య‌స్ బ్యాంక్ స్కామ్‌.. ప్రైవేట్ ద‌వాఖాన‌కు దివాన్ ప్ర‌మోట‌ర్

య‌స్ బ్యాంక్ స్కామ్‌.. ప్రైవేట్ ద‌వాఖాన‌కు దివాన్ ప్ర‌మోట‌ర్ య‌స్‌బ్యాంక్ కుంభ‌కోణంలో నిందితుడు, డీహెచ్ఎఫ్ఎల్‌ ప్ర‌మోట‌ర్ ధీర‌జ్ వాధ్వాన్ (43)ను...

June 1, 2021 / 11:25 PM IST

ముంబై: ప్రైవేట్ బ్యాంక్ య‌స్‌బ్యాంక్ కుంభ‌కోణంలో నిందితుడు దివాన్ హౌసింగ్ ఫైనాన్స్ కార్పొరేష‌న్ (డీహెచ్ఎఫ్ఎల్‌) ప్ర‌మోట‌ర్ ధీర‌జ్ వాధ్వాన్ (43)ను ముంబైలోని ప్రైవేట్ ద‌వాఖాన‌కు త‌ర‌లించాల‌ని త‌లోజా జైలు అధికారుల‌ను పీఎంఎల్ఏ కోర్టు ఆదేశించింది. త‌న‌కు వైద్య చికిత్స అవ‌స‌ర‌మ‌ని ద‌వాఖానకు త‌ర‌లించాల‌ని ధీర‌జ్ వాధ్వాన్ పిటిష‌న్ దాఖ‌లు చేశాడు.

ముంబైలోని కోకిలాబెన్ ధీరూభాయి అంబానీ హాస్పిట‌ల్‌లో చికిత్స అందించాల‌ని పీఎంఎల్ఏ కోర్టు ఆదేశించింది. అయితే, అందుకు అయ్యే ఖ‌ర్చు ధీర‌జ్ వాధ్వాన్ భ‌రించాల్సి ఉంటుంద‌ని స్ప‌ష్టం చేసింది. ద‌వాఖాన వ‌ద్ద 24/7 గంట‌ల పాటు పోలీసుల‌ను నియ‌మించాల‌ని జైలు అధికారుల‌ను ఆదేశించింది.

ఇంత‌కుముందు తాత్కాలిక మెడిక‌ల్ బెయిల్ కావాల‌ని పిటిష‌న్ దాఖ‌లు చేశాడు. కానీ ఆయ‌న త‌ర‌పు న్యాయ‌వాదులు మంగ‌ళ‌వారం బెయిల్ కోసం ప‌ట్టు ప‌ట్ట‌లేదు. చికిత్స కోసం ప్రైవేట్ ద‌వాఖానకు త‌ర‌లించాల‌ని ధీర‌జ్ వాధ్వాన్ న్యాయ‌వాది రోహ‌న్ ద‌క్షిణి కోరారు.

ఇప్ప‌టికే గాల్ బ్లాడ‌ర్‌లో రాళ్ల తొల‌గింపున‌కు శ‌స్త్ర చికిత్స చేసినా అది ఆయ‌న కిడ్నీల‌కు ఇన్‌ఫెక్ష‌న్ అయ్యింది. దీంతో నెల రోజుల‌కు పైగా కెమ్ ద‌వాఖాన‌లో చికిత్స పొందుతున్నాడు.