సెక్షన్‌తో సేవ్‌ చేద్దాం.. ఏయే రుణాలపై ఎలా పన్ను ఆదా?

ఆదాయ పన్ను (ఐటీ) చట్టంలోని వివిధ సెక్షన్లు.. ఆయా రుణాలపై పన్ను ప్రయోజనాలను అందిస్తున్నాయి.

ఆదాయ పన్ను (ఐటీ) చట్టంలోని వివిధ సెక్షన్లు.. ఆయా రుణాలపై పన్ను ప్రయోజనాలను అందిస్తున్నాయి. గృహ, విద్య, వాహన, వ్యక్తిగత రుణగ్రహీతలకు ఇవి లాభిస్తున్నాయి. ఆ వివరాల్లోకి వెళ్తే..

గృహ రుణం

• ఇంటి కొనుగోలు, నిర్మాణం, పునర్నిర్మాణం లేదా మరమ్మతుల కోసం రుణాన్ని తీసుకుంటే దానికిగాను చెల్లించే వడ్డీకి సెక్షన్‌ 24(బీ) కింద పన్ను మినహాయింపు పొందవచ్చు.
• కమర్షియల్‌, రెసిడెన్షియల్‌ ప్రాపర్టీలు రెండింటికీ ఈ ప్రయోజనం వర్తిస్తుంది.
• గృహ రుణం కోసం ప్రాసెసింగ్‌ ఫీజు, ప్రీ-పేమెంట్‌ చార్జీల చెల్లింపులనూ వడ్డీగానే పరిగణిస్తారు. దీంతో అర్హులైతే దీనికీ పన్ను మినహాయింపు లాభం చేకూరుతుంది.
• బ్యాంకులు, స్నేహితులు, బంధువుల నుంచి అప్పు తీసుకున్నా ఐటీ మినహాయింపులను క్లెయిమ్‌ చేసుకోవచ్చు. అయితే ఇంటి కొనుగోలు, నిర్మాణం తదితర అవసరాలకే రుణం తీసుకున్నానని నిరూపించుకోవాల్సి ఉంటుంది.
• పాత పన్ను విధానం కింద నివాస గృహం నిర్మాణం లేదా కొనుగోలుకు తీసుకునే గృహ రుణంలో అసలు చెల్లింపులకూ సెక్షన్‌ 80సీ ద్వారా రూ.1.50 లక్షలదాకా పన్ను మినహాయింపున్నది.
• అప్పు ద్వారా నిలబెట్టుకున్న స్థిరాస్తిని మీ నివాసంగా వినియోగిస్తున్నారా? అద్దెకు ఇస్తున్నారా? అన్నదీ కీలకమే. అలాగే మీరు ఎంచుకున్న పాత, కొత్త పన్ను విధానాలపైనా ప్రయోజనాలు ఆధారపడి ఉంటాయి.

విద్యా రుణం

• ఉన్నత విద్య కోసం తీసుకునే విద్యా రుణంపై ఏటా చెల్లించే వడ్డీకి సెక్షన్‌ 80ఈ కింద పన్ను మినహాయింపు.
• రుణంలో కేవలం వడ్డీ చెల్లింపులకే పన్ను మినహాయింపులను క్లెయిమ్‌ చేసుకోవచ్చు. అసలు మొత్తాలకు వర్తించవు.
• వడ్డీ చెల్లింపులను మొదలు పెట్టిన ఏడాది నుంచి గరిష్ఠంగా 8 ఏండ్లపాటే క్లెయిములు చెల్లుబాటు అవుతాయి.
• భాగస్వాములు, పిల్లలు లేదా మీరు ఎవరి కోసమైతే సంరక్షకులుగా వ్యవహరిస్తున్నారో వారి విద్య కోసం రుణాలు తీసుకున్నా పన్ను మినహయింపులను డిమాండ్‌ చేయవచ్చు.

వాహన రుణం

• ఉద్యోగులు ఏదైనా వాహన రుణం తీసుకుంటే పన్ను ప్రయోజనాలను కోరలేరు. వ్యాపారం లేదా వృత్తి కోసం వాడుకునేందుకు వాహనాన్ని ఆటో లోన్‌ ద్వారా కొంటే ట్యాక్స్‌ డిడక్షన్స్‌ను తీసుకోవచ్చు.
• ట్యాక్సీ వ్యాపారులకూ వాహన రుణాలపై పన్ను మినహాయింపులు వర్తిస్తాయి.

వ్యక్తిగత రుణం

వ్యక్తిగత రుణాలపై ఎలాంటి పన్ను ప్రయోజనాలనూ క్లెయిమ్‌ చేసుకోలేము. అయితే వ్యక్తిగత రుణాలను స్థిరాస్తి, వ్యాపార ఆస్తుల కోసం వాడితే రుణం వడ్డీ చెల్లింపులపై ఆదాయ పన్ను మినహాయింపులను కోరవచ్చు.