రూ.1.76 లక్షల కోట్లు.. ఈ ఏడాది వచ్చిన 103 ఐపీవోలు

దేశీయ స్టాక్‌ మార్కెట్లలో ఈ ఏడాది ఐపీవోల జాతర నడిచింది. మునుపెన్నడూ లేనివిధంగా నిధుల సమీకరణ జరిగింది. 2025లో 103 ఇనీషియల్‌ పబ్లిక్‌ ఆఫర్‌ (ఐపీవో)లు రాగా.. ఆల్‌టైమ్‌ హైలో రూ.1.76 లక్షల కోట్ల ఫండ్స్‌ను ఆయా కంపెనీలు చేజిక్కించుకున్నాయని ఐపీవో సెంట్రల్‌ తాజా గణాంకాలు చెప్తున్నాయి.

• రికార్డు స్థాయిలో నిధులు సమీకరించిన సంస్థలు

న్యూఢిల్లీ, డిసెంబర్‌ 23 : దేశీయ స్టాక్‌ మార్కెట్లలో ఈ ఏడాది ఐపీవోల జాతర నడిచింది. మునుపెన్నడూ లేనివిధంగా నిధుల సమీకరణ జరిగింది. 2025లో 103 ఇనీషియల్‌ పబ్లిక్‌ ఆఫర్‌ (ఐపీవో)లు రాగా.. ఆల్‌టైమ్‌ హైలో రూ.1.76 లక్షల కోట్ల ఫండ్స్‌ను ఆయా కంపెనీలు చేజిక్కించుకున్నాయని ఐపీవో సెంట్రల్‌ తాజా గణాంకాలు చెప్తున్నాయి. భారీ, మధ్య, చిన్నశ్రేణి సంస్థలన్నింటి ఐపీవోలను గమనిస్తే.. ఇష్యూ పరిమాణం సగటున రూ.1,700 కోట్లుగా ఉన్నది. టెక్నాలజీ, ఆర్థిక సేవలు, మౌలిక, ఇంధన, కన్జ్యూమర్‌ రంగాల్లోని సంస్థలు ఈసారి ఎక్కువగా పబ్లిక్‌ ఇష్యూకు వచ్చినట్టు తేలింది. నిజానికి ఈ ఏడాది మొదటి ఏడు నెలలు భారతీయ స్టాక్‌ ఎక్సేంజీలు తీవ్ర ఒడిదుడుకుల్లోనే సాగాయి. భౌగోళిక, రాజకీయ ఉద్రిక్తతలు, విదేశీ పోర్ట్‌ఫోలియో మదుపరుల (ఎఫ్‌పీఐ) పెట్టుబడుల ఉపసంహరణలు వంటివి ప్రధానంగా మార్కెట్‌ సెంటిమెంట్‌ను దెబ్బతీశాయి. అయితే ఆగస్టు నుంచి పరిస్థితులు చక్కబడ్డాయి. దీంతో లిస్టింగ్‌లూ ఊపందుకున్నాయని మార్కెట్‌ విశ్లేషకులు అభిప్రాయపడుతున్నారు.

భారీ ఐపీవోలు ఇవే..

ఈ ఏడాది ఐపీవోలలో టాటా క్యాపిటల్‌ అత్యధికంగా రూ.15,512 కోట్లను సమీకరించింది. ఆ తర్వాత హెచ్‌డీబీ ఫైనాన్షియల్‌ సర్వీసెస్‌ (రూ.12,500 కోట్లు), ఎల్‌జీ ఎలక్ట్రానిక్స్‌ ఇండియా (రూ.11,607 కోట్లు), హెక్సావేర్‌ టెక్నాలజీస్‌ (రూ.8,750 కోట్లు), లెన్స్‌కార్ట్‌ సొల్యూషన్స్‌ (రూ.7,278 కోట్లు), బిలియన్‌బ్రెయిన్స్‌ గ్యారేజ్‌ వెంచర్స్‌ (రూ.6,632 కోట్లు) ఐపీవోలున్నాయి. కాగా, మొత్తం 103 ఐపీవోలలో 70 సంస్థలు లిస్టింగ్‌ రోజున లాభాలను అందుకున్నాయి. 32 కంపెనీలు తొలిరోజు నష్టాలనే చవిచూశాయి. ఈ ఏడాది ఎన్‌ఎస్‌ఈ సూచీ నిఫ్టీ 10 శాతానికిపైగా, బాంబే స్టాక్‌ ఎక్సేంజ్‌ (బీఎస్‌ఈ) ప్రధాన సూచీ సెన్సెక్స్‌ 9 శాతానికిపైగా పెరిగాయి.

రిటైల్‌ ఇన్వెస్టర్ల దూకుడు..

చిన్న మదుపరులు స్టాక్‌ మార్కెట్‌ ఆధారిత పెట్టుబడులకు ఈ ఏడాది అమితాసక్తిని కనబర్చారు. రిటైల్‌ ఇన్వెస్టర్ల ప్రయోజనాల రక్షణార్థం క్యాపిటల్‌ మార్కెట్స్‌ రెగ్యులేటర్‌ సెబీ తీసుకుంటున్న నిర్ణయాలు, చేపడుతున్న చర్యలు కూడా కలిసొచ్చాయని ట్రేడర్లు విశ్లేషిస్తున్నారు. గతంతో పోల్చితే స్టాక్‌ మార్కెట్‌ పెట్టుబడులపై చిన్న మదుపరులలో అవగాహన పెరిగిందని అంటున్నారు. కాగా, పబ్లిక్‌ ఇష్యూల ద్వారా సేకరించిన నిధులను వ్యాపార విస్తరణ, వర్కింగ్‌ క్యాపిటల్‌, రుణ భారాన్ని తగ్గించుకోవడానికే కంపెనీలు ఎక్కువగా వినియోగించినట్టు ఐపీవో వివరాలను చూస్తే తెలుస్తున్నది.

వచ్చే ఏడాది కూడా ఐపీవోలు పెద్ద ఎత్తునే రాబోతున్నాయి. సెబీ నుంచి ఇప్పటికే 75 సంస్థలు ఐపీవోలకు అనుమతుల్ని పొందాయి. ఇవన్నీ కూడా తమ పబ్లిక్‌ ఇష్యూలను ఖరారు చేయాల్సి ఉన్నది. ఇక మరో 100 కంపెనీలు సెబీ గ్రీన్‌ సిగ్నల్‌ కోసం ఎదురుచూస్తున్నాయి.

-భవేశ్‌ షా, ఈక్విరస్‌ క్యాపిటల్‌ ఎండీ

• 2024లో 90 ఐపీవోలు. రూ.1.60 లక్షల కోట్లకుపైగా నిధుల సమీకరణ.
• 2023లో 57 ఐపీవోల ద్వారా రూ.49, 436 కోట్లు అందుకున్న కంపెనీలు.
• 2026లో రిలయన్స్‌ జియో, ఫ్లిప్‌కార్ట్‌, ఫోన్‌పే, జెప్టో, ఎస్బీఐ మ్యూచువల్‌ ఫండ్‌, ఓయో, ఎన్‌ఎస్‌ఈ, బోట్‌, హీరో ఫిన్‌కార్ప్‌ తదితర ఐపీవోలు.
• ఈ ఏడాది గరిష్ఠంగా 18 స్టార్టప్‌లు స్టాక్‌ ఎక్సేంజీల్లో నమోదు. వాటిలో లెన్స్‌కార్ట్‌, గ్రో, మీషో, ఫిజిక్స్‌వాలా వంటివి ఉన్నాయి. ఇవన్నీ రూ.41,000 కోట్లకుపైగా నిధులను సమీకరించాయి. గత ఏడాది రూ.29,000 కోట్లుగా నమోదు.
• ఈ ఏడాది అతిపెద్ద ఐపీవో టాటా క్యాపిటల్‌ (రూ.15,512 కోట్లు). అతిచిన్న ఐపీవో జింకుషల్‌ ఇండస్ట్రీస్‌ (రూ.116.5 కోట్లు).
• 2025లోనూ ఆఫర్‌ ఫర్‌ సేల్‌ (ఓఎఫ్‌ఎస్‌) హవా కొనసాగింది. ఈ ఏడాది మొత్తం నిధుల సమీకరణలో దాదాపు 60 శాతం వాటా ఓఎఫ్‌ఎస్‌లదే.
• లిస్టింగ్‌ సంస్థల్లో ఈ ఏడాది 15 కంపెనీలు కేవలం ఓఎఫ్‌ఎస్‌ మార్గం ద్వారానే రూ.45,000 కోట్లకుపైగా నిధులను సేకరించాయి. అలాగే ఫ్రెష్‌ క్యాపిటల్‌ ద్వారా 23 సంస్థలు ఫండ్స్‌ను దక్కించుకున్నాయి. ఇష్యూ పరిమాణం సగటున సుమారు రూ.600 కోట్లు. ఇక చాలా కంపెనీలు ఓఎఫ్‌ఎస్‌, ఫ్రెష్‌ క్యాపిటల్‌ రెండింటినీ వినియోగించుకున్నాయి.
• ఈ ఏడాది రికార్డు స్థాయిలో రూ.11,400 కోట్లు సమీకరించిన 252 చిన్న, మధ్యతరహా సంస్థ (ఎస్‌ఎంఈ)లు. 2024లో 222 కంపెనీలు రూ.9,580 కోట్లు సేకరణ.
• ఈ ఏడాది ఐపీవోలలో అత్యధికంగా హైవే ఇన్‌ఫ్రాస్ట్రక్చర్‌ పబ్లిక్‌ ఇష్యూకు 300 రెట్లకుపైగా సబ్‌స్క్రిప్షన్లు దాఖలయ్యాయి.