Anweshippin Kandethum | ఈ మధ్య కాలంలో మలయాళ సినిమాలకు తెగ డిమాండ్ ఏర్పడుతుంది. ప్రేక్షకులు కూడా మలయాళ సినిమా అనగానే భాషతో సంబంధంలేకుండా సబ్ టైటిల్స్ పెట్టుకుని మరీ చూస్తున్నారు. ఇక కొందరు టాలీవుడ్ ప్రేక్షకులైతే ఏకంగా థియేటర్కు వెళ్లి మరీ మలయాళ సినిమాలను చూస్తున్నారు. ఇటీవలే రిలీజైన ‘ప్రేమలు‘, ‘భ్రమయూగం‘, ‘అంజుమల్ బాయ్స్‘ సినిమాలకైతే ప్రేక్షకులు ఎగబడి మరి థియేటర్కు వెళుతున్నారు. ఈ క్రమంలోనే మలయాళం నుంచి వచ్చి హిట్ అందుకున్న తాజా చిత్రం ‘అన్వేషిప్పిన్ కండేతుమ్’ (Anweshippin Kandethum).
మాలయాళ స్టార్ హీరో టోవినో థామస్ హీరోగా వచ్చిన ఈ సినిమాను డార్విన్ కురియకోస్ దర్శకత్వం వహించాడు. ఫిబ్రవరి 9న ప్రేక్షకుల ముందుకు వచ్చిన ఈ చిత్రం క్రైమ్ థ్రిల్లర్గా వచ్చి మంచి విజయాన్ని అందుకుంది. ఇక థియేటర్ ప్రేక్షకులను అలరించిన ఈ చిత్రం తాజాగా ఓటీటీ లాక్ చేసుకుంది. ప్రముఖ ఓటీటీ ప్లాట్ఫామ్ నెట్ఫ్లిక్స్ వేదికగా ఈ చిత్రం మార్చి 08 నుంచి స్ట్రీమింగ్ కానున్నట్లు చిత్రయూనిట్ ప్రకటించింది. మలయాళంతో పాటు తెలుగు, తమిళ, కన్నడ, హిందీ భాషల్లో ఈ చిత్రం స్ట్రీమింగ్ కానుంది.
Anweshanathinaayi varunnu Anand and team 🚔 🔍
Anweshippin Kandethum, coming to Netflix on 8 March in Malayalam, Tamil, Telugu, Kannada and Hindi. #AnweshippinKandethumOnNetflix pic.twitter.com/j80BlUezg4— Netflix India South (@Netflix_INSouth) March 1, 2024
ఈ సినిమా కథ విషయానికి వస్తే.. కేరళలోని కొట్టాయం చింగవనం పోలీస్ స్టేషన్లో కొత్త సబ్ ఇన్స్పెక్టర్గా బాధ్యతలు తీసుకుంటాడు ఆనంద్ నారాయణ (టోవినో థామస్). అయితే అతడు వచ్చి రాగానే ఆనంద్కు రెండు హత్య కేసులను పరిష్కరించే బాధ్యత డిపార్ట్మెంట్ అప్పగిస్తుంది. అయితే ఆనంద్ కనుకోవాల్సిన హత్యలు ఎవరు చేశారు? ఎందుకు చేశారు? అన్న విషయాలను ఆనంద్ తెలుసుకున్నా, వాటిని బయటపెట్టలేని పరిస్థితి వస్తుంది. ఈ క్రమంలో ఆనంద్కు ఎలాంటి పరిస్థితులు ఎదురయ్యాయి? వాటిని ఎలా ఎదుర్కొన్నాడు? అనేది తెలియాలంటే సినిమా చూడాల్సిందే.
టోవినో థామస్ ప్రధాన పాత్రలో నటించిన ఈ సినిమాలో ఇంద్రన్స్, సిద్ధిక్, హరిశ్రీ అశోక్, షమ్మీ తిలకన్, మధుపాల్, కొట్టాయం నసీర్, బాబురాజ్, అజీజ్ నెడుమంగడ్, ప్రేమ్ ప్రకాష్, ప్రమోద్ వెలియనద్, రాహుల్ రాజగోపాల్ తదితరులు కీలక పాత్రలు పోషించారు.