Kishkindhapuri Review | ‘కిష్కింధపురి’ రివ్యూ.. ‘రాక్షసుడు’ జోడి మరో హిట్ కొట్టిందా?

Kishkindhapuri | యువ క‌థానాయకుడు బెల్లంకొండ శ్రీనివాస్ ప్ర‌ధాన పాత్ర‌లో న‌టించిన తాజా చిత్రం ‘కిష్కింధపురి’ ఈ సినిమాకు కౌశిక్ పెగల్లపాటి దర్శకత్వం వహించగా.. ఈ చిత్రంలో అనుపమ పరమేశ్వరన్ హీరోయిన్‌గా నటించింది.

Kishkindhapuri | మెయిన్ స్ట్రీమ్ హీరోలు హారర్ సినిమాల జోలికి వెళ్ళరు. ఈ జానర్ కి లిమిటెడ్ ఆడియన్స్ వుండటం దీనికి కారణం. అయితే సరైన హారర్ ఫిల్మ్ తీయగలిగితే ఆడియన్స్ థియేటర్స్ కి క్యూ కడతారని ‘మసూద’ లాంటి చిత్రాలు నిరూపించాయి. మాస్ కమర్షియల్ సినిమాలు ఎక్కువ చేసే బెల్లంకొండ సాయి శ్రీనివాస్ ఇప్పుడు తొలిసారిగా హార‌ర్ సినిమా చేశారు. అదే.. ‘కిష్కింధ‌పురి’. అనుప‌మ హీరోయిన్. ‘రాక్షసుడు’ త‌ర్వాత ఆ ఇద్దరూ క‌లిసి న‌టించిన చిత్రమిది. థ్రిల్లర్ జానర్ లో వచ్చిన రాక్షసుడు బెల్లంకొండ కెరీర్ మరో మంచి హిట్. ఇప్పుడు హారర్ జానర్ తో వచ్చిన ఈ జోడి మరో విజయాన్ని అందుకుందా? కిష్కింధ‌పురిలోని హారర్ ఆడియన్స్ ని ఎంతలా థ్రిల్ చేసింది? రివ్యూలో చూద్దాం.

కథ:
రాఘవ్‌ (బెల్లంకొండ సాయి శ్రీనివాస్), మైథిలి (అనుపమ) ఘోస్ట్ వాకింగ్ పేరుతో హాంటెడ్ హౌస్ టూర్స్‌ నిర్వహిస్తుంటారు. అలా 11 మందితో కలిసి పాడుబడిన సువర్ణమాయ రేడియో స్టేషన్‌కి వెళ్తారు. అక్కడ వేదవతి అనే ఆత్మ వాయిస్ వినిపిస్తుంది. లోపలికొచ్చిన వారందరినీ వదిలిపెట్టనని హెచ్చరిస్తుంది. ఆ తర్వాత ఏం జరిగింది? అసలు వేదవతి ఎవరు? ఎందుకు ఆత్మగా మారింది? సువర్ణమాయ నుంచి బయటపడటానికి రాఘువ్ ఎలాంటి ప్రయత్నాలు చేశాడనేది మిగతా కథ

విశ్లేషణ:
హారర్ సినిమాలు చాలానే వచ్చాయి. థ్రిల్లర్ మూవీస్ కి తెలుగులో సఫరేట్ ఫ్యాన్ బేస్ వుంది. కానీ హారర్–థ్రిల్లర్ మిక్స్‌డ్ జానర్ మాత్రం తెలుగు తెరపై చాలా అరుదు. ప్రేక్షకుడిని ఒకవైపు భయపెట్టేస్తూ, మరోవైపు సీన్ తర్వాత సీన్ ఏం జరుగుతుందో అంచనా వేయలేని టెన్షన్‌కి గురిచేయడం ఈ జానర్ ప్రత్యేకత. ఈ కొత్త జానర్ ని ప్రయత్నించింది కిష్కిందపురి. ఈ ఆత్మకథ రొటీన్ టెంప్లెట్ లో వున్నప్పటికీ హారర్–థ్రిల్లర్ ని మిళితం చేయడం ఫ్రెష్ నెస్ తీసుకొచ్చింది.

మొదటి15 నిమిషాలు సమయం టేకాఫ్ కి తీసుకున్నా సువర్ణమాయ రేడియో స్టేషన్‌ లోకి వెళ్ళిన తర్వాత హారర్ థ్రిల్ టాప్ గేర్ లో పడుతుంది. సువర్ణమాయ బ్యాక్ డ్రాప్, భయపెట్టే సన్నివేశాలు, సౌండ్ ఎఫెక్ట్స్, టెర్రిఫిక్ విజువల్స్‌తో సినిమా ఎంగేజింగ్ గా మారుతుంది. ఇంటర్వెల్లో మంచి ట్విస్ట్ కుదిరింది. హారర్ సినిమాలో ప్రధాన ఇబ్బంది దెయ్యం కథ రివిల్ అయిపోయాక ట్రీట్మెంట్ ఊహకు అందిపోతుంది. కిష్కింధ‌పురిలో కూడా అదే జరిగింది. అయితే కొన్ని ట్విస్టులు మాత్రం చివరి వరకూ ప్రేక్షకుడిని లీనం చేయగలిగాయి.

పెర్ఫార్మెన్స్: బెల్లంకొండ శ్రీనివాస్ కి ఇది కొత్త జోన‌ర్‌. తన ప్రజెన్స్ కూడా రొటీన్ కి భిన్నంగా వుంది. హారర్ సన్నివేశాల్లో తన నటన ప్రత్యేకంగా నిలిస్తుంది. అనుప‌మ సర్ ప్రైజ్ చేస్తుంది. మైథిలి క్యారెక్టర్ దెయ్యంగా మారే తీరు నిజంగా భయపెడుతుంది. హైప‌ర్ ఆది, సుద‌ర్శన్ సినిమా బిగినింగ్ లో ఫన్ యాడ్ చేయాలని చూశారు కానీ అది వర్క్ అవుట్ కాలేదు. మ‌క‌రంద్ దేశ్‌పాండే, త‌నికెళ్ల భ‌ర‌ణి తమ పాత్రలకు న్యాయం చేశారు. ప్రేమ నటన ప్రత్యేకంగా వుంటుంది. అలాగే శాండీ మాస్టర్ కూడా ఆకట్టుకున్నారు.

టెక్నికల్ గా: సాంకేతికంగా సినిమాకి మంచి మార్కులు పడతాయి. హారర్ సినిమాకి కావాల్సిన బెస్ట్ విజువ‌ల్స్, సౌండ్ డిజైన్ ఇందులో కుదిరింది. బ్యాగ్ గ్రౌండ్ స్కోర్ హటింగ్ గా వుంటుంది. పాటలకు పెద్ద స్కోప్ లేదు. ఆరంభంలో వచ్చే పాట కూడా కాస్త అడ్డుగానే వుంటుంది. రెండుగంటల ఐదు నిమిషాల నిడివివున్న సినిమా ఇది. ఈ షార్ఫ్ రన్ సినిమాకి కలిసొచ్చింది. ఇలాంటి సినిమాలకి లిమిటెడ్ బడ్జెట్ లు వుంటాయి. కానీ నిర్మాత సాహుగార పాటి ఎక్కడా రాజీపడకుండా కథకు తగ్గ బడ్జెట్ పెట్టడం తెరపై కనిపిస్తుంది. ద‌ర్శకుడు కౌశిక్ హారర్ థ్రిల్లర్ మేళవింపుతో ఈ కథ చెప్పడం కొత్తదనం తీసుకొచ్చింది. తన టేకింగ్ బావుంది. హారర్ సినిమాలని ఇష్టపడే ఆడియన్స్ కి నచ్చేసే సినిమా ఇది.

ప్లస్ పాయింట్స్
బెల్లంకొండ, అనుపమ నటన
హారర్ థ్రిల్లర్ ఎలిమెంట్స్
టాప్ టెక్నికల్ వాల్యూస్

మైనస్ పాయింట్స్
ఆత్మ బ్యాక్ స్టొరీ
సెకండ్ హాఫ్ లో కొన్ని సీన్స్

రేటింగ్: 3/5