Amitabh Bachchan | నేను మ్యాచ్ చూడలేదు అందుకే గెలుపు.. టీమ్ ఇండియా విజయం పై అమితాబ్ బచ్చన్ ఆసక్తికర ట్వీట్

Amitabh Bachchan | అహ్మదాబాద్‌లోని నరేంద్ర మోదీ స్టేడియంలో మార్చి 8న జరిగిన టీ20 ప్రపంచకప్ ఫైనల్ మ్యాచ్‌లో భారత్ చారిత్రాత్మక విజయాన్ని నమోదు చేసింది. న్యూజిలాండ్‌పై 96 పరుగుల భారీ తేడాతో గెలిచిన టీమ్ ఇండియా వరుసగా రెండోసారి ప్రపంచ ఛాంపియన్‌గా నిలిచింది. ఈ అద్భుత విజయంపై దేశవ్యాప్తంగా ఆనందం వెల్లువెత్తుతుండగా సోషల్ మీడియాలో కూడా ప్రశంసల వర్షం కురుస్తోంది.

Amitabh Bachchan | అహ్మదాబాద్‌లోని నరేంద్ర మోదీ స్టేడియంలో మార్చి 8న జరిగిన టీ20 ప్రపంచకప్ ఫైనల్ మ్యాచ్‌లో భారత్ చారిత్రాత్మక విజయాన్ని నమోదు చేసింది. న్యూజిలాండ్‌పై 96 పరుగుల భారీ తేడాతో గెలిచిన టీమ్ ఇండియా వరుసగా రెండోసారి ప్రపంచ ఛాంపియన్‌గా నిలిచింది. ఈ అద్భుత విజయంపై దేశవ్యాప్తంగా ఆనందం వెల్లువెత్తుతుండగా సోషల్ మీడియాలో కూడా ప్రశంసల వర్షం కురుస్తోంది. సినీ, క్రీడా, రాజకీయ రంగాలకు చెందిన ప్రముఖులు భారత జట్టుకు శుభాకాంక్షలు తెలియజేస్తున్నారు. బాలీవుడ్ ప్రముఖులు కూడా సోషల్ మీడియా ద్వారా టీమ్ ఇండియాను అభినందిస్తున్నారు. అయితే బాలీవుడ్ మెగాస్టార్ అమితాబ్ బచ్చన్ మాత్రం ఈ విజయంపై కొంచెం భిన్నంగా స్పందించి అందరి దృష్టిని ఆకర్షించాడు.

భారత్ విజయం సాధించిన తర్వాత అర్ధరాత్రి సమయం వద్ద అమితాబ్ బచ్చన్ తన సోషల్ మీడియా ఖాతాలో ఒక ఆసక్తికరమైన పోస్ట్ చేశారు. టెలివిజన్ స్క్రీన్ ఫోటోను షేర్ చేస్తూ “నేను మ్యాచ్ చూడకపోతే భారత్ గెలుస్తుందని ముందే చెప్పాను.. అలాగే జరిగింది” అని సరదాగా వ్యాఖ్యానించాడు. తాను లైవ్‌లో మ్యాచ్ చూస్తే టీమ్ ఇండియాకు అదృష్టం కలిసిరాదనే ఒక సెంటిమెంట్ తనకు ఉందని అమితాబ్ బచ్చన్ గతంలో కూడా పలుమార్లు వెల్లడించారు. అదే కారణంగా ఈ ఫైనల్ మ్యాచ్‌ను కూడా తాను చూడలేదని ఆయన సరదాగా పేర్కొన్నారు. ప్రస్తుతం ఈ ట్వీట్ సోషల్ మీడియాలో వైరల్ అవుతోంది. అమితాబ్ బచ్చన్ ట్వీట్‌పై నెటిజన్లు కూడా సరదాగా స్పందిస్తున్నారు. “మీరు చేసిన త్యాగం గొప్పది సర్.. ఇకపై కూడా ఇలా మ్యాచ్ చూడకుండా ఉండండి” అంటూ కొందరు కామెంట్లు చేస్తుండగా, “మేము కూడా మ్యాచ్ చూడలేదు.. అందుకే భారత్ గెలిచింది” అంటూ మరికొందరు స్పందిస్తున్నారు.

ఇక భారత జట్టు విజయంపై పలువురు బాలీవుడ్ తారలు కూడా తమ ఆనందాన్ని వ్యక్తం చేశారు. షారుక్ ఖాన్ టీమ్ ఇండియాను అభినందిస్తూ “ఎంతటి అద్భుత విజయం! మెన్ ఇన్ బ్లూ అద్భుతంగా ఆడారు. మైదానంలో మీ ఆటను చూస్తుంటే గర్వంగా ఉంది. జై హింద్!” అని వ్యాఖ్యానించాడు.అజయ్ దేవగన్ కూడా స్పందిస్తూ “అరిచి అరిచి గొంతు పోయింది.. కానీ ఈ ఆనందం మాత్రం ఇంకా తగ్గలేదు. కోట్లాది భారతీయుల గుండెల్లో గర్వాన్ని నింపారు” అని టీమ్ ఇండియాను ప్రశంసించాడు. అక్షయ్ కుమార్ కూడా తన సోషల్ మీడియా ద్వారా భారత జట్టుకు అభినందనలు తెలియజేశాడు. తన రాబోయే సినిమా నుంచి ఒక డ్యాన్స్ విజువల్‌ను షేర్ చేస్తూ “ఇప్పుడు ప్రతి ఇంట్లోనూ ఇదే పండుగ వాతావరణం. వరల్డ్ కప్‌ను భారత్‌కు తీసుకువచ్చినందుకు ధన్యవాదాలు” అని తెలిపాడు.