భయాన్ని గౌరవించాలని చెప్పడమే దేవర కథ

99శాతం సక్సెస్‌ రేట్‌ ఉన్న దర్శకుడు కొరటాల శివ. రచయితగా కెరీర్‌ మొదలుపెట్టి, దర్శకుడిగా మారి, వరుస విజయాలను అందుకొని టాలీవుడ్‌ టాప్‌ దర్శకుల్లో ఒకరిగా నిలిచారు కొరటాల. బ్లాక్‌బాస్టర్‌ ‘జనతా గ్యారేజ్‌' తర్వాత ఎన్టీఆర్‌తో ఆయన చేసిన సినిమా ‘దేవర’.

99శాతం సక్సెస్‌ రేట్‌ ఉన్న దర్శకుడు కొరటాల శివ. రచయితగా కెరీర్‌ మొదలుపెట్టి, దర్శకుడిగా మారి, వరుస విజయాలను అందుకొని టాలీవుడ్‌ టాప్‌ దర్శకుల్లో ఒకరిగా నిలిచారు కొరటాల. బ్లాక్‌బాస్టర్‌ ‘జనతా గ్యారేజ్‌’ తర్వాత ఎన్టీఆర్‌తో ఆయన చేసిన సినిమా ‘దేవర’. నందమూరి కల్యాణ్‌రామ్‌ సమర్పణలో ఎన్టీఆర్‌ ఆర్ట్స్‌,, యువసుధ ఆర్ట్స్‌ పతాకాలపై మిక్కిలినేని సుధాకర్‌, హరికృష్ణ.కె రెండు భాగాలుగా ఈ సినిమాను నిర్మిస్తున్నారు. తొలిభాగం ఈ నెల 27న విడుదల కానుంది. ఈ సందర్భంగా మంగళవారం హైదరాబాద్‌లో కొరటాల శివ విలేకరులతో ముచ్చటించారు.

• రెండ్రోజుల్లో ‘దేవర’ రిలీజ్‌ కాబోతున్నది. పరీక్ష రాసి, ఫలితాలకోసం ఎదురుచూసే విద్యార్థి మానసిక పరిస్థితి ఎలావుంటుందో ప్రస్తుతం నా మానసిక పరిస్థితీ అలాగే ఉంది. ఈ ఫీల్‌ నా ప్రతి సినిమా రిలీజ్‌కూ ఉండేదే. జవాబుదారీతనం వల్లే వచ్చే భయం ఇది. ఈ భయం వల్లే మనం చేసే పనిని చెక్‌ చేసుకొని మంచి ఫలితాలు పొందుతాం.
• ‘దేవర’ సినిమా కూడా భయం చుట్టూనే తిరుగుతుంది. ప్రతి ఒక్కరిలో భయం కామన్‌. దాన్ని గౌరవించాలని చెప్పడమే ‘దేవర’ కథ. భయం లేకుండా బతకాలనుకోవడం తప్పు. మితిమీరిన ధైర్యం మూర్ఖత్వం అవుతుంది. లా ఆఫ్‌ ల్యాండ్‌ అనేది ఒకటి ఉంటుంది. దాన్ని అందరూ పాటించాలి. అదే భయం అంటే. ట్రాఫిక్‌ సిగ్నల్‌ పడుతుంది. అందరం ఆగుతాం. ఎందుకు ఆగాలి? వెళ్లిపోవచ్చుగా? మనలో బాధ్యతతో కూడిన చిన్నపాటి భయం ఉంటుంది. అది మనల్ని ముందుకు వెళ్లనివ్వదు.. ఆపేస్తుంది. ఆ భయం మనిషికి అవసరం. మంచిది కూడా. అదే ‘దేవర’లో చెప్పా.
• ‘దేవర’ను సెట్స్‌ పైకి తీసుకెళ్లడానికి ఆరు నెలలు టైమ్‌ తీసుకున్నాం. సముద్రంపై ఎలా షూట్‌ చేయాలి?.. కుదరకపోతే సముద్రాన్ని ఎలా క్రియేట్‌ చేసుకోవాలి?.. ఇలాంటి విషయాలపై స్టడీ చేశాం. ఈ తరహా సినిమాలు ఇప్పటివరకూ ఎవరూ చేయలేదు. దాంతో మాకు సలహాలిచ్చేవాళ్లు కూడా లేరు. అందుకే.. అన్ని విషయాలపై అవగాహన పెంచుకొని సినిమా మొదలుపెట్టాం.
• ఎన్టీఆర్‌తో ప్రయాణం నాకెప్పుడూ ప్రత్యేకమే. ఏ విషయమైనా ఆయనతో డిస్కస్‌ చేసినప్పుడు మనసులోని భావాన్ని నిర్మొహమాటంగా చెప్పేస్తారు. లోపల ఒకటి పెట్టుకొని బయటకు మరొకటి చెప్పే తత్వం కాదు తనది. ‘దేవర’ లైన్‌ చెప్పినప్పుడు ఆయన స్పందించిన తీరుతోనే ఈ సినిమా నెక్ట్స్‌ లెవల్‌కి వెళ్లింది. ఎన్టీఆర్‌కోసం మా టీమ్‌ అందరం చివరి నిమిషం వరకూ ఎంత ఎఫర్ట్‌ పెట్టాలో అంతా ఎఫర్ట్‌ పెట్టాం. ఇందులో తారక్‌ ద్విపాత్రాభినయం చేశారు. ఈ కథ రాసుకున్నప్పుడే రెండు పాత్రలకు తారక్‌ అనుకునే రాసుకున్నాను. తండ్రి ‘దేవర’.. కొడుకు ‘వర’. తండ్రి పాత్రను మించేలా కొడుకు పాత్ర ఉంటుంది. అలాగే జాన్వీకపూర్‌, సైఫ్‌ ఆలీఖాన్‌ తమ పాత్రలను అర్థం చేసుకొని అద్భుతంగా నటించారు. వాళ్ల గెటప్స్‌ విషయంలోనూ ప్రత్యేక శద్ధ తీసుకున్నాం.
• ‘దేవర’ నరేషన్‌ నాలుగు గంటలుంది. పేపర్‌ మీద పెట్టినప్పుడు 6-7 గంటలు వస్తున్నది. సెకండ్‌ షెడ్యూల్‌ టైమ్‌లోనే ఈ కథను మూడు గంటల్లో చెప్పలేమని అర్థమైంది. దాంతో రెండు భాగాల్లో చేయాలని నిర్ణయించాం. ఇది బిజినెస్‌ కోసమో, సెన్సేషన్‌ కోసమో చేసింది కాదు. లక్కీగా ‘దేవర’కు సాబు శిరిల్‌, రత్నవేలు, శ్రీకరప్రసాద్‌, అనిరుథ్‌ లాంటి లెజెండరీ టెక్నీషియన్స్‌ కుదిరారు. వారిలో ఎవరికీ స్పూన్‌ ఫీడింగ్‌ ఇవ్వాల్సిన పనిలేదు. అర్థం చేసుకొని అద్భుతమైన అవుట్‌పుట్‌ ఇచ్చారు. మొత్తంగా ‘దేవర’ ప్రేక్షకులందరికీ కన్నుల పండుగలా ఉంటుందని నమ్మకంతో చెప్పగలను.