Visit:
AR Rahman | ప్రముఖ సంగీత దర్శకుడు ఏఆర్ రెహమాన్ కుమారుడు, సింగర్ ఏఆర్ అమీన్ రోడ్డు ప్రమాదానికి గురైన సంగతి తెలిసిందే. చెన్నైలోని గిండి కత్తిపర ఫ్లైఓవర్ సమీపంలో సోమవారం తెల్లవారుజామున ఈ ప్రమాదం చోటుచేసుకుంది. అయితే ఈ ప్రమాదంలో అమీన్ సురక్షితంగా బయటపడ్డారు. ఈ ఘటనపై స్వయంగా అమీన్ స్పందిస్తూ తాను పూర్తిగా క్షేమంగా ఉన్నానని అభిమానులకు, శ్రేయోభిలాషులకు తెలిపారు. మరోవైపు ఈ ప్రమాదంపై ఆయన సోదరి ఖతీజా రెహమాన్ స్పందిస్తూ.. అసత్య ప్రచారాలు నమ్మవద్దని, మీడియా సంస్థలు వాస్తవాలు నిర్ధారించుకున్న తర్వాతే వార్తలు ప్రసారం చేయాలని కోరారు.
ప్రమాదం జరిగిన సమయంలో అమీన్ తన స్నేహితుడి కారులో ప్రయాణిస్తున్నారని, ఆయన డ్రైవింగ్ చేయట్లేదని, కేవలం ప్యాసింజర్ సీట్లో కూర్చున్నారని ఖతీజా స్పష్టం చేశారు. ట్రాఫిక్ సిగ్నల్ రెడ్ కలర్లోనే ఉన్నప్పటికీ ముందున్న మరొక వాహనం ముందుకు కదలడంతో ఈ చిన్నపాటి ఢీకొనే ప్రమాదం జరిగిందని వివరించారు. ఈ ఘటనలో అమీన్, ఆయన స్నేహితుడితో పాటు అవతలి వాహనంలో ఉన్నవారందరూ సురక్షితంగా ఉన్నారని తెలిపారు. తమ కుటుంబ సభ్యులపై, శ్రేయోభిలాషులపై ఉన్న ప్రార్థనల వల్ల అందరూ క్షేమంగా బయటపడ్డారని అమీన్ పేర్కొన్నారు. తన నానమ్మ, తండ్రి ఏఆర్ రెహమాన్, జి.వి. ప్రకాష్ కుమార్ ఆశీస్సులు, నేర్పించిన విలువలే తనను కాపాడుతున్నాయని ఆయన భావోద్వేగానికి గురయ్యారు. కాగా, ఇటీవల రామ్ చరణ్ చిత్రంలోని ‘చికిరి చికిరి’ తమిళ వెర్షన్కు అమీన్ తన గొంతును అందించారు. అలాగే దుల్కర్ సల్మాన్, మృణాల్ ఠాకూర్ నటించిన ‘భీగీ భీగీ’ ఇండిపెండెంట్ సింగిల్కు జాస్లిన్ రాయల్తో కలిసి పనిచేశారు.
