Twitter new policy | మరో బాదుడుకు సిద్ధమైన ట్విట్టర్‌.. ఖాతా భద్రతకు కూడా రుసుం చెల్లించాలి

మరోసారి వినియోగదారులను బాదేందుకు ట్విట్టర్‌ సిద్ధమైంది. ఈసారి భద్రత పేరు చెప్తున్నది. ఇందుకు నెలకు రూ.910 చెల్లించాల్సి ఉంటుంది. ఇప్పటికే బ్లూ సబ్‌స్క్రిప్షన్‌ పేరిట రూ.650 వసూలు చేస్తున్నది.

Twitter new policy | నష్టాలను నివారించుకునేందుకు ట్విట్టర్‌ సంస్థ ఎన్నో కొత్త పాలసీలను తీసుకొస్తున్నది. ఇప్పటికే హెడ్‌క్వార్టర్స్‌లో ఉన్న వివిధ వస్తువులను వేలానికి పెట్టిన ట్విట్టర్‌ సంస్థ.. తమ ఉద్యోగులకు ఇచ్చే బెనిఫిట్స్‌ తగ్గించివేసింది. ఉద్యోగుల్లో కోతను విధించిన ట్విట్టర్‌ సంస్థ.. బ్లూ టిక్‌ కోసం రుసుం చెల్లించాలని వినియోగదారులను ముక్కుపిండి మరీ వసూలు చేస్తున్నది. తాజాగా మరో కొత్త పాలసీతో డబ్బులు దండుకోవడానికి ముందుకు వచ్చింది.

రెండు ఫ్యాక్టర్‌ ఆథెంటికేషన్‌ (2ఎఫ్‌ఏ) విధానానికి సంబంధించి ట్విట్టర్‌ కొత్త ప్రకటన చేసింది. వినియోగదారులు తమ ఖాతాలను భద్రపరుచుకునేందుకు రెండు కారకాల ఆథెంటికేషన్‌ పద్ధతిగా టెక్స్ట్‌ సందేశాలను పంపేందుకు ఉపయోగించడానికి ఇప్పుడు పెయిడ్‌ సబ్‌స్క్రైబర్లను మాత్రమే అనుమతిస్తామని వెల్లడించింది. ఈ పద్ధతి కింద బ్లూ టిక్‌ సబ్‌స్క్రైబర్లు మాత్రమే మార్చి 20 నుంచి టెక్స్ట్‌ మెసేజ్‌లను వారి 2ఎఫ్‌ఏ పద్ధతిగా ఉపయోగించుకునేందుకు అనుమతిస్తున్నట్లు తెలిపింది. ఇతర ఖాతాల వారు 2ఎఫ్‌ఏ ప్రమాణీకరణ యాప్‌ లేదా సెక్యూరిటీ కీని ఉపయోగించవచ్చునని పేర్కొన్నది.

ఇంతకుముందు, ఫోన్ నంబర్ ఆధారిత 2ఎఫ్‌ఏను హ్యాకర్లు దుర్వినియోగం చేస్తున్నారని నమ్ముతున్నట్లు కంపెనీ బుధవారం ఒక బ్లాగ్ పోస్ట్‌లో తెలిపింది. ఒక సబ్‌స్క్రైబర్‌ చేసిన ట్వీట్‌కు సమాధానంగా కంపెనీ తన విధానాన్ని మార్చుకున్నట్లు ట్విట్టర్ యజమాని ఎలాన్ మస్క్ ఇటీవల చెప్పారు. గత నెలలో ఆండ్రాయిడ్ కోసం ట్విట్టర్ బ్లూ సబ్‌స్క్రిప్షన్‌ ధరను నెలకు 11 (రూ. 910) అమెరికన్‌ డాలర్లుగా ఉంచుతామని ట్విట్టర్ పేర్కొన్నది. ఈ ఏడాది చివరికల్లా ట్విట్టర్‌ను ఆర్థికంగా బలోపేతం చేయాలని ఎలాన్‌ మస్క్‌ అనుకుంటున్నారు. సంస్థ ఆదాయాన్ని పెంచుకోవడానికి బ్లూ సబ్‌స్క్రిప్షన్‌ వంటి కొన్ని సేవలను సవరించారు. భారతదేశంలోని వెబ్‌ వినియోగదారులు ఈ సేవలను పొందేందుకు నెలకు రూ.650 సభ్యత్వ రుసుం చెల్లించాలి.