వాణిజ్య లోటు పైపైకి.. గత నెల 8 నెలల గరిష్ఠానికి చేరిక

దేశంలో ఎగుమతులు, దిగుమతుల మధ్య వ్యత్యాసానికి సూచికగా ఉండే వాణిజ్య లోటు గత నెలలో ఏకంగా 8 నెలల గరిష్ఠాన్ని తాకింది. గురువారం విడుదలైన కేంద్ర వాణిజ్య మంత్రిత్వ శాఖ అధికారిక గణాంకాల ప్రకారం జూలైలో భారత వాణిజ్య లోటు 27.35 బిలియన్‌ డాలర్లుగా నమోదైంది. గత ఏడాది నవంబర్‌ తర్వాత ఇదే అత్యధికం కావడం గమనార్హం.

• జూలైలో 27.35 బిలియన్‌ డాలర్లుగా నమోదు
• దేశ దిగుమతుల్లో ఎగుమతులు దాదాపు సగానికి పరిమితం
• తాజా అధికారిక గణాంకాల్లో వెల్లడి

న్యూఢిల్లీ, ఆగస్టు 14: దేశంలో ఎగుమతులు, దిగుమతుల మధ్య వ్యత్యాసానికి సూచికగా ఉండే వాణిజ్య లోటు గత నెలలో ఏకంగా 8 నెలల గరిష్ఠాన్ని తాకింది. గురువారం విడుదలైన కేంద్ర వాణిజ్య మంత్రిత్వ శాఖ అధికారిక గణాంకాల ప్రకారం జూలైలో భారత వాణిజ్య లోటు 27.35 బిలియన్‌ డాలర్లుగా నమోదైంది. గత ఏడాది నవంబర్‌ తర్వాత ఇదే అత్యధికం కావడం గమనార్హం. నాడు 31.77 బిలియన్‌ డాలర్లుగా వాణిజ్య లోటు ఉన్నది. జూలైలో దేశంలోకి ఆయా దేశాల నుంచి వచ్చిన దిగుమతుల్లో.. మన దేశం నుంచి వివిధ దేశాలకు వెళ్లిన ఎగుమతులు దాదాపు సగానికే పరిమితమయ్యాయి మరి.

ఇదీ సంగతి..

దేశీయ ఎగుమతులు గత నెలలో 37.24 బిలియన్‌ డాలర్లుగా ఉన్నాయి. దీంతో గతంతో పోల్చితే 7.29 శాతం వృద్ధి కనిపిస్తున్నది. నిజానికి అంతకుముందు రెండు నెలలూ ఎగుమతులు పడిపోయాయి. అయితే జూలైలో పుంజుకున్నాయి. మరోవైపు దేశంలోకి దిగుమతుల విలువ 64.59 బిలియన్‌ డాలర్లుగా ఉన్నది. మునుపటితో చూస్తే 8.6 శాతం పెరిగింది. అందుకే వాణిజ్య లోటు ఇంతలా ఎగిసిందని మార్కెట్‌ నిపుణులు ప్రస్తుత పరిస్థితిని విశ్లేషిస్తున్నారు. కాగా, దేశంలో అన్ని రకాల వస్తూత్పత్తుల తయారీ పెరిగితే.. దిగుమతుల్ని తగ్గించుకోవచ్చని, తద్వారా విదేశీ మారకపు నిల్వలను కాపాడుకోవచ్చని అంటున్నారు. అలాగే ప్రస్తుతం అమెరికా టారిఫ్‌ల దృష్ట్యా ఆయా దేశాలకు ఎగుమతుల్ని పెంచుకోవడానికున్న అవకాశాలను అన్వేషించాలని కూడా కేంద్ర ప్రభుత్వానికి వారు సూచిస్తున్నారు. ఫలితంగా వాణిజ్య లోటును కట్టడి చేయవచ్చని, డాలర్ల రాకనూ పెంచుకోవచ్చని సలహా ఇస్తున్నారు.

ఏప్రిల్‌-జూలైలో..

ఈ ఆర్థిక సంవత్సరం (2025-26) తొలి 4 నెలల్లో (ఏప్రిల్‌-జూలై) దేశ ఎగుమతులు 3.07 శాతం పెరిగి 149.2 బిలియన్‌ డాలర్లుగా ఉన్నాయి. అయితే ఇదే సమయంలో దిగుమతులు 5.36 శాతం ఎగిసి 244.01 బిలియన్‌ డాలర్లుగా నమోదు కావడం గమనార్హం. దీంతో వాణిజ్య లోటు 94.81 బిలియన్‌ డాలర్లుగా ఉన్నది. కాగా, దేశ ఎగుమతుల ప్రోత్సాహానికి తీసుకోవాల్సిన చర్యలను త్వరలోనే ప్రకటిస్తామని ఈ సందర్భంగా కేంద్ర వాణిజ్య కార్యదర్శి సునీల్‌ భరత్‌వాల్‌ అన్నారు.

అమెరికాతో ఇలా..

ఈ జూలైలో అమెరికాకు భారత్‌ నుంచి వెళ్లిన ఎగుమతుల్లో 19.94 శాతం వృద్ధి కనిపిస్తున్నది. గత నెల అగ్రరాజ్యానికి 8.01 బిలియన్‌ డాలర్ల ఎగుమతులు జరిగాయి. అలాగే అమెరికా నుంచి మన దేశానికి దిగుమతులు 13.78 శాతం పెరిగి 4.55 బిలియన్‌ డాలర్లకు చేరాయి. ఇక ప్రస్తుత ఆర్థిక సంవత్సరం ఏప్రిల్‌-జూలైలో అమెరికాకు భారత ఎగుమతులు 21.64 శాతం పెరిగి 33.53 బిలియన్‌ డాలర్లుగా ఉన్నాయి. అమెరికా నుంచి దిగుమతులు 12.33 శాతం ఎక్కువై 17.41 బిలియన్‌ డాలర్లకు చేరాయి. కాగా, ఈ ఆర్థిక సంవత్సరం మొదలు (ఏప్రిల్‌ నుంచి) అమెరికాకు భారత ఎగుమతులు నెలనెలా పెరుగుతూనే ఉన్నాయి. అయితే ఈ నెల (ఆగస్టు) నుంచి పడిపోవచ్చన్న అంచనాలున్నాయి. అమెరికాలోకి దిగుమతయ్యే భారతీయ వస్తూత్పత్తులపై ట్రంప్‌ విధించిన సుంకాలే ఇందుకు కారణం. సెప్టెంబర్‌లో ఇవి మరింతగా క్షీణించే అవకాశాలూ కనిపిస్తున్నాయి. 50 శాతం టారిఫ్‌ల ప్రభావం ఉండనున్నది. దీంతో ఈ నెలాఖర్లో ఇరు దేశాల మధ్య జరిగే ఆరో విడుత వాణిజ్య చర్చలకు ప్రాధాన్యం ఏర్పడుతున్నది. చర్చలు ఫలిస్తే సుంకాల భారం తగ్గే అవకాశాలున్నాయి.

• గత నెల జూలైలో దేశీయ ఇంజినీరింగ్‌ ఎగుమతుల విలువ 10.42 బిలియన్‌ డాలర్లుగా ఉన్నది. ఎలక్ట్రానిక్స్‌ ఎగుమతులు 3.76 బిలియన్‌ డాలర్లుగా ఉన్నాయి.
• రత్నాలు-ఆభరణాల ఎగుమతులు 2.4 బిలియన్‌ డాలర్లు, ఔషధ రంగ ఎగుమతులు 2.7 బిలియన్‌ డాలర్లు, రసాయన ఎగుమతులు 2.46 బిలియన్‌ డాలర్లుగా నమోదయ్యాయి.
• పెట్రోలియం ఎగుమతులు గతంతో చూస్తే 25 శాతం పడిపోయి 4.34 బిలియన్‌ డాలర్లకు పరిమితమయ్యాయి.
• దేశంలోకి ముడి చమురు దిగుమతులు 7.46 శాతం పెరిగి 15.57 బిలియన్‌ డాలర్లకు చేరాయి.
• బంగారం దిగుమతులు సైతం 13.83 శాతం వృద్ధితో ఏడాది కిందటితో పోల్చితే 3.93 బిలియన్‌ డాలర్లకు పెరిగాయి.
• గత ఏడాది జూలైలో 30.60 బిలియన్‌ డాలర్లుగా ఉన్న దేశీయ సేవా రంగ ఎగుమతులు.. ఈ ఏడాది జూలైలో స్వల్పంగా పెరిగి 31.03 బిలియన్‌ డాలర్లకు చేరాయి.
• దేశీయ సేవా రంగ దిగుమతులు గత నెల 15.40 బిలియన్‌ డాలర్లుగా ఉన్నట్టు అంచనా.
• ఈ ఏడాది ఏప్రిల్‌-జూలైలో దేశ సేవా రంగ ఎగుమతులు 128.43 బిలియన్‌ డాలర్లకు పెరిగాయి. ఏడాది కిందట ఇదే వ్యవధిలో ఇవి 119.07 బిలియన్‌ డాలర్లుగా ఉన్నాయి.
• జూలైలో చైనాకు భారత్‌ నుంచి 1.34 బిలియన్‌ డాలర్ల ఎగుమతులు. ఏప్రిల్‌-జూలైలో 5.75 బిలియన్‌ డాలర్లుగా ఉన్నాయి.
• చైనా నుంచి దిగుమతులు గత నెల 10.91 బిలియన్‌ డాలర్లుగా ఉన్నాయి. ఏప్రిల్‌-జూలైలో 40.65 బిలియన్‌ డాలర్లు.
• యూఏఈ, బ్రిటన్‌, జర్మనీ, బంగ్లాదేశ్‌, బ్రెజిల్‌, ఇటలీలకు భారత్‌ నుంచి పెరిగిన ఎగుమతులు. నెదర్లాండ్స్‌, సింగపూర్‌, సౌదీ అరేబియా, ఆస్ట్రేలియా, దక్షిణాఫ్రికా, ఫ్రాన్స్‌లకు ఎగుమతుల్లో తగ్గుదల.
• యూఏఈ, రష్యా, ఇండోనేషియా, ఖతార్‌, తైవాన్‌ల నుంచి జూలైలో తగ్గిన దిగుమతులు. సౌదీ అరేబియా, సింగపూర్‌, దక్షిణ కొరియా, జపాన్‌, హాంకాంగ్‌, థాయిలాండ్‌ నుంచి దిగుమతుల్లో పెరుగుదల.