స్‌లో జరిగిన మీడియా సమావేశంలో వెల్లడించారు. సమ్మె నేపథ్యంలో డిస్నీ వంటి ప్రఖ్యాత సంస్థలు సైతం తమ చిత్రాలను వాయిదా వేసుకోవాలని నిర్ణయించుకున్నట్లు తెలిసింది. సమ్మె దీర్ఘకాలం కొనసాగితే ప్రపంచ వినోద రంగం తీవ్రంగా ప్రభావితం అవుతుందని అంచనా వేస్తున్నారు.
