82 వేల పైకి సెన్సెక్స్‌.. వరుసగా నాలుగో రోజూ లాభాల్లో సూచీలు

దేశీయ స్టాక్‌ మార్కెట్లు వరుస లాభాలతో కళకళలాడుతున్నాయి. వరుసగా నాలుగోరోజూ మంగళవారం కూడా సూచీలు భారీగా లాభపడ్డాయి. బ్లూచిప్‌ సంస్థల షేర్లకు మదుపరుల నుంచి లభించిన మద్దతుతోపాటు దేశీయ సంస్థాగత పెట్టుబడిదారులు భారీగా కొనుగోళ్లు జరపడం సూచీల్లో జోష్‌ పెంచింది.

ముంబై, అక్టోబర్‌ 7 : దేశీయ స్టాక్‌ మార్కెట్లు వరుస లాభాలతో కళకళలాడుతున్నాయి. వరుసగా నాలుగోరోజూ మంగళవారం కూడా సూచీలు భారీగా లాభపడ్డాయి. బ్లూచిప్‌ సంస్థల షేర్లకు మదుపరుల నుంచి లభించిన మద్దతుతోపాటు దేశీయ సంస్థాగత పెట్టుబడిదారులు భారీగా కొనుగోళ్లు జరపడం సూచీల్లో జోష్‌ పెంచింది. లాభాల్లో ప్రారంభమైన సూచీలు చివరి వరకు అదే ట్రెండ్‌ను కొనసాగించింది. ఇంట్రాడేలో 500 పాయింట్లకు పైగా ఎగబాకిన 30 షేర్ల ఇండెక్స్‌ సూచీ సెన్సెక్స్‌ 82 వేల పాయింట్ల మైలురాయిని అధిగమించింది.

మధ్యాహ్నాం తర్వాత అంతర్జాతీయ మార్కెట్ల నుంచి వచ్చిన ప్రతికూల సంకేతాలు ఈ భారీ లాభాలను నిలుపుకోలేకపోయింది. చివరకు 136.63 పాయింట్లు అందుకొని 81,926.75 వద్ద ముగిసింది. నిఫ్టీ తీవ్ర ఒడిదుడుకులకు లోనైంది. ప్రారంభంలో భారీగా లాభపడిన సూచీ చివరకు 30.65 పాయింట్లు మాత్రమే పెరిగి 25,108.30 వద్ద స్థిరపడింది. అంతర్జాతీయ మార్కెట్ల నుంచి వచ్చిన సానుకూల అంశాలు మదుపరులను కొనుగోళ్ల వైపు నడిపించాయని దలాల్‌స్ట్రీట్‌ వర్గాలు వెల్లడించాయి.

• ఎయిర్‌టెల్‌, హెచ్‌సీఎల్‌, అల్ట్రాటెక్‌ షేర్లు ఒక్క శాతానికి పైగా లాభపడ్డాయి.
• వీటితోపాటు ఐసీఐసీఐ బ్యాంక్‌, హెచ్‌డీఎఫ్‌సీ బ్యాంక్‌, బజాజ్‌ఫైనాన్స్‌, టాటాస్టీల్‌, పవర్‌గ్రిడ్‌, ఎటర్నల్‌, రిలయన్స్‌, మారుతి, మహీంద్రాఅండ్‌మహీంద్రా, సన్‌ఫార్మా షేర్లు లాభాల్లో ముగిశాయి.
• కానీ, యాక్సిస్‌ బ్యాంక్‌, టాటా మోటర్స్‌, ట్రెంట్‌, ఇన్ఫోసిస్‌, ఎస్బీఐ, హెచ్‌యూఎల్‌, కొటక్‌ బ్యాంక్‌, బీఈఎల్‌, టీసీఎస్‌, ఎన్‌టీపీసీ, ఐటీసీ, టైటాన్‌, ఎల్‌అండ్‌టీ, అదానీపోర్ట్స్‌, ఏషియన్‌ పెయింట్స్‌, బజాజ్‌ఫిన్‌సర్వ్‌, టెక్‌ మహీంద్రా షేర్లు నష్టపోయాయి.