Dulquer Salmaan | లక్కీభాస్కర్‌తో ఆ కోరిక తీరింది.. దుల్కర్‌ సల్మాన్‌

నేరుగా తెలుగులో నటించి హ్యాట్రిక్‌ హిట్స్‌ కొట్టిన పరభాషా నటుడిగా కమల్‌హాసన్‌ అప్పుట్లో రికార్డు సృష్టించారు. మహానటి, సీతారామం, లక్కీభాస్కర్‌ విజయాలతో ఆ రికార్డును ఇప్పుడు దుల్కర్‌ సల్మాన్‌ సమం చేశారు. కమల్‌ని తెలుగువాళ్లు తమ హీరోగా చూస్తారు.

Dulquer Salmaan | నేరుగా తెలుగులో నటించి హ్యాట్రిక్‌ హిట్స్‌ కొట్టిన పరభాషా నటుడిగా కమల్‌హాసన్‌ అప్పుట్లో రికార్డు సృష్టించారు. మహానటి, సీతారామం, లక్కీభాస్కర్‌ విజయాలతో ఆ రికార్డును ఇప్పుడు దుల్కర్‌ సల్మాన్‌ సమం చేశారు. కమల్‌ని తెలుగువాళ్లు తమ హీరోగా చూస్తారు. ఇప్పుడు దుల్కర్‌ని కూడా అలాగే చూస్తున్నారు. వైవిధ్యమైన నటన వల్లే దుల్కర్‌కి ఇది సాధ్యమైంది. ‘లక్కీభాస్కర్‌’ విజయానందంలో ఉన్న ఆయన.. సోమవారం హైదరాబాద్‌లో విలేకరులతో ప్రత్యేకంగా ముచ్చటించారు. ఆ వివరాలివి.

• నాకెప్పట్నుంచో వాస్తవానికి దగ్గరగా ఉండే మధ్య తరగతి తండ్రి పాత్ర చేయాలనుండేది. అది ‘లక్కీభాస్కర్‌’తో నెరవేరింది. బ్యాంకింగ్‌ నేపథ్యాన్ని తీసుకొని మధ్య తరగతి కుటుంబకథ చెప్పడం నిజంగా కొత్త ప్రయోగం. నా దృష్టిలో ఇది రియల్‌ స్టోరీ. బ్యాక్‌గ్రౌండ్‌లో హర్షద్‌ మెహతా లాంటివాడు భారీ స్కాం చేస్తుంటే, ఒక చిన్న బ్యాంక్‌ ఉద్యోగి తన పరిధిలో స్కాం చేయడం అనేది కొత్త పాయింట్‌. దర్శకుడు వెంకీ అట్లూరి ఎంతో రీసెర్చ్‌ చేసి సామాన్యులకు కూడా అర్థమయ్యేలా ఈ బ్యాంకింగ్‌ సబ్జెక్ట్‌ రాసుకున్నారు.
• నా పాత్రలో ఉండే నెగెటివిటీని నేను ఎంజాయ్‌ చేశాను. మనలోని నటుడు బయటకు రావాలంటే ఇలాంటి పాత్రలు చెయ్యాలి. షారుఖ్‌ఖాన్‌ లాంటి వాళ్లే నెగెటివ్‌ షేడ్స్‌ ఉన్న పాత్రలు చేశారు. అలాంటి వాళ్లే నాకు స్ఫూర్తి. నటుడిగా నాకెంతో సంతృప్తినిచ్చిన పాత్ర భాస్కర్‌. ఆ పాత్రలో ఎన్నో ఎమోషన్సున్నాయి.
• విలువ కట్టలేని ప్రేమను తెలుగు ప్రేక్షకులు నాపై చూపిస్తున్నారు. దానికి తగ్గట్టే మంచి కథలు పడ్డాయి. అందుకే ఈ వరుస విజయాలు. అంతేతప్ప ప్లాన్‌ చేస్తే విజయాలు రావు. కష్టానికి ప్రతిఫలం దక్కినందుకు మాత్రం చాలా ఆనందంగా ఉంది.
• రిజల్ట్‌ విని వెంకీకి ఫోన్‌ చేసి మరీ నాన్న అభినందించారు. సూపర్‌స్టార్‌ మమ్ముట్టి కొడుకునైనా నా ఆలోచనలు మాత్రం సాధారణంగానే ఉంటాయి. తెలుగులో సినిమాలు చేస్తున్నానని తెలిశాక నాన్న నన్ను చాలా మెచ్చుకున్నారు. ‘బ్యూటిఫుల్‌ లాంగ్వేజ్‌.. చెయ్‌’ అని ఎంకరైజ్‌ చేశారు. తెలుగంటే ఆయనకు అంతిష్టం. ప్రస్తుతం తెలుగులో ‘ఆకాశంలో ఒక తార’ అనే సినిమా చేస్తున్నా. ఆ సినిమా కూడా చాలా బావుంటుంది.