Visit:
Venkatesh | టాలీవుడ్లో ప్రస్తుతం అత్యంత ఆసక్తి రేకెత్తిస్తున్న చిత్రాల్లో వెంకటేష్ – త్రివిక్రమ్ శ్రీనివాస్ కాంబినేషన్లో తెరకెక్కుతున్న ‘ఆదర్శ కుటుంబం హౌస్ నెం.47 (ఏకే47)’ ఒకటి. కుటుంబ కథా చిత్రాలకు కేరాఫ్ అడ్రస్గా నిలిచిన ఈ ఇద్దరి కలయికలో సినిమా వస్తుండటంతో ప్రేక్షకుల్లో భారీ అంచనాలు నెలకొన్నాయి. గతంలో ‘నువ్వు నాకు నచ్చావ్’, ‘మల్లీశ్వరి’ వంటి బ్లాక్బస్టర్ చిత్రాలకు త్రివిక్రమ్ అందించిన మాటలు ప్రేక్షకులను ఎంతగానో ఆకట్టుకున్నాయి. ఇప్పుడు చాలా సంవత్సరాల తర్వాత వెంకటేష్తో మరోసారి కలిసి పనిచేస్తుండటంతో ఈ ప్రాజెక్ట్పై ప్రత్యేక ఆసక్తి ఏర్పడింది.ఈ సినిమాలో వెంకటేష్ సరసన శ్రీనిధి శెట్టి హీరోయిన్గా నటిస్తోంది. ప్రస్తుతం హైదరాబాద్లో షూటింగ్ శరవేగంగా సాగుతోంది. కీలక సన్నివేశాలను చిత్రీకరిస్తున్న తరుణంలో సినిమాకు సంబంధించిన ఓ ఆసక్తికరమైన వార్త ఫిల్మ్నగర్లో చక్కర్లు కొడుతోంది.
ప్రముఖ వెబ్ సిరీస్ ‘సేవ్ ది టైగర్స్’ ద్వారా మంచి గుర్తింపు తెచ్చుకున్న నటి దేవయాని శర్మ ఈ చిత్రంలో ఓ కీలక పాత్రలో కనిపించనున్నట్లు సమాచారం. కథలో ఆమె పాత్రకు ప్రత్యేక ప్రాధాన్యత ఉంటుందని, సినిమా నడకలో ముఖ్యమైన మలుపులకు కారణమయ్యే పాత్రగా ఉండొచ్చని సినీ వర్గాలు చెబుతున్నాయి. అయితే ఆమె పాత్రకు సంబంధించిన పూర్తి వివరాలు మాత్రం ఇంకా గోప్యంగానే ఉంచారు.దేవయాని శర్మకు ఇది కెరీర్ పరంగా మరో పెద్ద అవకాశం కానుంది. ఇప్పటికే ‘సేవ్ ది టైగర్స్’ ద్వారా కుటుంబ ప్రేక్షకులకు చేరువైన ఆమె, ఇప్పుడు వెంకటేష్-త్రివిక్రమ్ వంటి క్రేజీ కాంబినేషన్ సినిమాలో నటించడం ద్వారా మరింత గుర్తింపు పొందే అవకాశాలు కనిపిస్తున్నాయి.
ఇదిలా ఉంటే, దేవయాని శర్మ నటించిన ‘సేవ్ ది టైగర్స్’ మూడో సీజన్ కూడా విడుదలకు సిద్ధమవుతోంది. ఇటీవల విడుదలైన ట్రైలర్కు మంచి స్పందన లభించింది. జూన్ 19 నుంచి ఈ సిరీస్ ప్రేక్షకుల ముందుకు రానుండగా, గత రెండు సీజన్ల మాదిరిగానే ఈసారి కూడా వినోదభరితంగా ఉండబోతుందని భావిస్తున్నారు.ఈ చిత్రాన్ని ప్రముఖ నిర్మాత ఎస్. రాధాకృష్ణ (చినబాబు) నిర్మిస్తున్నారు. వెంకటేష్, శ్రీనిధి శెట్టితో పాటు నారా రోహిత్, పూజిత పొన్నాడ, రావు రమేష్, బ్రహ్మాజీ తదితరులు కీలక పాత్రల్లో నటిస్తున్నారు. సంగీతాన్ని హర్షవర్ధన్ రామేశ్వర్ అందిస్తున్నారు. కుటుంబ భావోద్వేగాలు, వినోదం, త్రివిక్రమ్ మార్క్ సంభాషణలు, వెంకటేష్ నటన ప్రధాన ఆకర్షణలుగా రూపొందుతున్న ఈ సినిమాపై ఇప్పటికే భారీ అంచనాలు ఉన్నాయి. ఇప్పుడు దేవయాని శర్మ ఎంట్రీ వార్తతో సినిమాపై మరింత ఆసక్తి పెరిగింది. విడుదల తేదీతో పాటు ఇతర వివరాలను చిత్ర బృందం త్వరలో అధికారికంగా ప్రకటించే అవకాశం ఉంది.
