ఊహించని అద్భుతాలెన్నో..

‘దర్శకుడ్ని కావాలనేది నా చిన్ననాటి కల. అందుకే చిన్న వయసులోనే చెన్నై రైలెక్కాను. ఎన్నో ఆటుపోటుల్ని ఎదుర్కొన్నాను. చివరకు ‘నీ కోసం’తో దర్శకుడ్ని అయ్యాను.

‘దర్శకుడ్ని కావాలనేది నా చిన్ననాటి కల. అందుకే చిన్న వయసులోనే చెన్నై రైలెక్కాను. ఎన్నో ఆటుపోటుల్ని ఎదుర్కొన్నాను. చివరకు ‘నీ కోసం’తో దర్శకుడ్ని అయ్యాను. ఆ సినిమా వచ్చి పాతికేళ్లు అయ్యిందంటే నమ్మలేక పోతున్నాను. ఆనాడు డైరెక్టర్‌ని అవ్వడమే నా లక్ష్యం. కానీ.. పాతికేళ్లు దర్శకుడిగా ఉంటానని మాత్రం అస్సలు అనుకోలేదు. నేను ఊహించని ఎన్నో అద్భుతాలు నా కెరీర్‌లో జరిగాయి.

ఈ అందమైన ప్రయాణానికి కారకులైన ప్రేక్షకులకు, నిర్మాతలకు, నా హీరోలకు థాంక్స్‌ చెప్పుకుంటున్నా’ అని దర్శకుడు శ్రీను వైట్ల అన్నారు. ఆయన తొలి సినిమా ‘నీ కోసం’ విడుదలై పాతికేళ్లు పూర్తయింది. ఈ సందర్భంగా శ్రీనువైట్ల విలేకరులతో ప్రత్యేకంగా ముచ్చటించారు. ‘నా తొలి సినిమా ‘నీకోసం’కి ముందు ఓ సినిమా మొదలై ఆగిపోయింది.

నిరుత్సాహానికి లోనయ్యాను. రవితేజ నా ఫ్రెండ్‌. నా టాలెంట్‌పై అతనికి చాలా నమ్మకం. తన ప్రోత్సాహంతో ఓ కథ రాశాను. చిన్న బడ్జెట్‌లో చేయాలనుకున్నా. కొందరు కొత్త నిర్మాతలు వచ్చారు. అలా ‘నీ కోసం’ మొదలైంది. కానీ మధ్యలోనే ఆగిపోయింది. రవితేజ ప్రోత్సాహంతో ఎలాగొలా పూర్తి చేశాను. రామోజీరావుగారికి సినిమా నచ్చి, మంచి రేటుకు కొనేసి రిలీజ్‌ చేశారు.

ఆ సినిమా బాగా ఆడటంతోపాటు ఏడు నంది అవార్డులను గెలుచుకుంది. ఆ తర్వాత రామోజీరావుగారు తమ సంస్థలో నాకు డైరెక్షన్‌ ఆఫర్‌ ఇచ్చారు. అదే ‘ఆనందం’. అప్పట్లో నాగార్జున కూడా ‘నీకోసం’ చూసి నన్ను అభినందించారు.’ అంటూ గుర్తు చేసుకున్నారు శ్రీనువైట్ల. త్వరలో ఓ కొత్త సబ్జెక్ట్‌తో రాబోతున్నానని, వివరాలు త్వరలోనే వెల్లడిస్తానని శ్రీనువైట్ల తెలిపారు.